Abrid ttaɣeɣ

 Abrid ttaɣeɣ

Seg wazal n mraw wussan ay-a, aql-i zeεma am wakken bdiɣ aseḥbiber ɣef tdawsa n tfekka-w. Amek? Yal sin wussan, ass s wass, timeddiyin teffɣeɣ d umdakkel-iw d tikli deg yizuɣar i d-isuman iɣrem ideg zedɣeɣ. Send ad nebdu "asenfar-a", nniɣ-as ahat d ayen iweεren akken ad ugireɣ yal tikkelt 6 ar 9 km. Tura, mi uɣeɣ tanumi, ufiɣ iman-iw d ayen kan. Simmal icerreh wul-iw, ladɣa mi ttafeɣ ifellaḥen s wactal-nsen ikessen ɣef yiri n ubrid uḍar i ttaɣeɣ d umdakkel-inu. Mi ara ttwaliɣ ulli s yizamaren, tistan, ula d tiɣeṭṭen yettačar wul d asirem. 

Di yal tadwilt, nettmagar-d acḥal d ilemẓi neɣ d argaz ameqqran i yettaɣen abrid s tazzla tafessast, iteggen addal. Tikwal, d tiwaculin timeẓyanin neɣ d tirebbaε ula n teḥdayin. Annect-a, d ayen yessefraḥen. A wi yufan ad yegget waya. Deg uzray ɣef yigran n yirden imegren, irewten, yeqqim-d ala yiɣlel. Imendi (lɣella) yettwawi ɣer wanida ara yettwagrew di Mirabu, ansi ara yaɣ abrid ahat seg yilel akkin. 

Dɣa di taɣult-a, yettas-iyi-d uḥulfu n usḥissef imi tamnaḍt-a n Draε Lmizan, yellan d tamezwarut di twilayt n Tizi Wezzu deg ufares n yirden, si tmezwura di tmurt n Zzayer, ur tesεi ara ula d tissirt tatrart n nneεma am tid yellan di twilayin nniḍen.  Aṭas i as-yeqqaren Tamurt n Leqbayel ur tezmir ara ad tqidd iman-is s tgella d lεic. Dɣa di tɣiwant-a kan ideg lliɣ yal lxir imeqqi-d: baṭaṭa, ddellaε, afeqqus, taxsayt, akbal, tuga i wactal... Deg yidurar-is (d asawen), tella tazart d uzemmur, tiwsatin n yigumma d urebbi n tzizwa. Akeffay-is (ifki) am yirden, yettruḥu ɣer Draε Ben Xedda, imi ulac kra n lluzin i ukeffay d yisuddimen-is deg umkan.

Ma uɣaleɣ-d yid-wen ɣer umecwar-iw n tikli (addal), acḥal ḥemmleɣ mi ara ttεeddiɣ tama n wuggug n Ɛin Zaweyya ideg nettaf inegmaren n yiselman d yimdanen i d-irezzun ɣur-s akken ad kksen ɣef lexwaṭer-nsen zdat waman yettemwiwilen s ubeḥri asemmaḍ d yibriken i as-yernan aṭas n thuski mi ara ttawin ttarran am teflukin ineǧǧren abrid deg ugelmim-a ameqqran. Akkin, mettwal timnaḍin n Buɣni, Friqat, Iwaḍiyen, At Wasif... yettban-d Ǧerǧer, yezdi lqedd-is am wakken yeqqar-d i tarwa-s: nekk, aql-i fell-awen d aεessas, simmal tetteṭṭfem di tjaddit-nwen, ur tebrim ara i ṭṭbel deg waman. 

Abrid-nneɣ, yettkemmil akken irennu umezruy s tɣerma i aɣ-d-ǧǧan yimezwura-nneɣ, d tisutwin imugren icenga d yimnekcamen n yal tallit. Ay tgerrez tlelli, lemmer tella d tummidt. Send tuɣalin s axxam, snuffseɣ-d ayen din n wuksijin uzdig tezdeg n yidles amaziɣ. A-t-an dɣa, meqqar, i tikkelt tamezwarut seg wawway n uzarug, aṭas n yimezdaɣen ara ikecmen ixxamen imaynuten. Ddeqs n twaculin iɣef ara yekfu lḥif n lḥers di tmezduɣt, di taggara-a n Γuct. Asḥissef arqiqan n wul-iw yeqqar-iyi-d: ayɣer imi izedduɣen imaynuten akk bnan deg yizuɣar, deg wakal n tfellaḥt!

Sadeq Bendali

Yettwaru uḍris, ass n 18 ɣuct 2020