Tadiwennit d Ḥasiba Xerbuc, taselmadt n Tmaziɣt di Hibey

Aselmed n Tmaziɣt di tesdawit tacinwat, d tilawt.

Massa Xerbuc d Tanelmadt deg uswir n doctorat. D tamnadit deg taɣult n tesnalmudt n Tmaziɣt deg unarem n unadi LAILEMM n tesdawit n Bgayet. Tewwi-d agerdas n Bak deg useggas n 2008. Teɣra deg tesdawit n Ɛebraḥman Mira i d-yezgan deg temnaḍt n Bgayet anda i tettkemmil tazrawt n uduktura ass-a. 

M. Ḥasiba Xerbuc, d tin i iḥemmlen ad d-tadder tutlayt tamaziɣt yal tikkelt ideg ara as-tettunefk tegnit. Tefka isaragen deg azal n 8 n temliliyin tussnanin gar tid yellan d tiɣelnawin akked tid yellan d tigreɣlanin. Tura 5 n yimagraden ussnanen. 3 ffɣen-d deg tesɣunin tussnanin tizzayriyin. 2 tessufeɣ-iten-id deg tesɣunin tussnanin tiberraniyin.  

Deg wussan yezrin, newwi-d awal d Tlelli Bellal, tamdakkelt-is deg uselmed n Tmaziɣt di tesdawit n Hibey - Cinwa; assa d nettat i d-yerran ɣef yisteqsiyen n S.Bendali di tdiwennit-a taɣezzfant timgerrezt.

D acu d amahil-im? 

D aselmed d unadi ussnan ɣef wayen akk yerzan tutlayt akked taɣult n tesnalmudt n Tmaziɣt.

Mmeslay-aɣ-d cwiṭ ɣef tesdawit tacinwat ideg tesselmaded Tamaziɣt. 

Tasdawit ideg sselmadeɣ tezga-d deg temnaḍt n Shijiazhuang. D yiwet gar tesdawiyin i yettwassnen s waṭas deg tmurt n Cinwa. Teldi tiwwura-ines i yinelmaden deg useggas n 1998. Tettwassen s uselmed n tutlayin tiberraniyin. 75 n tutlayin i yettuselmaden deg-s. 10 n tutlayin d tmezzugin (langues de spécialités) ma d 65 n tutlayin-nniḍen d ilmuden s tnefrunin (langues options) gar-asent ad d-bedreɣ Tamaziɣt. 

Melmi tebdiḍ aselmed akked tesdawit n Hibey? 

Bdiɣ aselmed deg tesdawit n Hibey akken kan i yedba useggas asdawan 2020/2021 deg wayyur n ctember.

Ini-aneɣ-d amek tebdiḍ deg-s.

Ass amezwaru, xedmeɣ-asen i yinelmaden aktazal amnadan d iluɣma kan  (évaluation diagnostique) akken ad ẓreɣ anda yewweḍ uswir-nsen akked tzemmar-nsen (ayen i ssnen d wayen ideg xussen). Syin akkin, bdiɣ timsirin.

Melmi yebda uselmed n Tmaziɣt di tesdawit-a? 

Aselmed n Tmaziɣt yebda deg tesdawit n Hibey deg useggas n 2018. 

D acu n yiswiren i tesselmadeḍ? 

Selmadeɣ sin yiswiren; Aseggas wis sin (L2) akked useggas wis krad (L3). 

Acḥal n waggayen i tesεiḍ d umḍan n yinelmaden i yellan di yal yiwen? 

Ɣur-i sin yigrawen: L2 akked L3. Yal yiwen yegber 53 yinelmaden.  

Acḥal n yisragen (swayeε) i txeddmeḍ yid-sen deg wass? 

4 wussan xeddmeɣ 5 yisragen, yiwen wass sɛiɣ 4 yisragen. Ihi sεiɣ 22 yisragen i yimalas.

Tallit n yikayaden, tewweḍ-d, amek i asen-ssewjaden yinelmaden deg unnar? 

