Tadiwennit akked tmedyazt tilemẓit Ḥasina Alkama

 Acḥal d tagnit ideg nettḥulfu dakken yettader usirem ɣef yimal n tutlayt-nneɣ tamaziɣt. Si tama nniḍen, yettuɣal yettnerni ladɣa mi ara naẓ ɣer yilmeẓyen-nneɣ. Di tuddar-nneɣ , nettaf aṭas deg-sen i yettaken azal d wul i tutlayt-nsen. Qqaren-tt, ttarun-tt, beggsen fell-as akken ad refden amur-nsen n teεkemt iwakken  Tamaziɣt neɣ Taqbaylit ad d-yali fell-as wass amellal, ad tidir i lebda am nettat am tutlayin nniḍen yenneflin. Tamedyazt tanelmadt di taɣult n Tmaziɣt Ḥasina Alkama, d yiwen umedya. Yelli-s n taddart n Tiɣilt Meḥmud n Ssuq n Letniyen di Mεatqa, yeqqaren Tamaziɣt di tesdawit Mulud At Mεemmer n Tizi Uzzu deg uswir n master 1, terra-d akk ɣef yisteqsiyen n tutlayt-inu.

Tutlayt-inu : Senked-d iman-im ?

Ḥasina Alkama: Isem-iw Alkama Ḥasina si taddart n Tiɣilt Meḥmud, taɣiwant n Ssuq n Letniyen Mεatqa, d tanelmadt n Master 1 deg ugezdu n tutlayt d yedles amaziɣ di tesdawit n Lmulud At Mεemmer.

Tutlayt-inu : Melmi d wamek i d-tufiḍ iman-im deg ubrid n yisefra d tmedyezt ?

Ḥasina Alkama: Ufiɣ-d iman-iw ttaruɣ isefra segmi temmut yemma-s n  Meεtub. Asefru-inu amezwaru, xedmeɣ-t ɣef Nna Ɛelǧiya ad tt-yerḥem Rebbi. Seg wass-nni,  iserreḥ yiles-iw d ufus-iw i tira.

Tutlayt-inu : Anwa i am-irennun afud deg umecwar-im ?

Ḥasina Alkama: Tamezwarut i ibedden ɣer tama-w, d tawacult-iw.  Syin akkin, ufiɣ-d tiddukla asirem n Yiɣil Lmal i iyi-d-yefkan afus n tallelt d yiwellihen. Gan-iyi tabɣest  akken ad aẓeɣ ɣer zdat .

Tutlayt-inu-: Acu-ten yisental iɣef tettaruḍ ?

Ḥasina Alkama: Isental ggten. Ayen akk yellan di tmetti, tteεraḍeɣ ad aruɣ fell-as:  imawlan, azal n tmeṭṭut, ddunit, tijmilin, timest-nni i iεeddan….

Tutlayt-inu : Imi tettaruḍ tamedyezt, wissen ma txemmeḍ ad d-terred isefra-m deg udlis?

Ḥasina Alkama: Tikti n udlis, tella deg uqerru-w, xemmeɣ-as yakan. Rnu, abrid n tmedyezt, yewwi-d ad d-yeffeɣ d adlis akken ad t-ɣren yimeɣriyen.

Tutlayt-inu :  Wissen ma temlaleḍ-d uguren deg umecwar-agi i d-tewwiḍ ?

Ḥasina Alkama: Taswiεt-a! Lḥemdullah ur d-ufiɣ ara kra n wugur. Tawacult-iw tbedd ɣer tama-w, tettεawan-iyi s wayen tezmer, yis-s i wwiɣ abrid-agi, ɣer deffir ur ttuɣaleɣ ara.  

Tutlayt-inu : Melmi i tḥemmleḍ ad taruḍ ?

Ḥasina Alkama: Ḥemmleɣ ad aruɣ s waṭas, mi ara d-yeɣli yiḍ; ttafeɣ iman-iw acku tettili tsusmi, din i d-ttasent tikta s waṭas.

Tutlayt-inu :  Anwa acennay neɣ amedyaz iwumi tḥemmleḍ ad tesleḍ ?

Ḥasina Alkama: Ḥemmleɣ ad sleɣ i Dda Lwennas ad t-yerḥem Rebbi, acku netta d aɣerbaz, ɣur-s i d-uǧweɣ tamussni, d netta i iyi-yeldin allen akken ad iḥmileɣ idles-nneɣ.

Tutlayt-inu : Kemm i ikecmen annar n tmedyezt melmi kan, amek twalaḍ adeg n umedyaz di tmurt-nneɣ ?

Ḥasina Alkama: Ttwaliɣ amedyaz ur yesεi ara azekka di tmetti-nneɣ, acku drus maḍi n wid i as-yefkan azal.

Tutlayt-inu : Acu i kem-yewwin ad teɣreḍ idles d tutlayt n tmaziɣt di tesdawit?

Ḥasina Alkama: D nekk i tt-yextaren, si zik-iw i ḥemmleɣ tutlayt-iw. Sarameɣ ad ttekkiɣ di lebni-ines, ad d-rnuɣ kra n yebruyen deg usnerni-ines ɣer zdat.

Tutlayt-inu : Yella kra n usenfar i tettheyyiḍ ɣer sdat ?

Ḥasina Alkama: Aql-i serseɣ ammud n yisefra-w ɣer teẓrigt, sarameɣ ur yettεeṭṭil ara ad d-yeffeɣ. Γef zdat, ad d-swejdeɣ isefra-w deg CD, akken ad asen-slen wid ur nezmir ara ad ɣren.

Tutlayt-inu : Yella wayen tessarameḍ ?

Ḥasina Alkama: Sarameɣ ad tbeddel teswiεt, amedyaz ad yaf iman-is di tmurt-is, ad yesεu amkan i as-iwulmen.

Tutlayt-inu : Awal n taggara i ublug tutlayt-inu ?

Ḥasina Alkama: Ad d-iniɣ tanemmirt meqqren ɣef wazal i iyi-tefkam.  Tanemmirt daɣen ɣef leqdic i d-tettheyyim, afud igerrzen deg tekti-nwen.

Tadiwennit, tga-tt Farida Cebbiri

I Tutlayt-inu

https://sadbendali.blogspot.com/2022/08/tadiwennit-akked-tmedyazt-tilemzit.html