Aḍris n turda

D acu-t?

Aḍris n turda, d aḍris ideg ara yaru umeskar-is ɣef kra n usentel ideg ila tikti-s iɣef ara d-yessenfali.Mi yeẓra, yefren tikti-nnes tagejdant, ad as-yernu ad tt-iεiwen s tektiwin "tisinanin" akken ad gzun yimeɣriyen n uḍris-is turda-s. Aḍris n turda, igebber ddeqs n tseddarin (azal n 5). Aɣawas-is, deg-s krad (3) yeḥricen: tazwart, asnefli (tiseddarin 2,3,4), tagrayt (taseddart 5, taneggarut).

Acu yegber yal aḥric n uḍris n turda?

TAZWART: (taseddart 1)

Tazwart, deg-s azal n 5 neɣ 6 tefyar iferqen di 3 yeḥricen:

- Asentel unkid: S wa ara yawi umeskar(umaru) ameɣri ɣer usentel-is.

- Tamuɣli n umeskar: ameskar ad d-imel, ad d-yessebyen akken ilaq tamuɣli-s neɣ rray-is ɣef usentel.

- Asentel amebḍu: Da, ameskar, ad d-imel ayen ara gebrent 3 tseddarin neɣ 3 yifukal s wayes ara yessiweḍ turda-s.

ASNEFLI: (tiseddarin 2, 3, 4)

D kradet (3) tseddarin-a i d tafekka n turda n i d-yewwi umeskar. Ad d-yefk deg-sent 3 yifukal i yeṣkan (yebnan) ineḍruyen s yiwet talɣa.

- Taseddart tis 2: deg-s afakul 1.

- Taseddart tis 3: deg-s afakul wis 2.

- Taseddart tis 4: deg-s afakul wis 3.

Yal taseddart neɣ yal afakul, ttilint deg-s azal n 3 tefyar, ma drus.

Ameskar, ilaq-as ad yesseqdec ifukal yelhan i wakken ad yessiweḍ ad iqenneε imeɣri-nnes neɣ imeɣriyen-is.

TAGRAYT: (taseddart tis 5, taneggarut)

Zemrent ad ilint deg-s azal n 3 neɣ 4 tefyar. Tagrayt, d agzul n krad (3)  yifukal ara ifakken s yiwet n tefyirt ara yeqqimen (ikecmen) deg wallaɣ n umeɣri. Azal n tegrayt, d axatar, d nettat i yettarran ameɣri ad d-yernu ɣer yifukal n umeskar, ad ten-yeqbel.

Awalen n tuqqna (n wassaɣen) ger tseddarin d tektiwin:

Di tazwara, tis snat, syin akkin, imi, segmi, d aymi, di taggara, rnu ɣer waya, ihi, acku, syin, akken yebɣu yili, taneggarut, mbeεd, aredqal, tis kradet, di taggara.

Sadak BENDALI