Akayad n Tmaziɣt d win ara d-yilin ass n 28 Dujember 2020. Inelmaden, kukran cwiṭ acku ur ẓrin ara amek ara d-ilin yisteqsiyen. Yerna uɛad ssinen  tarrayt-iw. 

Ɣef waya, xedmeɣ-asen timsirin n usmekti akked yiluɣma. Skefleɣ-asen-d akk ayen i ɣran segmi i bdan lemmden Tamaziɣt iwakken ad d-mmektin ayen i ttun, rniɣ leqḍeɣ-d akk cwiṭ cwiṭ deg wayen i ɣran ɣur-i. 

Inelmaden, yeɛjeb-asen lḥal s waṭas imi i asen-xedmeɣ timsirin n usmekti,  xedmen akk iluɣma i asen-fkiɣ akken daɣen i d-ttaken isteqsiyen yal tikkelt. Seknen-iyi-d dakken bɣan ad xedmen akken iwata deg ukayad. 

Ssegzi-d i yimeɣriyen amek i tḍerru tegzemt n uselmed? Kemm, deg Uqbu di Tmurt n Leqbayel, inelmaden-im di temdint n Hibey di Cinwa!

Ɣas akken sselmadeɣ ɣef umeccaq maca tamsirt tettili-d amzun deg yiwet n tneɣrit i nella. Inelmaden ttwalin-iyi-d, nekk daɣen ttwaliɣ-ten. Ihi, assaɣ gar-aneɣ, yettili-d s wudem usrid. Iwakken ur nesruḥuy ara akud, send ad tebdu temsirt s 5 tedqiqin, ttheyyiɣ-d allal  s wacu ara xedmeɣ: ad d-ldiɣ asnas n Dingtalk s wacu i sselmadeɣ. Ad asen-ceyyɛeɣ izen i yinelmaden, d awal “Azul”, ad iyi-d-rren nutni daɣen s wazul. Syin akkin ad asen-ssiwleɣ s tbidyut, ad d-kecmen akken ma llan ɣer tbidyut-nni. Ad nebdu imaren tamsirt.

Amek i izerri ukayad deg unnar? Amek i d-yettili useɣti-nnes, inelmaden dihin, taselmadt da? 

Akken i d-nniɣ yakan akayad ad yili ass n 28 Dujambir, swejdeɣ-d isental n  ukayad i yinelmaden-iw. Akayad, ad yezri deg tesdawit n Cinwa akken iwata. Mi ara fakken asɛeddi, tadbelt ad aɣ-d-tazen tiwlafin n tfertin n yinelmaden iwakken ad tent-nesseɣti.   

Teṭṭfeḍ kra n yinelmaden i yettheyyin taggara n turagt, acḥal yid-sen? Amek i d-yettili waya? 

Ihi, ɣur-i 8 n yinelmaden i yessewjaden tizrawin n taggara n turagt (Licence). Leqdic yid-sen, yettili-d ɣef umeccaq s wallal n Wechat. Ass amezwaru, nemlal deg yiwen ugraw i asen-d-snulfaɣ i nutni kan. Fkiɣ-asen tagnit akken yal yiwen ad d-yemmeslay ɣef usentel iɣef yebɣa ad yexdem tazrawt. 

Wid i ifernen isental iwatan wellheɣ-ten akken ad kemmlen amahil-nsen. Ma d wid walaɣ ur watan ara  yisental-nsen, ḍelbeɣ-asen ad ten-beddlen s wiyeḍ. Llan daɣen wid i wumi summreɣ isental.  Syin ɣer-s heyyan-d ineqqisen n tazwara (les rapports d’ouverture), yal tikkelt, tceyyiɛen-iyi-d imahilen-nsen nekk imaren tɛawaneɣ-ten ama s yiwellihen ama s useɣti.

D acu unagraw n uselmed i yimerrsen di tesdawit tacinwat? D win n "LMD" neɣ d tuddsa nniḍen? 

