Tamarut Dihya Lwiz

Isefra ufrinen i d-teǧǧa deg uẓeḍḍa inmetti FB

D tajmilt i wid d tid i tt-iḥemmlen

12/10/2013

Rfed iḍarren-im ɣef umnar n wul-iw truḥeḍ

Ruḥ qbel mi ad d-yeɣli ṭṭlam, ad yessexnunes ṣṣifa-m

Ruḥ tegluḍ s imeslayen-nni, deg wul-im leɛmer nelli

Rwel si ger wallen-iw, qbel mi ara d-yenɣel fell-am tter-iw !!

30/11/2014

Mxalafent Tirga

Tasusmi n imeslayen

Tigecrar ger iɣallen

Allaɣ yeẓẓaden deg zri

Yessefruri

Yendeh i wurfan d tirni

Yerna teggull ur s-tenni

Ur tt-terra i imeṭṭi

Teggull ar tettu

24/04/2004

Yebda-d di targit d tikti

Yuɣal d lkas d unadi

Ɣef zzhu d tiselbi

Mi yekfa kulci

Yeggra-d imeṭṭi

D ikufan nnhadi..

16/07/2014

Din din yuki-d wass

Din din yuzzel yiṭij ɣer tlemmast igenni

Din din yeɣli-d yiḍ

Din din yekfa wass

Akken iyi-d-yufa iyi-yeǧǧa

Ur d yewwi ur d yerri..

17/09/2014

Aṭas iyi-d-yenna

Aṭas i s-nniɣ

Ur s-nniɣ ayen i yebɣa

Ur iyi-d-yenni ayen bɣiɣ !!

06/12/2014

Ad kem-ǧǧeɣ di tama

Ad kem-ttuɣ cwiṭ

Ad uɣaleɣ ɣer tnafa

Ad arguɣ cwiṭ

Ad kem-waliɣ di tnafa

Akken werjin telliḍ

Ad m-d-cebbḥeɣ udem d llebsa

Ad zhuɣ yis-m cwiṭ

Qbel ad tekfu tnafa

20/04/2015

Teččeḥ teṭṭef tama

Teqqim tennuɣna

Ttnaɣen fell-as ur tuksan

Wa yemmut wa yenfa

Win mazal yeggra

Deg wannar ur yelli laman..

05/10/10/2015

Lebɣi mi d-yesteqsa

Fell-as inuda

Ẓelmeḍ yeffus ur yufa

Ula d tili n tfekka !!

15/12/2015

Targit-iw tcuba taḍṣa

Tcuba lheffa

N rrbeḥ mi ara d yesteqsi

Tettnadi lehna

Leḥmala

Anda tɛedda ad tessefruri

Ahit tikkelt-a

Ur iyi-d-qqaren ara

Tirga mxalfa !

18/12/2015

Ttnadiɣ kra n imeslayen

Limer ahat ad iyi-wansen

Deg yilem izedɣen deg-i

Kra n imeslayen

Limer ahat ad ṣeggmen

D ungal neɣ d asefru

Ad nesren i yimru !

14/01/2016

Tettgalla deg-i

Tnumi..

Iṭij mi yeɣli

Neɣ mi d-yuli

I d-yettawi

D asmekti

D acedhi

Deg wayen leɛmer nesɛi !

12/03/2016

Anda tettedduḍ ?

Ur ẓriɣ ara

Neɣ ahat ur iban ara..

D acu tettarguḍ ?

Tafrara, lehna d leḥmala

Ur tfaqeḍ ara?

Tirga mxalfa

Di tmurt ur nettargu wara

Amek ara s-geɣ ihi i wul

Yeččuren d asirem deg uzekka

Ad t-rreɣ ahat ɣer uẓekka

Ad beddleɣ ula d nekk tama

Akka i wen-yehwa

Imi d tarewla

Ulac i isehlen nnig wakka !!

20/03/2016

Tecba aggur

Iɛelqen deg igenni

Tettruḥ tettuɣal

Akken ad teţṭfeḍ d awezɣi

Tira, akken kan i s-yehwa !

30/03/2016

Ajeǧǧig n tefsut

Steqsaɣ-t nniɣ-as

Wissen ma tḥemmel-iyi

Wissen ma tefreḥ yis-i

Wissen ahat ad tzuxx yis-i

Tmurt-a, i ttawiɣ deg idammen !

22/05/2016

D ilem yimi

Yekfa imesli

D ilem ukersi

Tekfa tnumi

D ilem d tsusmi

I d-yeqqimen !

