Yal tanezzayt, mi ara d-kkreɣ, ttbeddaɣ ɣer usfaylu, yettban-iyi-d udrar n Ǧerǧer. Ttḥulfuɣ am wakken yebɣa ad d-yemmeslay yid-i, ad d-yini kra. Lemmer ẓriɣ isell neɣ ihedder, ula d nekk ttmenniɣ ad as-iniɣ, ad iyi-d-yini. Bɣiɣ ad iyi-d-yales amezruy n uɣref-is d wakal iɣef yezga d aεessas seg wasmi d-yemɣi di tmurt. Acḥal d igeffran, tiremgin, ideflawen, tibuciḍanin, iɣamacen d wurɣan ... i iεeddan fell-as. Akk akken llan, di yal tallit n wakuden yezrin, temmɣen fell-as, ttnadin ad t-sgersen, ad t-ssefsin, ad t-ssigden neɣ ad t-sseɣlin. Yiwen, ur as-yezmir. Ur yekni i usuḍu n waḍu d usemmiḍ n tegrest, ur t-yerẓu uẓɣal n unebdu.
Taṣebḥit n wass-a, qqimeɣ zgiɣ ttmuquleɣ ɣur-s, netta yettmuqul-iyi-d, udem ɣer wudem. Ḥulfaɣ yezzi ɣur-wen,bula d kunwi, yeẓra-ken-in akk a aɣref-is iɣef yezga yesseḥbibir. Xas akken yekka-as-d usigna s ufella, yezga yecbeḥ, d tahuski kan i as-yerna. Yecreh-d uqadum-is ɣur-i, am wakken la iyi-d-yeqqar: ḥemmleɣ-ken. Bɣiɣ ad as-rreɣ: ula d nekkni, nḥemmel-ik - maca ẓriɣ ur iyi-d-isell ara ahat! Nnuɣnaɣ ɣef waya, imi ur as-t-nniɣ ara srid. Maca, deg wul-iw zgiɣ qqareɣ-t.
S tɣiwla, tεedda-d yiwet n tekti d taderwict deg wallaɣ-iw, nniɣ-tt deg yiman-iw i yiman-iw: "I lemmer ad d-kkreɣ, yiwwas ad zriɣ ad beddeɣ ɣer ṭṭaq akken ad ẓreɣ adrar-inu, ad as-iniɣ "azul"; ad t-afeɣ ulac-it! Neɣ ad d-yekker netta, ad inadi fell-aneɣ, aɣref-is, ad aɣ-d-yaf ulac-aneɣ!!! Tebda tekcem-iyi tergagit dɣa srid, ddmeɣ-d tasewlaft-iw, ṭṭfeɣ-as-d TAWLAFT. D tawlaft n udrar-iw seg uxxam-iw. Ssarameɣ ad yettwagzu uḥulfu-inu. Ahat aṭas i yettḥulfun am nekk..
Sadeq Bendali
Commentaires
Enregistrer un commentaire