Si zik, tamacahut, teṭṭef amḍiq d axatar ɣer Yiqbayliyen. Si tama, d yiwet tgejdit n tmagit n uɣref, si tama nniḍen, d yiwen wallal i yettusexdamen di twacult i urebbi n tarwa. Tamacahut, tecba aɣerbaz ideg ilemmed umeẓyan akk tigejda n tudert d tmasiyin-is di tmetti ideg yettidir. Timussniwin i as-yettusadafen rzant: tadukkli, tagmat, tamsetlelt (amεiwen), tezdeg n tfekka d useḥder ɣef twennaḍt, aqader, attkal ɣef yiman, azbu di tegnatin tuwεirin...
Di tmucuha, llan ula d isental yerzan tamussni n umezruy d yidles n uɣref ideg i d-yefruri netta neɣ imarawen-is. Tuddsa d yilugan n tudert deg udrum d taddart, yettissin-iten ugrud simmal yettnerni yettimɣur. Win ara yeɣren, ara iḍillen assa, ɣer temεayin tiqburin, d igerrujen n tussna ara yaf deg-sent. Anida-ken a Mqidec d Tfunast n Yigujilen, Waɣzen, Lunǧa n Tteryel d ugellid bu 7 yessi-s...!
Assa, drus seg-neɣ i yeqqaren timucuha i tarwa-nsen. Zgan ttnulfun-d wallalen n teywalt itraren, keccmen akk ixxamen. Bḍan iεeyyalen, yal wa di teɣmert-is. Ula d ameslay yenqes ger tasa d way turew. Yessaweḍ-aɣ wakud armi nugad ad yenger yidles d tɣerma-nneɣ d tutlayt-nneɣ daɣen.
Igduden nniḍen n umaḍal, ssnen ad ssemlilen titiknulujiyin titrarin d tɣermiwin-nsen, war ma serrḥen i "wayla-nsen" neɣ ǧǧan ansayen-nsen. Wissen nekkni, amek ara teḍru yid-neɣ, deg yimal uqrib!
Sadeq Bendali
Commentaires
Enregistrer un commentaire