Abrid asekcam Tubiret - Tizi Wezzu

Abrid asekcam azerban n Tizi Wezzu, d yiwen seg yisenfaren yeqqnen ɣer ubrid azerban asammer-ataram. Asenfar-a, yendeh s wudem unṣib deg useggas n 2013. Deg-s, azal n 48 km di teɣzi, ad yeqqen ger Ǧebbaḥeyya deg wakal n Tubiret ɣer temdint n Tizi Wezzu. Abrid-a, ad yezri di tɣiwant n Ɛumar (Tubiret). Mi yewweḍ ɣer yiɣil n Tizi n Larebεa, ad yezger di tgennarit, seddaw tmurt, ɣer tɣiwant n Draε Lmizan deg unẓul n ugezdu n Tizi Wezzu. Idis ɣer yidis ad yeddu yid-s ubrid aɣelnaw RN 25 alamma d talast n "Mirabu". Mi iεedda i yizuɣar n Draε Lmizan, ad d-yernu ɣer yidis-nsen Wasif n Ttlata, ad lḥun akken di krad yid-sen alamma d Tajwimeεt, deg umkan iwumi qqaren "Lakas".

Deg uṣubbu-nnes, ad yezri zdat ddeqs n tuddar n Yiflisen n Umellil am Wayt Ɛisa, Bufḥima, Icukkren d Meεmer (di tɣiwant n Draε Lmizan).  Metwal Tafuɣalt, ad yekcem di tgennarit tis snat, deg Umalu n Uziḍuḍ. syin ad ikemmel amecwar-is ɣer Tactiwin, di tɣiwant n Wayt Yeḥya Musa. Mi ara yaweḍ ɣer wadeg n usenfar n Wuggug n Ttlata, ad yegzem ddaw tuddar n tama n usamar n tɣiwant n Tedmayt. Deg umager n yiberdan ideg llan yigran n ččina, ad ikemmel srid ɣer Tizi di tlemmast n yizuɣar n Tirmitin alamma yemlal d ubrid i d-yusan seg Yiεeẓẓugen. Timlilit-nsen deg Wasif n Fali. Abrid asekcam ad yernu 2 km ad t-id-tmager tewwurt n Tizi Wezzu, tama n wennar amaynut n Yilmeẓyen n Leqbayel (JSK). 

Deg wahil n usenfar-a n 2×3, llant 11 teqneṭyar d snat tgennariyin. Tin n Tizi n Larebεa, deg-s 950 m, ma d tin n Tfuɣalt tesεa 250 m di teɣzi. Asenfar-a ameqqran, yeṭṭef-it yiwen usegrew azzayri-aturki, qqaren-as Groupement ONE. Ttekkant deg-s kradet termisin, d Özgün, Nurol d ENGOA. Azal n yidrimen i as-yettunefken yebda s 56 yimelyaren n yidinaren (500 yimelyunen n wuruten). Deg yisallen i d-newwi si teɣbalut iṣeḥḥan, ar assa, ttuserrfen seg yidrimen-a azal n 75%. Ma d asenfar i ilaqen ad ifakk di 36 wayyuren, yesseḍra-d azal n 52 % kan. S wakka, ha-t-a yesεa azal n 4 yiseggasen d agellel (retard),  yernu ad yernu ad iεeṭṭel.

Segmi yebdaur fukken fell-as wuguren. Acḥal d tikkelt i iḥebbes. Yal tikkelt acu d tamentilt. Seg-sent, ad d-nebder tinmegliwin, lexsas n yisrimen, uguren ideblanen, timlilit n usenfar d yiẓeḍwan n lgaz d trisiti, yir asefrek... Ger tlufa-s timeqqranin d ugur n useɣli n tnezduɣin i ɣef ur d-yelli ara umsefham ger yimḍebbren d yimawlan-nsent. Ugur yezga ladɣa di Meεmer, Rabet d Wayt Ɛisa. Akka imira, asenfar yeḥbes, ixeddamen ttwaḥebsen. Qqimen-d kan azal 20 seg 1000 deg "yidasilen n tudert" n Draε Lmizan d Buxalfa. Asegrew ONE, yettwalas ayen din n yidrimen ɣer yixeddamen d termisin timeẓyanin (sous-traitants...) i ixeddmen ɣur-s. Taluft, tεelleq, wissen amek ara tefru!

Xas yella lebɣi ɣer yimḍebbren ilan assaɣ d usenfar, ulay d-xedmen. Tifrat ad d-teqqim kan ɣer unabaḍ di tmaneɣt. Yella-d wawal, d-akken asenfar, ad ibeddel afus. Yezmer ad yettwakkes seg Yiturkiyen ad yettunefk i yiwet termist tazzayrit, yecban COSIDER. Ahat, sya ar kra n wayyuren ad tifrir tagut. Ma d imezdaɣen d yimguranen n temnaḍt, i tuɣ sεan aṭas n usirem, a-ten-a, bdan la ttaysen. 

Sadeq Bendali