Timecreḍt n At Weεban

Am yal aseggas, imezdaɣ n taddart n wat waɛban deg tɣiwant n Weqbil, azal n 60km anẓul-asamer ɣef temdint n Tizi Wezzu, ttemlilin deg  wass n sem aneggaru n wayyur n mayu i d-ittqabalen amenzu n unebdu s leḥsab tfada n tfellaḥt iwakken ad qablen tasemhuyt tamaynut s tririt n waman n wasif deg tregwa yettawin ɣer tebḥirin-nsen daxel n taddart ,imi aṭas n yimezdaɣ i yettkalen ɣef lɣellat n tfellaḥt ama d izegza neɣ d igumma (ḥebb lemluk –ifires d ttefaḥ ).

Tasebḥit, at taddart bḍan d igrawen kra ɣer tririt n tregwa akken ad ferqen aman ɣef tebḥirin , wiyaḍ yessnen i tmezla, ɛeddan ɣer uheyyi n tmecreḍt, timezla d ufraq n uksum s umḍan n yimdanen yettidiren di taddart d yinebgawen-nsen , tilawin ssuffuɣent tuččit i teggent deg uxxam am teḥbulin d teɣrifin, ttruḥunt ssrusuyent-tt  deg umkan iwumi qqaren “lɣut” neɣ lemqam n Sidi Ḥend Ɛemran aniɣer d-ttasen daɣen yibeṛṛaniyen ɣef taddart ɣer ẓẓyara. 

Daɣen ad ḥedren i tmecreḍt imi dinna yakan i tettili tazzla n yidammen d ufraq n weksum zdat n yimezdaɣ akken ma llan , inebgawen i d-yettasen, s tumert d tameqqrant i ten- ttmagaren. Deg wass-agi ad naf irmuden yemxalfen cudden-d ɣer tririt n tregwa am temsikent n yeɛbanen d uẓeṭṭa si tama. Si tayeḍ d ḥeb lemluk d yigumma nniḍen yellan di temnaḍt-a. Γer tmeddit, inebgawen d-yusan, uɣalen ferḥen s zzyara. At taddart, imensi-nsen akk d seksu s weksum n tmecreḍt, am uẓawali am win yesɛan. 

Tibḥirin, ur txaṣṣant aman, ad ččarent d izegza. Send kra n yiseggasen i d-tusa tikti n ulday n wulzuz n tlawin i tikkelt tamenzut deg-s ara naf yettnuz kra tga tmeṭṭut taqbaylit : aẓeṭṭa, iɛdilen, iɛbanen, ibernyas... ijeqduren n talaɣt, ifarisen n uyefki n testan d tɣeṭṭen am uguglu d yiɣi d wudi, izegza n tmurt am yifelfel aqerḥan d yibawen d tǧilbant. Igumma am taknisya d yiniɣman d lexrif ifuṛes d ddeffaḥ di tallit-nsen 

Aseggas-a, timecreḍt, ur telli ssebba n ukman d lemḥadra ɣef tdawsa n yemdanen. aman uɣalen ɣer tregwa di tsusmi kan.

Tarek Iftene

tutlayt-inu