Yettewḥec lfil, rnu-as-d gma-s.

Ḥekkun-d γef wasmi ǧehden Yibuxtucen belli sεan lfil, qqaren-as lfil n Ubuxtuc. Yettεassa-asen lemluk nsen. Ma d lqut, γef uεrur n lεamma: ttnawalen-as yixxamen n Lǧemεa n Ssariǧ s nnuba. Ttaken-as yal ass tmanya n lgelbat n yibawen akked sin wakraren. Rnu γer waya, ikess deg tebḥirin nsen, ijeyyeḥ-itent irkelli. Mi yečča ar d yerwu, ad yeṭṭṭes sdaxel n lekremb neγ sdaxel n texsayt. Akk medden, bγan ad ccetkin fell-as acu kan uggaden akk. 

Asmi walan iεedda tilas, nnejmaεen yimeqqranen n taddart, nnan: -Yyaw ad ad nḍebber i lfil-agi n Buxtuc : lemluk nneγ d lerzaq nneγ yečča-ten akk. Imi yeqbeḥ γer-neγ, yyaw ad as-nḍebber. Ma nemtafaq γef yiwen n umeslay, ur tesεim d acu ara aγ-yexdem n ccer. Ma yiwen kan i d-ineṭqen, yezmer ad t-yewwet, ad as-yekkes aqerruy-is. Ǧawben, nnan-as akk: “Yewqem rray”.  Hedren belli ad yini yiwen deg-sen: “Anεam a Sidi sselṭan, lfil-agi inek…”, wis sin ad yernu: “Iḍurr-aγ!”, wis tlata ad ikemmel: “A wi yufan ad t-tekkseḍ”. 

Azekka-nni, ruḥen γer Sidi sselṭan Buxtuc, yenna-asen: “Acu tebγam a wladi?” Amezwaru deg-sen, yenna-as: “ Anεam a Sidi sselṭan…lfil-agi inek…” Yiwen deg yimγaren-nni ur d-iεawed ara i umeslay “lfil”, yuggad winna yebdan awal d amezwaru “lfil” ad yettwakkes uqerruy-is. Ssumen akk medden, ula d yiwen ur d-yenni yiwen n umeslay γef lfil, ḥaca netta. Yenṭeq-d Buxtuc, yenna-as: “Kemmel lheddra γef lfil”.Yenna-as :“A Sidi sselṭan, yettewḥec lfil, rnu-as-d gma-s”   Widak niḍen uggaden sselṭan. Netta d lfahem i yella : yeḥṣa d lemḍerra i ten-iḍurr lfil-nni, dγa yekkes-asen-t.

Karima Cebbaḥ

tutlayt-inu