Anta i d Lynda Bousellahen?

Xas akken meẓẓiyet di leεmeṛ, iḥulfan d yimeslayen n Linda Buṣellaḥen meqqṛit, weznen u cebḥen.
Di tdiwennit-a, tewwi-aɣ-id awal ɣef wammud-is amenzu n yisefra i d-yeffɣen dduṛt-nni yezrin. D targit i as-yuɣalen d tilawt imi tufa wid i as-yefkan lǧehd n tgecrirt, wid i as-d-yerran azwu i turet.

1-Anta i d massa Lynda Bousellahen?
-Linda Buṣellaḥen tlul ass n 28 deg yebrir aseggas n 1998. D tanelmadt n tmaziɣt deg uswir aneggaru deg uɣeṛbaz unnig n yiselmaden Buzerriεa ; akken teqqaṛ tutlayt taglizit deg ugezdu n tutlayin tijentaḍin deg tseddawit n Bgayet.
Lynda d yelli-s n taddart n Xellil "At Ifser", taɣiwant n Yiberbacen i d-yezgan di Bgayet.D yiwet gar yilmeẓyen i yefkan tagnit i wul akken ad d-yales deg tferkit tacebḥant s yimru-ines .


2- Melmi i d-yeffeɣ wammud-im n yisefra ''Tiram''?
- Yeffeɣ-d wammud-iw n yisefra "Tiram" ass n 08 deg ctembeṛ 2020.


3-Ḥku-aɣ-d amek i tebdiḍ.
- Ahat asefru akken ttwaliɣ nekki mačči dayen ara yebdu umdan s lbɣi-s; d ayen ara d-iduqqen tawwurt s yiman-is.
Cfiɣ ɣef tikkelt tamezwarut imi yendeh yimru-inu s usefru , lliɣ d tanelmadt deg tesnawit deg useggas n ukayad n l'Bac. Yella-d waya tanezzayt deg yennayer 2016, asmi uriɣ asefru. Ass amenzu, ur ẓriɣ ara d akken d asefru! Maca ɣileɣ d kra n uḍris kan akka am wid i uɣeɣ tannumi ttaruɣ. Imi t-id-ɣṛiɣ i yemma, tenna-yi-id yelha yerna aṭas acku asentel-ines qeṛṛiḥ aṭas. Wwiɣ-d deg-s awal ɣef lmut n mmi-s n εemmi "Nadir " fell-as yeεfu Ṛebbi .


4-Ahat tufiḍ wid i kem-yessebɣasen si zik ama di twacult-im neɣ deg uɣeṛbaz?

- Mi ara mmeslayeɣ ɣef tebɣest, ur zmireɣ ara ad d-xedmeɣ umuɣ i kra n yisem iyi-yefkan tallelt deg umecwaṛ-iw n tira i bdiɣ, maca zemreɣ ad d-addreɣ imawlan-iw εzizen i d-yeqqaṛen ayen i txeddmeḍ akka d iseɣ i nekkni d twacult-im akk. D awalen-agi i d afud-iw , d nutni i d-yessaɣen tafat n ubrid-iw. Tin ɣuṛ-s Mass Iftene Tarek, aselmad-iw n tmaziɣt win i yefkan azal i lehduṛ-iw imi i d-asen-yesla tikkelt tamezwarut; yekkes-iyi akukru-nni i yellan yezdeɣ ul, ɣas deg yimru ur yelli .


5-Anwi imedyazen i wumi tḥemmel ad tɣeṛ Linda?

Ayen yeεnan imedyazen i wumi i qqaṛeɣ, tamezwarut ur ttarraɣ ara lwelha-w ɣer yismawen , tin yernan ɣuṛ-s, zemreɣ ad d-iniɣ ḥemmleɣ s umata isefra n Ssi Muḥend u Mḥend , isefra n Meεtub , dda Sliman ad asen-yeεfu Ṛebbi , wid n dda Mḥend Djama, rnu ɣuṛ-s Muḥend n At Ɛebdellah atg...

6-Melmi i tettaruḍ isefra-m?

-Deg wayen yerzan akud n tira n yisefra-inu, ur zmireɣ ara ad d-iniɣ ahat sεiɣ yiwet n tamert deg acu i d-yettlal lebɣi-nni n wurar s wawalen, imi ttaruɣ war ma qudṛeɣ akud, neɣ adeg neɣ kra n yisudaf yeεnan aya ! Maca s umata, imru-inu ineddeh i lehdur-nni i iweznen deg yiḍ mi ara yekfu leεyaḍ n wass u tekcem tsusmi n ṭṭlam , d ccbaha n tziri i wumi i zzin yitran . Akka i d nekk , akka i d isefra-inu .

7-Acu n yiḥulfan i d-iɣellin ɣef Linda mi ara tettaru?

-Mi ara tturareɣ s wawalen , neɣ mi ara d-ttmeyewatent tektiwin gar yijerdan n wenyir akken ad d-rsent ɣef yijerdan n walug , aḥulfu-nni yesslalay-d deg-i Linda i iḥemmlen tamedyazt i yettqadaṛen asekkil d yisudaf-is. Deg teswiεt-agi, ahat s wawal d amecṭuḥ i zemreɣ ad d-iniɣ tleddi-iyi-d tewwurt d umaḍal-nniḍen. Ahat akken i t-ḥessbeɣ d araz sɣuṛ bab n yigenwan .


