Tamnaḍt n Waṭlas Ablidi d nettat ay d tamnaḍt tamaziɣwalt ay d-iqerben akk ɣer Lezzayer Tamaneɣt, ula ma, amur ameqqran seg yimaziɣwalen n temdint n Lezzayer tizert-nsen (origine) seg Tmurt n Leqbayel. Tantala n Waṭlas Ablidi ttinin-as yimsiwlen-nnes "tacelḥit", "taqbaylit" neɣ "haqbaylit" (imi ɣer kra seg-sen, [t] azenzaɣ deg tazwara n wawal yettwanṭaq d [h] ula ma tarat-a [phénomène] tettwassen ugar ɣer deg tentala tacenwit yettusawalen deg temnaḍt n Ḍḍahra).
Tantala n Waṭlas Ablidi d yiwet seg tentaliwin timaziɣin iqerben akk ɣer tantala taqbaylit yernu zemren ad tt-gzun Yiqbayliyen war ugur. Tantala-a teqreb ugar ɣer tmeslayt (parler) n utaram [ouest] n Tmurt n Leqbayel (Tadmayt, Draε Lmizan, Tizi Ɣennif, Ayt Ɛemṛan, Yesser) imi snat-a n tsenfal [variantes] cerkent aṭas n umawal d waṭas n ṣṣifat tsebgan [caractéristiques] tisenmeslanin.
Iqbayliyen n Bumerdas, mi ara slen i yimaziɣwalen iblidiyen ssawalen s tcelḥit, ttinin-d dakken wi ssawalen am yimɣaren n temnaḍt n Bumerdas. Deg tidet, deg tneyyirt (continuum) n tentaliwin timaziɣin n Tefriqt n Ugafa, tacelḥit n Waṭlas Ablidi d "tileggit" (pont) gar tantala taqbaylit d tentala tacenwit n yidraren n Ḍḍahra (Tipaza, Ɛin Ddefla, Cclef). Ɣef waya ara tt-naf teqreb ɣer Teqbaylit am wakken ay teqreb ɣer tantala n Ḍḍahra.
Drusit yinadiyen isdawanen ɣef tantala-a, d acu kan,, deg yiseggasen-a ineggura, Mass Samir El Arifi yelha-d s ulqaḍ n kra n wayen yeqqnen ɣer tantala-a, ama d amawal, ama d asagem (corpus), ama d ismawen imaziɣen n yideggen n temnaḍt-nni yernu yessuffeɣ-d amawal n tentala-a deg 2016. Wa d yiwen seg yiklasen ay d-iga n yiwen n umɣar yessawalen s tentala n Waṭlas Ablidi:
https://www.youtube.com/watch?v=_Y3JNvTVf_0
Wa d asebter n Facebook n tentala n Waṭlas Ablidi:
https://www.facebook.com/amazighs.atlas.blideen/
Ɛumar Mufuq
tutlayt-inu
Tanemmirt ɣef ledic nwen, afud igerrzen, tajmilt i kenwi.
RépondreSupprimerAql-aɣ la ntegg ayen iwumi nezmer. Nessaram akken yal win yesεan kra n tmussni di Tmaziɣt s umata, ad yefk seg-s i wid i tt-yeffuden.
Supprimer