Anagraw-n uselmed di tesdawit n Hebei d win n Licence (4 sgs) akken iyi-d-yenna unemhal n tesdawit;  sya ɣer sdat ad d-rnun win d la maitrise.

Amek i d tamuɣli n yinelmaden icinwaten ɣef Lezzayer? 

Icinwaten sɛan tamuɣli igerrzen ɣef Tmurt n Lezzayer. Ferḥen s waṭas imi sɛan tiselmadin tizzayriyin.

Ahat yella wacu ssnen ɣef Tmurt n Leqbayel d Yimaziɣen s umata! 

Ur ssinen ara aṭas ɣef Tmurt n Leqbayel, maca bɣan ad tt-issinen u ad issinen idles n Tmazɣa. Ɣef waya, yal tikkelt ggareɣ-asen-d iḍrisen i icudden akka ɣer yidles amaziɣ. Akken daɣen i asen-mmaleɣ kra n wansayen n Tmurt n Leqbayel. 

Assa, timura d yigduden, ttemsazzalen di yal taɣult. D acu i d abrid iwatan ad t-naɣ akken ad d-nḥelli kra gar-asen? Ladɣa i tutlayt-nnen d tɣerma-nneɣ. 

Abrid iwatan i d-yewwi ad t-neḍfer iwakken ad d-nḥelli kra gar tmura yuẓan ɣer sdat d abrid n tussna. Ilaq ad ilin leqdicat ussnanen igreɣlanen ɣef tutlayt d yidles amaziɣ  . Ad ilin fell-as inadiyen ilqayanen. Yewwi-d ad tt-id-neggar yal tikkelt ara d-ilint akka temliliyin tussnanin ladɣa tiberraniyin iwakken ad tt-issinen deg berra. Akken i qqaren at zik: “ffeɣ ɣer berra ad timɣureḍ”. Ihi, ula d tutlayt, ssuffeɣ-itt ɣer berra ad timɣur ad tennerni. 

D acu i ilaqen (i tessarameḍ) ad t-xedmen Yimaziɣen? 

Sarameɣ ur tettun ara belli d Imaziɣen i llan. Dɣa yewwi-d ad ṭṭfen deg tjaddit-nsen. Ad fken azal i tutlayt akked yidles amaziɣ. Ad snernin deg wazal n Tmaziɣt akked Tmazɣa. Ad d-seknen tamurt-nneɣ s wudem igerrzen.  

Kemm - massa Xerbuc d temdakkelt-im taselmadt massa Bellal, tesnemmir-iken aṭas "tutlayt-inu". La awent-teqqar tabɣest timgerrezt. 

Tanemmirt tameqqrant i “tutlayt-inu”, ssarameɣ-as teɣzi n leɛmer d wafud igerrzen. Aḥuddu aḥunnu fell-awen.

D acu ara d-tiniḍ ɣef ublug-nneɣ ? D acu iwatan akken ad yaẓ ugar ɣer zdat? 

Ablug-nwen, yelha s waṭas, d win yessawalen tidet, yessawaḍ tussna akked umaynut i yimeɣriyen ladɣa deg wayen yerzan Tamaziɣt akked yidles-is. D aɣbalu  ideg yezmer yimeɣri ad d-yagem aṭas n wayen yelhan. D ayen ara t-yesselḥun ɣer sdat. 

Sarameɣ ad neffeɣ seg tezɣent-agi n tezmert i d-yuɣen akka amaḍal. Ad tili talwit, tagmat gar yimdanen. Lḥanna deg ulawen. Ad yali wazal n tmurt-nneɣ.  Teɣzi n leɛmer i yimawlan-iw akked twacult-iw, tajmilt tameqqrant i gma ɛzizen, yezga ɣer yidis-iw. Ad sellmeɣ ɣef leḥbab-iw akken ma llan(t) anda ma llan(t), Ad snemmreɣ s waṭas iselmaden-iw.

Tadiwennit, yexdem-itt:

Sadaq Bendali

https://sadbendali.blogspot.com/2020/12/tadiwennit-d-hasiba-xerbuc-taselmadt-n.html