Huska

"...Temmeɣ teṭṭef taruka akken ad tellem ula d nettat. Akken kan i tt-tmuss, ddeεwessu teḍra-d, tčukk izḍi deg uḍad-is. Deg yimir-n, tebbertex ɣef yiwen umeṭreḥ yellan tama-s, tunag deg yiḍes alqayan, ur d-tfaq deg yiman-is. Iḍes-nni, yuɣ akk tiɣremt. Agellid d tgellidt, akken kan kecmen ɣer tzeqqa mi d-uɣalen, wten-tt d taguni. Kra yellan din, yusa-t-id yiḍes, ur yuki ula d yiwen. Iεawdiwen, ṭṭsen deg waddayninen-nsen, iḍan di tsenbert. Itbiren, s ufella n usfel, izan, ɣef yiɣerban. Ula d timest, texsi, tgen; akanif, yeḥbes aknaf-is. Amniwel i tuɣ ijebbed-as acebbub i umanun-is imi yezgel asewwi-nnes, iserreḥ-as, yeṭṭes. Aḍu, yeḥbes asuḍu, ula d afer, ur yettemwiwil ɣef yisekla n zdat teɣremt. 

Yemɣi-d ẓẓerb n yisennanen, yezzi-as-d akk i teɣremt. Simmal yettali, yettimɣur. Yal ass, irennu armi d-iɣumm akk tiɣremt. Ur tezmireḍ ad teẓreḍ acemma, ula d asenǧaq yellan s ufella-s, yuɣal ur d-yettban ara. Taqsiḍt n Huska, telḥa, tuzzel akk di tmurt, slan-tt akk medden. Sya ɣer da, seg wakud ɣer wayeḍ, ttasen-d warraw n yigelliden, ttawḍen ɣer teɣremt. Ttaẓen ɣer ẓẓerb-nni, ttnadin ansi d wamek ara kecmen ɣer ugensu. Maca, yiwen ur yezmir ad yezri deg uɣrab-nni ahrawan, aεlayan. Isennanen-is, myuṭṭafen gar-asen am yiḍudan ufus, mcubbaken. Igeldunen ilmeẓyen, ttafen-d iman-nsen ḥeṣlen, ttuεelqen. Ulac wi izemren ad ten-id-isellek syin dɣa ttmettaten yir tamettant.

Ɛeddan yiseggasen iɣezfanen, yiwen wass, yezri mmi-s n yiwen ugellid di tmurt. Yiwen wemɣar, yeḥka-as tanfust n ẓẓerb bu isennanen dakken tella deg ugensu-s teɣremt, tella deg-s yiwet tgeldunt tuzyint, isem-is Huska, yewwi-tt yiḍes, tgen azal n 100 yiseggasen aya. Yid-s, llan daɣen, gnen: agellid d tgellidt d wayt teɣremt akken ma llan. Amɣar-nni, tuɣ yenna-as jedd-s daɣen belli ttasen-d aṭas n yigeldunen ilmeẓyen, tteεraḍen ad flun ẓẓerb-nni bu yisennanen akken ad adfen, maca ḥeṣṣlen, ttmettaten din..."

Asegzi n wawalen:

- tiɣremt: ṣṣraya (château)

- tasenbert: amraḥ (cour)

- asfel: aḥric n ufella n teɣremt (toit)

- iɣerban: leḥyuḍ (sf:aɣrab)

- agensu: daxel

- tanfust: taqsiḍt, tamacahut

- ad adfen: ad kecmen

Aḥric si "Huska", tasuqilt n Sadeq BENDALI