Adrun

 A D R U N  (aḍris ussnan)

Adrun, d yiwen wallal n umesni yettafgen seg umkan ɣer wayeḍ. Iteddu iman-is kan, ur yesεi amenhar, ur yettawi yid-s kra n umdan. Teɣzi-s, tezmer ad tili si kra yisantimitren alamma d kra yimitren, ma yella d ameqqran. Idrunen meqqren, ttusemrasen, ladɣa deg waggaẓ, umlan, amgaru, amesni d umerreḥ. Timanit deg waffug n yidrunen tettili kra n tesdidin alamma 40 tmar, ma d timudam tiqerḍalin.

Tikti n usnulfu n udrun, tlul-d di tallit n umgaru amaḍlan amezwaru. Adrun amezwaru, yennulfa-d di Fransa. Deg wass n 2 yulyu 1917, afransis Max Boucher, yessaweḍ ad yessili deg yigenni adrun-is Voisin  150 HP war amenhar. Yufeg azal n 500 m ɣef talluyt n 50 m. Si tallit-nni, simmal yettnerni, irennu unadi ussnan fell-as. S wakka, yettusexdem deg waṭas yimgura am wid n Kurya, Byitnam, Asammer alemmas, Ɛiraq, Afɣanistan d Yuguslabya. S useqdec n yidrunen, timura, sseḥdarent ɣef terwiḥin, sseḥbibirent ɣef yimdanen (imenharen) di tegnatin iweεren aṭas.

Deg uɣarim, idrunen, ttuseqdacen deg waṭas taɣulin (asarug, atilibizyun, tafellaḥt, tawennaḍt...). Tatiknulujit, tessaweḍ-iten armi zemren ad refden yid-sen allalen n usewlef, tikamiriwin, tikamiriwin tidawzewwaɣin. Di taɣult n umesni, aṭas n termisin i ten-yessexdamen am DHL, UPS, ALLSHIP.  Daɣen, idrunen n umerreḥ d tmerrit, yufrar useqdec-nsen s waṭas, seg useggas n 2010 ɣer da. Nnulfant-d tmudam d timeẓyanin maḍi, yerna sehlit mliḥ i usemres. Deg waṭas n yiwunak n umaḍal, aseqdec n yidrunen, yuɣal ila azal d axatar di temguri d tdamsa daymi i as-mmuggen yisuḍaf s wayes iteddu.

Sadeq BENDALI