Tizelɣiwin "d"

I wakken ur yettili ara urway d usexleḍ deg usemres-nsent, yessefk ad nissin inumak-nsent d wassaɣen n yal yiwet d wawalen n tefyirt. Tizelɣiwin "d", llant ukkuẓet (4): tazelɣa n tnila, tazelɣa n tilawt, tanzeɣt d tesɣunt.

 1. Tazelɣa n tnila "d":

Tazelɣa n tnila "-d", tettili d taggaɣt, nessenṭaq-itt "د", tezga tcudd ɣer umyag s tezdit, temmal aniɣer terra tigawt:

 - Yuɣal-d ɣer tmurt-is. (ɣer da)

 - Ad d-yewwet udfel! (da)

2. Tazelɣa n tilawt "d":

Tazelɣa n tilawt "d", d tazenzaɣt, tesseḍfar addad ilelli, temmal d anwa, d acu ...yellan.

 - D asemmiḍ, assa. (yella usemmiḍ)

 - Amenzu, d Masi. (win yellan d amenzu)

3. Tanzeɣt "d":

Tanzeɣt "d", d tazenzaɣt, tesselkam addad amaruz, tettegg assan ger yisem-(neɣ asenfal-is) d umyag.

- Yettruḥu ɣer uɣerbaz d Masil. (yettruḥu+Masil)

 - La tettemcawar temɣart d teslit-is. (tettemcawar + tislit-is)

4. Tasɣunt "d":

Tasɣunt "d", d tazenzaɣt, tesselkam addad amaruz daɣen, tetteqqen ger sin yismawen (neɣ isenfalen n yisem) - am tesɣunin n tɣuni.

 - Neẓra uccen d ubareɣ. (uccen+abareɣ)77

- Tamɣart d teslit, mcawarent. (tamɣart+tislit)

Tamawt 1:

- Tazelɣa n tnila d tzelɣa n tilawt, yeshel-aneɣ lḥal maḍi akken ad tent-nakez. Tamezwarut, tezga d umyag. Tis snat, ur tseεεu ara assaɣ d umyag (tseεεu-t d yisem d urbib neɣ d umqim...).

Tamawt 2:

- Tanzeɣt "d" d tesɣunt "d", ttemcabint aṭas. Di snat, nezmer ad tent-nbeddel s "akked". Amek ara neg amgired gar-asent! Tanzeɣt, tettegg assaɣ anamkan ger yisem d umyag. Tasɣunt, tettegg assaɣ anamkan ger yisem d yisem.

Tamsirt sɣur Sadaq Bendali