Tadiwennit d ucennay Lḥusin Kan

Lunis Ayt Mangellat, lemmer ulac-it, 
ahat ur cennuɣ ara nekkini. 

Anwa i d Lḥusin kan ? Acu i d anamek n yisem-ik? Isem-iw n tidet d Lḥusin Ɛacur,  ma d Lhusin kan, d isem ɣ n unaẓur,  anamek-is Lhusin awḥid. Taddart-iw d tin i wumi ṣsawalen Iεellalen n Bumehni. di tɣiwant n  Ɛin Zawiya deg wasun n Draε Lmizan. Maca lasel-iw, d amεatqi. Xedmeɣ di Algerie poste.

Melmi tebdiḍ ccna? 

Segmi meẓẓiyeɣ ḥemmleɣ ad cnuɣ, ahat asmi sεiɣ 12/ 13 yiseggasen i bdiɣ cennuɣ s snitra i xedmeɣ s ufus-iw, akken akk i xeddmen yigerdan ɣ tallit-nni. Lliɣ daɣen ttɣimaɣ d wid meqqren i icennun, lemdeɣ-d ugar ɣur-sen urar s tgitart .

Acḥal n yiḍebsiyen i d-tessuffɣeḍ?

Ar tura ala yiwen i d-yeffɣen di 2017-2018. Aţas i bɣiɣ ad ten-id-ssuffɣeɣ, maca ur aɣ-tettunefk ara tegnit, tettwaḥras teswiεt mliḥ. Rnu, nekk d yiwen umdan yettsetḥin aṭas, ttuɣaleɣ di ṭṭef, d imeddukal-iw n facebook i ibedden ɣur-i, ḥersen-iyi akken ad d-ssuffɣeɣ aḍebsi-a. Nnan-iyi-d ilaq ayen tcennuḍ ad as-slen wiyad, ur tjemmeε ara kan i yiman-ik. Ilaq ad as-slen medden.

Anwa i ak-iεawnen deg umecwar-inek n ccna? .

Isefra d uẓawan d ayla-w, d nekk i ten-ixeddmen. Ma d. aεiwen siwa imeddukal-iw n facebook i ibedden ɣer tama-w s tmerniwt n wafud d usebɣes-inu.

Anta tizlit ger tezlatin-ik i εzizen fell-ak aṭas, tettmaleḍ ɣur-s?

D ayen i iweεren akken ad tferneḍ tizlit ɣef tayeḍ, ffɣent-d akk seg wul, yal yiwet tesεa azal-is. Imi d ayen ttḥulfuɣ d wayen i iyi-iqerḥen i d-qqareɣ. Maca zemreɣ ad d-ddmeɣ yiwet, d  "I zik anida telliḍ?".

Acu n yisental iɣef tcennuḍ ? 

Isental akk i icudden ɣer tudert cennuɣ fell-asen, ur sεiɣ ara afran. Werǧin xemmeɣ ad aruɣ tizlit ɣef kra, ayen d-yusan deg uqerru -iw, ad t-aruɣ. Weḥḥed-sen kan i d-ttasen yisefra.

Anwa acennay tḥemmled ad as-tesleḍ aṭas ?.

Icennayen akk n Teqbaylit, selleɣ-asen; iqdimen, imaynuten, meẓẓiy neɣ meqqer. maca win uɣur icudd wul-iw d Lunis Ayt Mangellat, Cukkeɣ limmer ulac-it netta, ur cennuɣ ara nekkini. Yis-s i bdiɣ, yis-s ara kemmleɣ, acku Lunis d yiwet n tgejdit meqqren n ccna-nneɣ. Imeslayen-is d timsirin, ttrebbin tisutwin.

Acu d uguren i d-tettmagareḍ deg ubrid-agi n ccna? 

Tudert mebla uguren ur teswi acemma, rnu ulac amdan'ur nesεi uguren.D uguren i aɣ-yeǧǧan, ad d-nessuffeɣ ayen i aɣ-iqerḥen d isefra. Nekk, ugur-iw d leḥya i ttsetḥiɣ aṭas.

Ahat tessewjadeḍ kra n usenfar akka ɣer sdat ?

S tidet aql-i akka tura deg usekles n uḍebsi wis sin, ara d-yeffɣen ur yettεeṭṭil ara ma yebɣa Rebbi. Deg-s 9 n tezlatin, wwiɣ-d  ddeqs n yisental . Akken walaɣ ad yili xir n umezwaru-nni. Ṣsarameɣ ad yili di lebɣi n wid ara as-yeslen.

Acu i d asirem-inek? 

Tudert mebla asirem ur teswi acemma, Asirem-iw ihi, di teswiεt ideg nella, ssarameɣ ad iruḥ fell-aneɣ unfafad (abeεεuc) , i d-yeɣlin ɣef umaḍal, ad yenger. Ssarameɣ tamurt, ad taf iman-is, tutlayt-nneɣ tamaziɣt ad taɣ amkan-is. Maɣef wayen yerzan tazuri, nessaram ad yili ciṭ n ubeddel; acennay, ad yaf iman-is acku tallit ideg nella tewεer mliḥ.

Acu ara d-tiniḍ ɣef ublug-nneɣ i iqedcen ɣef yedles d tutlayt ?

Tanemmirt-nwen ɣef wayen txeddmem almend n yedles d usnerni-ines. A wi yufan ad ilin aṭas aţas n wid ara d-yefken afus n tallelt akken ad nerfed tutlayt-nneɣ.  Ma ulac-aɣ, ur tettili. Ma ur telli, ula d nekkni ur nettili. Akken i as-yenna Lunis :

     Win i kem-iḥemmlen

      Fell-am isebbel rruḥ-is

      Iεebbed-ikem

      Yis-sem yesbedd lqedd-is.

Awal-ik n taggara? 

Awal-iw n taggara, tanemmirt meqqren imi iyi-terram azal, tesferḥem-iyi-d aṭas. Ssarameɣ teɣzi n leεmer i ublug tutlayt-inu.

Tadiwennit, texdem-itt F. Cebbiri.

G.M:

Ma tebɣam ad teslem i tuɣac Lhocine Kan, kecmet ɣer youtube.

https://sadbendali.blogspot.com/2020/11/acennay-lhusin-kan.html