Ger tejmilin i as-yuɣalen i Yidir deffir tmettant-is, aḍris n Ɛli Bexti deg ugraw FB "tunt-inu", yufrar ɣef wiyaḍ. Ta, d tamuɣli-nneɣ. Ameskar, yefren-d, yelqeḍ-d imeslayen seg yifyar n tezlatin n unaẓur aqbayli, azzayri, amaziɣ; yessemlal, yessemsawi deg-sen armi d yebna tajmilt yecban tasrit. Izen n Ɛli Bexti dakken Idir, xas temmut tfekka-s, netta yedder, ad yedder. D tigemmi i d-yeǧǧa i tsutwin s wayes ara yedder, ara yettwabdar. Abrid i yuɣ di tudert-is ahat d winna ara yaɣ ugdud-is i lebda.
Yemmut Ḥamid, yedder Yidir
Baba inuba, iruḥ, yelli Ɣriba teggujel, yeǧǧa-tt uzwaw i ndel s umendil awraɣ.
Ay nkukra d aɣbel n lmut, assa teẓẓel-d afus-is. Limmer d aεdaw i t-yenɣan, nekkni yid-s, ad nemseglu, imi d lmut i t-yewwin, ad nerfed isem-is, xir ma nru. Nekker sbeḥ, nufa-d liḥala tluɣ, timɣarin, tislatin, tinuḍin d tlewsatin steqsayent ma d tidet ayen yeḍran. D tidet adrar-inu, assa yeḥzen, tawaract n wudi n ssendu iseg i d-nemceḥ tezder di lqaε n teccuyt, tiziri yeḍwan, iɣumm-itt usigna.
Muqleɣ taddart n At Yanni, Yidir walaɣ udem-is. Cfiɣ amzun d iḍelli mi yebda ccna, Mεemmri, yenǧer abrid i tira, Yidir ikemmel-as s ccna. Yefka azal i wawal, yecna ɣef ugdud, tilelli, lḥerma, tadukli, lefhama. Iwessa-aɣ ɣef tegmat, yezzuzen-aɣ s tmacahut n tsekkurt. Isem-is inuda leεrac, yerna timdinin. Anta tutlayt i s wayes i zemreɣ ad ruɣ fell-ak ass-a? Taglizit, Tarumit neɣ Tamarikanit? Ala ur teεriq ara teɣribt-iw, ad ruɣ kan s Teqbaylit. Ttxil-m a lmut ur t-ttɣeyyir, yesbur tacḍaḍt n lejdud.
Ḥamid yemmut, Yidir mazal ad yidir gar-aneɣ. Sgunfu di talwit, xas teǧǧiḍ-aɣ, teǧǧiḍ-aɣ-d.
Ɛli Bexti
tutlayt-inu
https://sadbendali.blogspot.com/2020/12/tajmilt-i-yidir.html?m=1
Commentaires
Enregistrer un commentaire