Aseqqul n Taεrabt, talɣa ال مفعول

 Nessen d akken tutlayin akk ttemyerḍalent awalen gar-asen. Akka i teḍra ula i Tmaziɣt d Teqbaylit. Aṭas n wawalen-is i yettwawin ɣer tutlayin nniḍen d waṭas i d-tiwi seg-sent. Mi ara yili d amyag neɣ d isem i yettumazɣen, yeḍfer ilugan n tutlayt-nneɣ, ulac uɣilif. Maca mi ara d-yettwarḍel wawal, yusa-d yeqqim akken s "weεmam-is", yugi ad iserreḥ i tmagit-is, "yettcemmit" tagnit. Deg umedya, ismawen n tutlayt taεrabt, yeqqimen akken i ten-tuɣ s ال n usbadu, am: lebḥer (البحر), lehna(الهناء), lεid(العيد),   lǧennet(الجنة) neɣ s tussda n tazwara ma seg yisekkilen "iṭijanen", am: rrmel(الرمل), dderya(الذرية), ṣṣeḥ(الصح), ddunit (الدنيا). Llan daɣen yismawen n Tefransist i yegguman ad brun i umagrad "le", am: luzin (l'usine), likul (l'école), lufan (l'enfant), lmir (le maire).

Ayen nniḍen iɣef nezmer ad nesḥissef deg yireṭṭalen, i d-ikecmen tutlayt-nneɣ d ismawen d yerbiben (igelman), yeqqimen akken llan s uẓar d talɣa,  iwumi qqaren di Taεrabt "على  وزن "مفعول am:

- amerkub مركوب wissen, ayɣer mačči "urkib"!

- ameslub مسلوب wissen ayɣer mačči "uslib"!

- amengur منڨور wissen ayɣer mačči "ungir"!

- amezluḍ مزلوط wissen ayɣer mačči "uzliḍ!

- ameqful مقفول wissen ayɣer mačči "uqfil"!

- ameslux مسلوخ wissen ayɣer mačči "uslix"!

- amexluḍ مخلوط wissen ayɣer mačči "uxliḍ"

- ameclux مشلوخ wissen ayɣer mačči "uclix"

Tamawt 1:

"Tawaɣit", d akken talɣa-a tenṭeḍ ula di kra yismawen untiyen n tɣawsiwin, am:

- tameɣrust مغروسة

- tamenguct منڨوشة = منقوشة

Tamawt 2:

Ad d-smektiɣ, imyagen-a ikerdeskilen yellan ɣef talɣa "R1R2eR3", d nitni akk i yeggten di Tmaziɣt yernu tella talɣa n usuddem seg-sen d Tamaziɣt 100%, d ta: "uR1R2iR3". Ẓret-tt deg yimedyaten-a:

- ubzig si bzeg

- unciw si ncew

- ubrin si bren

- urkil si rkel

- uzlig si zleg

- ungif si ngef

- ucmit si cmet

- ufrin si fren

- urqim si rqem