Abdellah Aït Oudjaoudi, d aselmad i ifuṛsen tastaɣt-ines i wakken ad yerfed imru, ad d-yini ayen i as-yellan deg wul acḥal d aseggas aya. Mmi-s n Yiεeṭṭafen, yerra-d ɣef yisteqsiyen n Menza Iεemranen, yerna yewwi-d awal ula ɣef leqdic n tεeggalt-is Ǧazia At Mnana.
Di tazwara, d anwa i d mass Abdellah?
Mass Abdellah Aït Oudjaoudi yesselmed azal n kraḍet n tmerwin d kraḍ n yiseggasen deg uɣeṛbaz amenzu. Mi iṛuḥ ɣer testaɣt, yeqdec deg ccna d yisefra.
Melmi d wamek i tebdiḍ tira?
Lliɣ ssarameɣ ad aruɣ maca llant tɣawsiwin ur yi-neǧǧi ara. Yiwet n tikkelt, lliɣ uḍneɣ (kkseɣ-d iẓi). Ihi, ẓẓleɣ kan deg wusu, syen i iyi-d-tusa tikti i wakken ad aruɣ.
Amek i yelmed mass Abdellah tira s Tmaziɣt?
Lemdeɣ iman-iw, cwiṭ cwiṭ, maca ar tura ur ssawḍeɣ ad ttekleɣ ɣef tmussni-w acku ulac am uɣerbaz. Aṭas n tɣawsiwin ur ssineɣ ara. Γas akken ttaruɣ, yal ass, d acu ara d-cerweɣ.
Ayen i tesmenyifeḍ ad taruḍ ungal, mačči d tullist neɣ d ayen nniḍen?
Zemreɣ ad aruɣ tullisin neɣ isefra, maca mačči s ufran i uriɣ ungal, yusa-d kan akka. D tikti, tuɣal d ungal; daya.
Ungal-agi, yusa-d seg yiwet n tegnit akken. Yiwwas, walaɣ yiwet n tmeṭṭut tettmetra, dɣa ssugneɣ tamacahut ger tmattart d unaẓur. Ihi, llan mḥemmalen di temẓi-nsen maca baba-s n teqcict yegguma ad yeqbel zzwaǧ-nsen. Γer taggara, aqcic-nni, yenfa iman-is ɣer tmurt n Fṛansa; dinna yuɣal d anaẓur. Ma d taqcict-nni, tjeggeḥ tudert-is alammi tuɣal tettmetra. Mi mlalen, anaẓur-nni ad tt-id-yessukkes seg tmetrit, yerna ad yuɣal ad yezweǧ yid-s.
Melmi i tḥemmleḍ ad taruḍ?
Ḥemmleɣ ad aruɣ deg yiḍ, i tsusmi.
D acu n wuguren i d-tufiḍ uqbel ad d-yeffeɣ wungal-agi-inek?
Llan aṭas. Ugur amezwaru d amek ara aruɣ s uselkim; wis sin d amek ad d-afeɣ anwa ara yesseɣtin ayen i uriɣ; wis kraḍ, tuffɣa n wungal teṭṭef aṭas n wakud. Daɣen, terra-yi tmara akken ad zzenzeɣ ungal-agi, nekkini. D leqdic iweεṛen aṭas.
Anda i zemren yimeɣṛiyen ad afen ungal-agi ''Anaẓuṛ d tmattart''?
Zemren ad t-afen di tezrigin ''El Amel '' deg Tizi Wezzu.
Amaru-nneɣ yesεa isenfaṛen wiyaḍ akka ɣer sdat?
Tidet kan, llan. Dɣa ungal-agi rriɣ-t-id ɣer Tefṛansist. Dayen, ssuliɣ-t s tira. Ssuliɣ daɣen ungal nniḍen s Tmaziɣt, azwel-is ''Yir tiwenziwin''. Tura akka, ttaruɣ ɣef tudert-iw mi lliɣ sselmadeɣ.
Neẓra d akken taεeggalt-ik d tamedyazt, ula d nettat ad d-tessiẓṛeg neɣ texḍa?
D tidet, tura azal n 600 n yisefra ɣef tudert n tmeṭṭut taqbaylit. Ma d lebɣi, a-t-an ad d-tessuffeɣ yiwen n wammud n 120 n yisefra ɣer teẓrigin ''El Amel''.
Ahat tettekka di kra n tfaskiwin n tmedyazt neɣ tessaram ad tettekki?
Uṛεad tettekka, asirem yella; daya.
Ma tzemreḍ ad d-tawiḍ i yimeɣṛiyen asefru amecṭuḥ seg wayen i tura tεeggalt-ik.
Ass n 8 deg meɣṛes
d ass agreɣlan n tmeṭṭut
Ayen n diri ncallah ad yekkes
ad tt-id-temmager tefsut
Asirem ad as-yili d amwanes
ad tebdu aseggas d amaynut
Tameṭṭut tesεa azal
trennu afud i urgaz
Tezmer ad tewwet ula d uzzal
teɣleb lḥif akked laẓ
Ma ncekkeṛ-itt wellah ar tuklal
d tafeḥlit, isem-is ifaz
Yal d taswiεt tqubel-itt
ama teḍyeq ama tewseε
Tudert meskint tmeḥḥen-itt
ɣer wani i tt-terriḍ ɣuṛ-s nnfeε
Γas ma ddunit tɣull-itt
ɣef warraw-is i tesseblaε
Llant tlawin yettarun, maca drus. Wissen ayen akka; d timetti, d ansayen?
D acu ara d-tiniḍ i wid ur neqqaṛ ara s Teqbaylit?
Qqaṛen: "Sani i tettedduḍ ay aḍaṛ? S aẓaṛ! Ihi, ilaq akk wid yeṭṭfen deg yiẓuṛan-nsen, ad ɣṛen Tamaziɣt neɣ Taqbaylit. Mačči sya mmuten fell-as yirgazen, kecmen leḥbas, ṛwan laẓ d leḥfa, sya imi ssawḍen ɣer wayen bɣan, ad nebru i ṭṭbel deg waman. Teḍra yid-i, aṭas id-iyi-d-yennan ur neqqaṛ ara s Teqbaylit, wehmeɣ aṭas, sḥassfeɣ.
Ma tzemreḍ ad tefkeḍ kra n uwellih i yimawlan iqbayliyen i wakken ad sseḥbibren ɣef Teqbaylit u ad tt-sḥemmlen i warraw-nsen.
D leqṛun aya i nettmeslay tutlayt-nneɣ. Yis-s i nennuɣ acḥal d imnekcamen. Ass-a, tutlayt-agi tekcem ɣer uɣeṛbaz. Ilaq ad nesseḥbiber fell-as am ugrud neɣ am umuḍin alamma nefka-as ifadden. Ma nugi-tt neɣ nessukkes-d i yiman-nneɣ; win i d-yessukksen i yiman-is d acu-t?
Tiɣṛi-inek i yilmeẓyen?
Send ad mmuqlen ɣer tmura nniḍen, ad mmuqlen sdat-nsen. Win ur neẓri ara ansi i d-yekka, ur yettissin ara ɣer wani i la iteddu. Ay arrac-nneɣ! Nadit ɣef yiẓuṛan-nwen, ma ulac ad aken-gezren wiyaḍ!
Awal-ik aneggaru.
Ad awen-iniɣ tanemmirt imi i iyi-tefkam tagnit ad mmeslayeɣ. Afud ameqqṛan, s teɣzi n tudert. Ar tufatt.
Menza Iεemranen
tutlayt-inu
Commentaires
Enregistrer un commentaire