10/06/2016

Wissen ma d nekkni

Neɣ d nutni

I d-yewwin abrid yelhan

Amek akkenni

Ur aɣ-ḥemmlen

Ur nezmir ad ten-nwali

Nutni

Ḥqani

Ufan abrid n Rebbi

Ma d nekkni

Di lejhel negguni

Ur qbilen ayen nettwali

Ur nezmir s wallen-nsen ad nwali

Ɣur-neɣ lyaqin ur yelli

Kullec d asteqsi

Ula d Rebbi

Yerfed ifassen

Yeǧǧa-aɣ ad nnadi

Abrid i ɣ-iwulmen

Ihi acimi

Ur zmiren ad fehmen

D akken ur nettemcabi

Yal wa akken i iwala Rebbi

Wa deg igenni

Wayeḍ deg-s yettili

Ur awen-nekcim taɣbelt i kunwi

Deg-neɣ ur yelli

Wayen i ken-yecqan

Yal wa d abrid-is ɣer "Rebbi" !

(Inselmen d wiyaḍ)

14/06/2016

Tamurt-a

Ṣbeḥ mi d-tuki

Limer tufi

Ad tesfeḍ iḍelli

Tatut ɣur-s d asirem

Xas ljerḥ werjin yeḥli

Yal ass d asmekti

D idammen yuzzlen

D lbaṭel ihudden iḍarren !!

27/06/2016

Ziɣ mazal ur nebdi

Abrid ɣer tmusni

Abrid ɣer tlelli

Deg wiyaḍ mi ara nettwali

Amek akken yeshel kulci

Ɣur-neɣ amzun d awezɣi

Ur neẓri acimi

Nugi ad neffeɣ seg iḍelli

Tɛejb-aɣ tnumi

Tɛejb-aɣ truẓi

N wayen lɛali

Iɛejb-aɣ leɛwej deg i nettili

Nugad ad nbeddel

Akken ahat fell-aɣ ad tbeddel !!

17/07/2016

S taḍṣa d ustehzi

I iqubel ddunit-a

Deg-s ur d-yecqi

Amzun mačči deg-s i yettili

Ur yeḍmiɛ leɛlali

Ur yebɣi tiẓurin igenni

D amɛic kan i yettayal i Rebbi

D lehna ad tennerni

Amzun d amerkanti !!

(I nutni kan !)

05/01/2017

Γur-wat d s-tinim yezha

Ur t-yuɣ wara

Ur tt-mennit amkan-is

Ul-iw iteddu i leḥfa

Yeɣreq di tẓegwa

Kul aṭṭan yeddem amur-is !!

17/02/2017

Neṭṭef deg-m neckenteḍ

D aseḍmeɛ kan iwumi tessneḍ

Lebda ur t-nettaweḍ

Tleɛεbeḍ yis-neɣ tesserwateḍ

Akken i m-yehwa i txedmeḍ

Ax-tessaliḍ neɣ ax-tessadreḍ

Nxeggel ɣer yixef-im tɛelmeḍ

Yes-neɣ ziɣ tetturareḍ

A ddunit tamcumt !

10/06/2017

Wissen ma d nekkni

Neɣ d nutni

I d-yewwin abrid yelhan

Amek akkenni

Ur aɣ-ḥemmlen

Ur nezmir ad nnwali

Nutni

Ḥqani

Ufan abrid n Rebbi

Ma d nekkni

Di lejhel negguni

Ur qbilen ayen nettwali

Ur nezmir s wallen-nsen ad nwali

Ɣur-neɣ lyaqin ur yelli

Kullec d asteqsi

Ula d Rebbi

Yerfed ifassen

Yeǧǧa-aɣ ad nnadi

Abrid i ɣ-iwulmen

Ihi acimi

Ur zmiren ad fehmen

D akken ur nettemcabi

Yal wa akken i iwala Rebbi

Wa deg igenni

Wayeḍ deg-s yettili

Ur w-nekcim taɣbelt i kunwi

Deg-neɣ ur yelli

Wayen i ken-yecqan

Yal wa d abrid-is ɣer "Rebbi" !

(Inselmen d wiyaḍ)

Tajmilt

I wid iyi-iḥemmlen

Tanemmirt-nwen

Yes-wen i tt-demmireɣ ussan

Ad ken-yeḥrez Rebbi seg iɣeblan

Ass-n mi ara d-testeqsi

Lmut ɣer ɣur-i

Ɣur-wat ad sleɣ i ymeṭṭi

Akken yebɣu yili

I d-sɛeddaɣ gar-awen

Ama d lferḥ neɣ d leḥzen

Tellam akk yid-i

Tefkam-iyi-d afud lɛali

Mi akken ruḥeɣ dayen

Get abrid i tmeɣra

Nadit-d taḍṣa

Int-as dayen i tebɣa

Akken ad tetthenni anda tella...

27/06/2017