Ad naru "i d" neɣ "id": melmi?

• Melmi i nettaru "i d-" (amqim amassaɣ + tazelɣa n tnila "-d")?
• Melmi i nettaru "-id" (tazelɣa n tnila "id"  kan)?

- Amdan ma ihedder, yessemras deg uqerru-is taseddast neɣ tasnalɣa, imi yessen tameslayt, xas ur yeɣri ara Tamaziɣt, ur tt-yettaru ara. Tafyirt d tagrumma n wawalen yezdin, myeḍfaren akken ad d-fken kra n unamek. Yal aferdis n tefyirt, ila anamek-is i yerzan kra n tekti.

- Yella yiwen ugul di tirawalt, nezga nettaf-it, nettemlili-t-id. D acu-t? Agul-a, d yir tira di tenfalit igebren tazelɣa n tnila; ladɣa ma yella umqim amassaɣ "i" deg-s. Aṭas n medden i ur as-nettḥulfu ara xas sεan awsir igerrzen di tutlayt: d iselmaden, d inelmaden isdawanen, imura... Amek ttarun? Ttarun "id", ssenṭaḍen-t d tzelɣa n tnila, ttɣillin d yiwen uferdis.  Di tilawt, taɣawsa, d ayen isehlen maaḍi. Ha-tt-a, ad tt-id-ssegziɣ di snat tneqqiḍin deg wadda:

 1. Tazelɣa n tnila, tettili d "id" mi ara tili kan teḍfer awsil n umyag usrid (deffir-s). Md: Awi-as-t-id, ɣer da . Ad as-t-id-tawiḍ, ɣer da. (amqim awsil usrid d "t")

 2. Amqim amassaɣ "i", yettaru iman-is kan, tazelɣa n tnila "-d" (mačči "id"),  tezmer ad d-tas deffir-s. ad t-id-teḍfer, war ma yenṭeḍ ɣur-s. Ad nẓer imedyaten-a, ad negzu ugar:

•  Adlis, yuɣ-it-id (da, ulac amqim amassaɣ, tazelɣa n tnila d "-id" acku teḍfer awsil usrid, ulac ugur)
•  D adlis i d-yuɣ (da, yella umassaɣ "i" + tazelɣa n tnila d "-d", mačči "-id", daymi ferqen di tira, ur nṭiḍen ara)

  Tamawt 1: da, deg unamek, amqim amassaɣ "i", azal-is d "que" n Tefransist.

•  D netta i d-yuɣen adlis. (kifkif, amassaɣ + tazelɣa n tnila "-d", ferqen di tira)

  Tamawt 2: da, deg unamek, amqim amassaɣ "i", azal-is, d "qui" n Tefransist.

Tamawt 3:

Amqim amassaɣ "i", nezmer ad t-naru s talɣa nniḍen, d "ay". I = AY.

• D adlis I d-yuɣ = D adlis AY d-yuɣ.

Annay:

Ayen i d-nenna ɣef tzelɣa n tnila "-d, -id", yerza tazelɣa n tnila "-n, in".

Ameskar: Sadaq BENDALI