Tafranziɣt d Tmaεrabt!
Mi ara tselleḍ i yiselmaden n Tmaziɣt di youtube neɣ deg yiger amiḍan s umata. Ladɣa ma "begsen-d" ɣer usenfali d usnerni n tutlayt. Din din ad k-id-yas uḥulfu n usirem, ad tebdu ad k-tkeccem tumert. Ad as-tiniḍ meqqar, a-tt-a tekker-d tsuta ara ibedden ɣef tutlayt-nneɣ, ad tt-tessiɣ di yal taɣult n tmussni.
Ahat ayɣer ala, ad tecbu tutlayin nniḍen, ad tuɣal am nitenti! Iban kan nesra: ad nettwali ilmeẓyen d telmeẓyin-nneɣ "at tmussni" yeɣran di tesdawit ssnen ad ssmersen allalen itraren, ad qedcen ad ḥerzen agerruj i aɣ-d-ǧǧan yimezwura.
Agerruj-a d tutlayt; ma ulac-itt, ulac-aneɣ; ad yenger yidles, ad ternu tɣerma. Icenga, mačči yiwen, zgan gezzmen-aɣ ifadden akken ad rnun ad glun s tmagit d wayen i aɣ-d-yeqqimen d iseɣ d wakal.
UGUR, tikwal mi ara tefkeḍ mliḥ tameẓẓuɣt i "tmeslayt" n at youtube-agi d tbidyutin i d-yettusenkaden "ZEƐMA" i usmatu n uselmed n Tmaziɣt, ad ak-teṭṭef tergagit ma telliḍ seg wid yeṭṭfen di tnaṣlit. Ahat, yezmer ad ak-yeɣli usirem i d-ilulen tineggura-a.
Amek ala, mi ara d-ibedden uselmad neɣ amaru zdat wallen-ik, la ak-d-yettmeslay deg utilibizyun neɣ di tbidyut; ad ihedder (tikwal) am wakken di lqehwa n taddart neɣ (ma d tameṭṭut) di tḥanut n yiselsa n yigerdan! D TAWAΓIT!
Ger tefyirt d tayeḍ, ad tesleḍ: normalement, aprés, puisque, jamais, ça va, bien, allez, oui, non, en principe, obligé, il faut... Ma tedda akka, ugadeɣ ad tuɣal tutlayt-nneɣ d TAKRIYULT n Tmazɣa.
Ma d wiyaḍ, acḥal ḥemmlen ad leqqmen i tefyar s wawalen yecban: lukan, mbeεd, lmuhim, ṣṣut, lweḥda, ttlata, ssebt, lḥedd...!! Ad as-niniɣ: yak tella ddajǧa! Iwumi tayeḍ?! D tawaɣit!
Sadaq Bendali
https://sadbendali.blogspot.com/2020/11/tawait-d-tamuli.html
Commentaires
Enregistrer un commentaire