Talɣa taḥerfit n umyag s usilqey

Acu d-teqqar tbadut?

Talɣa taḥerfit, d talɣa n umyag send ad yefti. D nettat i d tameẓyant ger talɣiwin-is.  I wakken ad d-tafeḍ talɣa taḥerfit n umyag, ssefti-t kan ɣer wanaḍ akked wudem wis 2 n wasuf (kečč, kemm). 

Anwi imyagen i ilan talɣa taḥerfit?

Imyagen n tutlayt akk, lan talɣa taḥerfit: iluganen d yirluganen, imenza d yisuddimen, n tigawt neɣ n tɣara.. 

• Imyagen iluganen: ndeh, mdel, ldi, zwi, ɣumm…
• Imyagen irluganen: asem, ggall, dhu, af, zwir...
• Imyagen n tɣara: imẓiy, iwriɣ, aẓay, iẓid, imsus...
• Imyagen n tigawt: azzel, gzem, grurej, rẓem, 
• Imyagen imenza: lmed, ečč, aɣ...
• Imyagen isuddimen:

- Aswaɣ: sselmed, ssečč, ssiɣ...

- Attwaɣ: ttwalmed, mmečč, ttwaɣ...

- Amyaɣ: myelmad, myečč, myaɣ…

-Talɣiwin tuddisin: ttuselmed, mselmad, myelmad...

Asemgired ger talɣa taḥerfit n umyag asuddim d tin n umyag amenzu:

Aṭas n medden i iteggen tuccḍa, ladɣa iselmaden! Ttawḍen armi mmalen ayen ur nṣeḥḥa ara i yinelmaden-nsen. Akken i d-nenna deg ufella, yal amyag, yesεa talɣa-s taḥerfit. Talɣa taḥerfit n umyag asuddim, mačči d tin n umyag amenzu ansi d-yettusuddem. Akken mgaraden deg unamek ay mgaraden di talɣa taḥerfit.  Ad nẓer tafelwit-a n yimedyaten, ad negzu ugar:

Amyag aduddim	Talɣa-s taḥerfit	Amyag amenzu	Talɣa-s taḥerfit
yesgan tettwaṭṭfeḍ ttemɣafaren yettusimɣer temsuffaɣem ssemyehdareɣ	sgen ttwaṭṭef mɣafar ttusimɣer msuffaɣ ssemyehdar	igen teṭṭfeḍ ɣufren meqqer teffɣem hedreɣ	gen ṭṭef ɣafer imɣur ffeɣ hder

Tamsirt, yessewjed-itt-id Sadaq Bendali

https://sadbendali.blogspot.com/2021/03/tala-taherfit-n-umyag-s-usilqey.html