Tuqqna n lḥenni di Tfuɣalt

Tafuɣalt,  d yiwet si tudrin n Leqbayel, n Yiflisen n Umellil. D yiwet n taddart meqqren i d-yezgan di tɣiwant n Wayt Yeḥya Musa, deg wasun n Draε Lmizan deg waɣir n Tizi Uzzu. Seg-s i d-tewwi tmeskart Ɛelǧeyya BUHAR, tugna n yiwen seg wansayen yettusemrasen ar assa. Ansay-a, d tuqqna n lḥenni. Deg umagrad-a, ad d-yili wawal ɣef lḥenni n teslit.

Imezwura-nneɣ, xas ma ɣaben maca ǧǧan-aɣ-d ansayen, llan wid i iruḥen di tatut, llan wiyeḍ mazal neṭṭef deg-sen neḥrez-iten, tasuta tettaǧǧa-ten-d i tayeḍ, gar wansayen-agi ad d-bedreɣ tuqqna n lḥenni ama i yisli, tislit, neɣ i umeḍhar.

Ma hedreɣ-d ɣef tuqqna n lḥenni i teslit d ayen mazal nxeddem-it ar assa acku d ayen yesεan azal d unamek meqqren ama d tiɣawsiwin i nesseqdac neɣ imeslayen i d-neqqar. Ihi tuqqna n lḥenni n teslit tettili-d ɣef wudem n lefjer.  

D ayen yesfilliten i tafat akked zzher yukin, ad d-teqqim teslit gar twacult-is ad d-qerrbent temɣarin i as-yettilin d yemma-s Di tazwara, ad taɣ allalen ara ad ssmersent rrsen ɣef tgida. Lmeṣbeḥ, rsent deg-s snat n tcemmuεin; taqessult, deg-s rsent tmellalin: snat neɣ rebεa akked rrbeε n lfeṭṭa, dayen yesfilliten i dderya .

Tabuqalt deg-s ad ilin waman xelḍen d waman n zzher iwakken tislit ad tesεu zzhar deg uxxam-is amaynut, syen ad tekker tin ara yeslexsen lḥenni, imiren ad bdunt ccekran neɣ tibuɣarin yiwet ad d-thedder tiyeḍ ad d-ttalsent. 

Syen ad d-qerrbent tid ad as imudden tawsa d idrimen ara srusunt di ṭṭeq. Tibuɣarin mxallafent si temnaḍt ɣer tayeḍ maca yiwi-d ad d-cekkrent tislit baba-s, yemma-s, atmaten-is d yessetma-s. Ger wayen qqarent tlawin:

Awi-d lḥenni tabaqit tirad

Ad teqqen-it teslit yelli-s n wayrad

Awi-d lḥenni di tbaqit n nnḥas

Ad teqqen-it teslit yelli-s n uɣilas

   Ṭṭfeɣ lmeṣbaḥ deg ufus ayeffus

   Udreɣ timizar ideg ǧǧuǧǧgen leɣrus

   Kemmini a tislit am ssaεa deg ufus

   Ṭṭfeɣ lmeṣbaḥ deg ufus azelmaḍ

   Udreɣ timizar yeǧǧǧuǧgen am lefnar

   Kemmini a tislit d iṭij mi ara d-yenqer

A lḥenni ḥninen yegman di tili

Ad teqqen-it teslit Rebbi ad tt-ihenni

A lḥenni ḥninen yegman ger nnwar

Ad teqqen-it teslit s teɣzi n leεmer

Lḥenni ḥninen yersa ɣef tgertilt

A lal n tmeɣra cεel-as-d taftilt

    A ttejra yerran tili

    Afer-im ur iɣelli

    Axxam n baba-m ttu-t

    Axxam n wergaz-im ḥyu-t

    Ur ttru a tasekkurt

    Ilewsan-im ɣef tebburt

Akka yal yiwet, ad d-tini ayen tessen, ma d taqessult-nni ad tt-tawi teslit s axxam-is mi d ass wis krad ad tessired ɣer tara n waḍil neɣ aseklu yettarwen iwakken ad tefti wa ad tesεu dderya ma d timellalin-nni ad tent-tesseww d tuftiyin ad tent-tefreq i yigerdan.

Ɛelǧeyya Buhar

tutlayt-inu