Tafriqt n unẓul: 11 tutlayin tunsibin

Snat, d "timellalin", 9, d "tberkanin"

Deg wussan yezrin, niwi-d awal ɣef tutlayin tunsibin deg yiwet n tmurt n Turuft (Europe) - d Swis - d usemres-nsent di yal taɣulin n tudert; assa ad d-nessukk tiḍt ɣef yiwet n tmurt tanesbaɣurt n umenḍaw-nneɣ i yeffɣen seg uzaglu n meḥyaf "appartheid" deg useggas n 1996. D Tafriqt n wenẓul, tamurt n uzamul ameqqran n talsa Nilsun Mandila. 

Tamurt-a, d tagduda yebḍan ɣef 9 temnaḍin (9 provinces), yal ta, tesεa anabaḍ-is amnaḍan d ubarlaman-is. Deg uswir aɣelnaw, yella uselway ufrin, anabaḍ aɣelnaw (lḥukuma n tmurt) d ubarlaman aɣelnaw. Tafriqt n wenẓul, deg-s azal n 60 yimelyunen n yimezdaɣen. 80% deg-sen d iberkanen, +8 % d imellalen, 2,5% si Asya (Lhend) ma d 9% nniḍen d uxliḍen.

Deg wayen yerzan tutlayin tunsibin di 9 temnaḍin, yal tamnaḍt, tesseqdac ma drus snat: a/tutlayt tunsibt tamnaḍant b/tutlayt tunsibt taɣelnawt (d Taneglizit neɣ d Tafrikanest). Tutlayin tinaṣliyin d ti: Tazulut, Taxhusant, Tasabindat, Tandibilt n Tranesbal, Tasutut n Ugafa, Tasutut n Unẓul, Tatsungat, Taswatit. 

I usmeki d uwelleh, tasertit n tutlayin di tmurt-a tcuba tin n Swis maca di Tefriqt n unẓul, amḍan-nsent, meqqer aṭas. Ta, d yiwet n tmentilt i yerran ttbanen-d ddeqs wuguren d yemgirden gar-asent, deg unnar. Imussnawen, ssḥissifen ɣef waya, qqaren lemmer yelli umḍan ddaw n wakka, ahat ad tili tegnit tgerrez aṭas. Annect-a akk, yessaweḍ armi d-ttifrirent kan tutlayin iǧehden am Tneglizit d Tefrikanest.

Sadeq Bendali