Ṭawes At Ɛmer (neɣ Taous Benamara), d tanaẓurt tameklawt, tlul deg useggas 1972 di Ɛin Lḥemmam (Micli). Ṭawes tessunuɣ s usemres n waman ɣef lkaɣeḍ (aquarelliste). Tḥemmel ad tidir di Tmurt n Leqbayel acku deg-s i tettaf iman-is i tseεεu tahregt. Ţawes d tameṭṭut taqbaylit tasusamt, d timsetḥit. Deffir wallen-is tuḥdiqin, tamuɣli-s teffer tamussni-s d wassaɣen-is akked tɣerma n yimesdurar.
Tiktiwin-is am tzizwa, ttnadint gemmrent di tẓuriwin yemɣin am tjeǧǧigin deg uxemmem-is. Tamment d tugniwin i d-tessekfal si Tmurt n Leqbayel d Lezzayer, tamurt-is izedɣen ul-is. Mi ara teẓreḍ tifelwiyin-is, ad tfehmeḍ acḥal tettcax s wakal deg i d-tekker. Si temẓey-nnes yezga yekkat wul-is ɣef tẓuriwin d wayen akk icebḥen.
Baba-s, yella iteddu-as di lebɣi: acḥal tella tḥemmel ad tessuneɣ tiḥdayin timecṭuḥin! D tayri-a i tt-yessawḍen ad tɣer deg uɣerbaz n tẓuriwin tihuskayin n Yiεeẓẓugen. Ger wexxam n yilmeẓyen n Micli d Wexxam n Yedles Mulud At Mεemmer n Tizi Wezzu, aṭas i teqdec d tdukkliwin tidelsanin, di teklut. Seg wasmi d-tewwi agerdas-is aɣelnaw, nettat d afares. Tekka deg waṭas n tfaskiwin deg weswir n tmurt.
Assa, targit-is simmal tettimɣur armi tezger i yilel agrakal. Teẓra, tegza: aceεceε n tmeddurt-is tanaẓurt, di Turuft kan ara t-taf.
Sadaq Bendali
Commentaires
Enregistrer un commentaire