Tinḍi ɣer tmetti taqbaylit

Si zik, aqbayli ixeddem s ufus-is akk ayen iwumi yesra di tudert-is tassant. D argaz neɣ d tameṭṭut. 

Tinḍi, teṭṭef amḍiq d-axatar di tmetti taqbaylit. Di tazwara, aqbayli am umaziɣ s umata, ad t-tafeḍ yettkal ɣef yiɣil-is d yiman-is. D aymi ma nenna-d fell-as d amdan ilelli, aya d ayen yellan d tidet. Ur neɣliḍ ara.

Ihi, ales aqbayli, ixeddem-d iman-is iselsa-s, ijeqduren n tenwalt, ifecka yettusexdamen di tfellaḥt, imrigen, isɣunen, allalen uẓawan... Tameṭṭut, tettrebbi, tmessel, tettellem taduḍt, tettagem-d, tẓeḍḍ iceṭṭiḍen d yibernas i yiεeyyalen n twacult-is. Tezga tbedd ɣef uxxam.

Syin, deg yiseggasen 70, yal tawacult txeddem aẓeṭṭa d wuɣud. Ur tezmireḍ ara ad tafeḍ axxam ur d-ngi acḥal d ajeqdur: icmuxen, tibaqiyin,  ibuqalen, tiqeslatin. Ayen igerzen aṭas di twaculin n Leqbayel d amεiwen d twizi i yettilin di yal amahil neɣ leqdic iweεren.

Daɣen, aqbayli, mi ara yaweḍ d argaz, ad tafeḍ yelmed akk irmad s wayes ara yessider tawacult-is. Yessen ad yexdem iman-is aṭas n tɣawsiwin i yesseqdac deg umahil n wakal d wayen nniḍen.. Ixeddem asekrez, acwari, tiqecwalin, tifelwin n usɣar, tiεekkzin, imextafen... Wid i tḥuza tẓuri, ad ten-tafeḍ, xeddmen tajewwast-nsen neɣ ṭṭbel...

Di taggara, xas beddlen wakuden, tinḍi ad teqqim d yiwen uferdis agejdan di tɣerma. Assa, acḥal n medden i yessnen acu d aẓeṭṭa, amsal,  uɣud, izḍi, tisirt neɣ atemmu! Akken yebɣu yili, amdan yessefk ad yeddu d wakud d tetrert maca ur ilaq ara ad iɣunzu ayen yebnan. Aqbayli neɣ amaziɣ amiran yezmer ad yili d atrar war ma yeǧǧa ayen ḥerzen yimezwura-nneɣ d igiman n yiseggasen aya.

Sadeq Bendali