Ismawen irmeskilen n waddad

Irmeskilen n waddad, d ismawen ijenṭaḍen, i d-yekkan si tutlayin tiberraniyin, ur zmiren ara ad beddlen, anida bɣun zgen-d di tefyirt. Xas akken, aṭas seg-sen beddun s teɣri, ur ten-tettḥaz temsertit ur ten-yettḥaz warruz neɣ ubeddel n ususru ulamma d afessas. Acuɣer? Acku tiɣri n tazwara mačči d tin n umalay i yettwassnen di tutlayt-nneɣ, Tamaziɣt. Ha-ten-a kra, seg-sen:

• Arminya/Arminya
• Irlanda/Irlanda
• Usetralya/Usetralya
• Kurya/Kurya
• Gamebya/Gamebya
• Hunduras/Hunduras.

A/A: 

• Amestirdam, tecbeḥ. Tecbeḥ Amestirdam.
• Alaska, deg-s asemmiḍ. D asemmiḍ di Alaska.

I/I:

• Izmir, d tamdint. Yerza ɣer Izmir.
• Iran, d tamurt. Yuɣal-d si Iran.

U/U:

• Urdun, d tagelda. Ḥusin, d agellid n Urdun.
• Usetralya, d amenḍaw. D amenḍaw Usetralya.

Tamawt:

Di tesleḍt n wawalen n tefyar, tawuri n yismawen-a, d armeskil n waddad.

Awelleh:

Addad d "lḥala" neɣ tagnit ideg yella yisem (neɣ usenfal-is) di tefyirt. Aṭas i t-yettɣillin d talɣa. S wakken nniḍen, addad d tagnit i as-tettmuddu twuri i yisem.

Deg umedya, mi ara tili twuri-s d asemmad usrid, addad-is yettili d ilelli: Uɣeɣ-d tamment (tamment d isem yellan deg waddad ilelli acku d asemmad usrid).

- Mi ara tili twuri n yisem d asemmad arusrid, addad-is yettili d amaruz: Yerra aman i tamment (da, tamment d isem yellan deg waddad amruz acku d asemmad arusrid). Yeqqim-d, tura yisem ma ibeddel neɣ ala deg waddad amaruz. Ta, d tamsalt nniḍen: llan yismawen ttbeddilen, llan wiyeḍ ur zmiren ara ad beddlen/talɣa-nsen kan ur ten-nettaǧǧa ara ad beddlen).

Sadaq Bendali

https://sadbendali.blogspot.com/2020/11/ismawen-irmeskilen-n-waddad.html