Alqaḍ n uzemmur

Azemmur, d agerruj i aɣ-d-ǧǧan lejdud-nneɣ, azal-is meqqer deg useddu n tudert-nneɣ n yal ass. 

Melmi d wamek d-yettili ulqaḍ n uzemmur?

Beddun medden azemmur di taggara n ḥertadem, ticki yebda yettuɣal d aberkan. Ad ruḥen qbel ad sfeqden azemmur ma yurew, ad fersen tizemrin, ad asent-kksen inijjel neɣ tiεfert ma tezzi-d i tzemmurt. 

Mi d-yewwed lawan n ulqad, imelqaḍen ttḥirin ad d-jemεen rrezq-nsen, ad beddlen lecɣal. Xas akken yettili εeyyu d leεtab di tallit n uzemmur, yettili daɣen uqesser d unecraḥ, tukksa n lxiq d umerreḥ di tẓegwa d yiεerqab.

Mi ara ffɣen yimelqaḍen seg uxxam, yal wa acu yettawi yid-s ; wa d amextaf, wayeḍ d tagelzimt neɣ taqabact...wa d tagella ara ččen dinna, s tuget imesdurat ḥemmlen ad awin seksu, iniɣman, latay neɣ ciṭ n lqahwa. Di teẓgi, ayen tewwiḍ ẓid yerna yettili laẓ ...

Mi wwḍen yimelqaḍen ɣer yiger, ad bḍun gar-asen amahil ; win i iceṭren ad yali ɣef tzemmurt, wid meẓẓiyen d wid meqqren ad leqḍen di lqaεa. Ma d win yessnen afras, ad yefres tazemmurt, ad as-yekkes ifurkan ara tt-iḍurren, wid i as-yettekksen lǧehd neɣ wid yerran d asawen ...

Lewhi n 12:30 ad d-zzin d agraw ɣer yimekli d-ḥman ɣef tmes i ceεlen. Ma wwin latay ad tessegrin, win yesεan taɣellayt igellu s lqahwa isewway-itt din. Mi fukken učči, ad uɣalen srid ɣer ulqaḍ, ulac asgunfu. Ad kemmlen amahil-nsen s lḥir uqbel ad yader yiṭij.

Tameddit telḥeq-d, asemmiḍ yebda-d d lawan n tuɣalin s axxam, win yesεan zzayla ad yuɣal d afessas, ma d win ur nesεi ad iεebbi azemmur ɣef uzagur-is neɣ ɣef tuyat-is. Ad t-yawi srid ɣef lemεinesra, ad t-yesmir ɣer uεric-is, ad yettmuqul deg-s acḥal mazal ad yeččar.

Ticki wwḍen yimelqaḍen s axxam, εeyyu d tisfi, tidi .. maca mi d-mmektan lɣella ara d-awin, ad asen-d-tuɣal tezmert, ul-nsen ad yefreḥ.

Tiwizi d llsas n tudert di tmurt n Leqbayel.

Di tallit n uzemmur, imesdurar ttemεawanen gar-asen, wa ur yettaǧǧa wayeḍ, tiṭ n wa ɣef wa akken qqaren . Win yesεan aṭas n uzemmur yettawi yid-s tiwizi, amma i ulqaḍ, amma i uzway. Zik, lɣella tella aṭas, imdanen d tamurt ay d ccɣel-nsen . Ulac tawacult i ileqḍen weḥd-s, ttemεawanent gar-asen akken ad kfunt zik.

Ass n twizi d tameɣra, bab n wayla ayen akk yesεa ad t-yawi i yiwiziwen, ad ten-iεuzz. Ma yejmeε acedluḥ (lexliε) ad t-id-yeddem,  win i izemren i uksum neɣ ayaziḍ ad t-id-yaɣ. Win ur nesεi, ad yawi ayen fessusen fell-as ; seksu s yibawen (leɣmud) neɣ seksu s lḥemmez.  Mi ara tili twizi ttilin yicewwiqen, zehhun iman-nsen, ttgen-d lḥir i ulqaḍ. Wigi d kra seg-sen :

      A iwiziwen

      Rebbi ad aken-iεiwen

      Kemmlet akka

      Tirni d asawen

       A iwiziwen

       A at uqendur

       Kemmlet-aɣ tirni

       Akka ar ṭṭhur

       A iwiziwen

       A ay uḥayek

       Kemmlet -aɣ tirni

       Akka ar yimidek

       

       Ad nelqeḍ azemmur

       Ad nesser aεemmur

       Tajmilt i Rebbi

        I aɣ-igan amur

        Azerzur urqim

        Ers-d ad neqqim

        Taṭuṭaḥt tezweǧ

         Tameqqrant teqqim

          

          A Lbaca Weεli

          Aqerru n yisɣi

          Iḥemmel seksu

          Mi ara as-yernu iɣi

          A lbaca Weεli

          A bu yedmaren

          Iḥemmel seksun

          Ma llan yibawen.

Seg uεeqqa n uzemmur ɣer zzit yeṣfan

Mi ara yawi bab n wayla azemmur-is ɣer lemεinesra, bab n tsirt ad t-iεemmer ɣer yiɣuraf syin ad t-rren ɣer tesnatin, ad smiren aman yeḥman fell-as, ad d-teffeɣ zzit ad d-teεzel ɣef umureǧ d legric. Aṭas n lesnaf n zzit i yellan:

- Zzit n uḥeccad i d-yekkan seg useklu n uḥeccad.

- Zzit ur kkin waman (zzit n uɣaref ), telha mliḥ d ddwa.

- Zzit i nessexdam i wučči d tin yesεan aman. 

Ula d azemmur aṭas n lesnaf i yesεa ; lǧerrazi, acamlal, aḥerri d uzebli. Tazemmurt, nnfeε-is meqqer, ifer-is d ddwa, asɣar-is i lḥamu. Ma d zzit-is tugar-itent akk ; učči, d ddwa, aṭas n twaculin i yeddren yis-s. 

Ihi, tewwi-d fell-aɣ s tsuta n wass-a, ad nesseḥbiber fell-as, ad tt-nefres, ad tt-nenqec ... ad tt-neḥyu akken i aɣ-teḥya

Urant-t:

- Lagil Lina

- Ureḥmun Lina

- Ɛemmam Tiziri

D tinelmadin n useggas wis 3, deg:

Uɣerbaz alemmas Unar Muḥemmed - Mεatqa

tutlayt-inu

https://sadbendali.blogspot.com/2020/12/azemmur.html