8-Acu n yisental i ɣef d-tettawiḍ isefra-im?

-Isental n yisefra-inu ggten, ur sεiɣ ara kra n yisental i wumi ggiɣ azal ɣef wiyaḍ , maca mi ara d-mmeslayeɣ ɣef wayen ḥemmleɣ nekki, tella tayri , tasertit imi sin n yisental-agi i wumi ttḥussuɣ aṭas , iyi-iqeṛben di kullec. Bla ma ttuɣ daɣen uriɣ ar ass-a ɣef tudert , tamurt...


9-Asefru ''Ad tekfu targit'' εziz aṭas ɣef wul-im, ayen?

-Asefru "Ad tekfu targit " ḥemmleɣ-t aṭas , mi ara tessleḍ i uzwel ad tḥulfuḍ i unamek; d isem-is i d nnaεt-is. Tamezwarut, yesεa adeg εzizen imi i d-yewwi awal ɣef tayri; asentel i wumi rriɣ azal akken id nniɣ yakan. Rnu ɣuṛ-s taqsiḍt-is ahat ma nniɣ-d teεna-iyi kan, drus .


10-Tettekkaḍ yakan di tfaskiwin n tmedyazt i d-yettilin di Bgayet am tin n Udrar n Fad, neɣ ahat tessarameḍ ad tettekkiḍ?

-Ala, ur ttekkaɣ ara yakan di tfaskiwin ɣas akken sɣawseɣ i waya aseggas-agi imi d tella tegnit, maca ilmend n unfafad "corona" ur yekmil ara wayen i wumi i heggaɣ. Maca, aya mačči d ugur akk! Ma irad uxellaq ad ttekkiɣ tikkal i d-ileḥḥun akken ttekkaɣ yakan deg kra n temzizzlin.

11-Amek i kem-id-tusa tikti i wakken ad d-tjemεeḍ isefra-inem deg wammud-agi?
- Tikti n ujemmuε n yisefa-inu deg wammud-agi ahat tella amzun d targit seg temẓi , maca dayen ur nwiɣ ad awḍeɣ imi d tasdawant i lliɣ. Nniɣ-as aya ad yili mi ara bduɣ aselmed, maca irad uxellaq s lemεawna n uselmad-iw Mass Iftene Tarek win ara snemmreɣ seg wul ɣef wayen akk i d-yexdem ɣef liǧal n wammud-agi. D netta i yefkan azal i lehduṛ-iw, yessnerna tikti neɣ ahat targit-iw yerra-tt d tilawt .


12-Isefra-agi-inem, tesmenyifeḍ ad qqimen kan ɣef tferkit neɣ awi-d ukan win ara ten-yecnun?
- D ayen yessfṛaḥen s waṭas limmer ad d-yaweḍ wass i deg ara waliɣ isefra-inu d tizlit s wayes zhan wussan, neɣ ad as-sleɣ deg yimi n umdan i yefkan taṛwiḥt i wawalen-iw.


13-Ḥku-aɣ-d cwiṭ amek i tferneḍ tiẓrigin-im d wanwa akk i am-d-yefkan afud?

-Afran n teẓrigin-agi ''El Amel" tidet kan lliɣ ur sεiɣ ara ula d tikti fell-asent. Ssawḍeɣ ad tent-issineɣ s tallelt n Mass Iftene Tarek,d netta i iweqqmen assaɣ akken ad d-yali wammud-agi akken daɣ iyi-yefka afud meqqṛen.

14-Anda ara naf ammud-im?

-Ammud-iw ma irad uxellaq ad yili di tnedlisin n bgayet d tizi wezzu d tubiret deg taggara n ctember

15- Acu d isenfaṛen-im akka ɣer sdat di lehna?

-Isenfaṛen-iw ma yebɣa Ṛebbi ɣer sdat, iswi-nsen akk d lebɣi akken ad fkeɣ tagnit i yimru ladɣa imru amaziɣ , ama d asefru, d tamacahut, d ungal neɣ d ayen nniḍen. Yezmer ma irad uxellaq asnulfu i d- ileḥḥun ad yili s tutlayt nniḍen neɣ yezmer s tɣessa nniḍen daɣen .

16-Awal-im n taggara.

Γer taggara, ad snemmreɣ Uzmir iyi- yefkan afud i waya; tin ɣuṛ-s, imawlan-iw εzizen ad ten-iḥrez Ṛebbi bla ma ttuɣ mass Iftene Tarek ɣef ubeddi-is yidi deg yal asurif i ggiɣ ɣer sdat. Tanemmirt i kemmi daɣen a massa Menza ɣef tegnit-agi iyi-tefkiḍ d kra n win iyi-yefkan afus n tallelt ama s wawal ama s lǧehd-is, s wakud neɣ s wayen nniḍen.
Ssarameɣ awalen n wammud-agi d wid ara yilin deg lebɣi n kra n win i t-yeṭṭfen gar yifassen-is neɣ i yeɣṛan ɣas ciṭ kan seg yijerdan-is .
Tanemmirt .

Menza IAMRANENE