Ssarameɣ ad teddukkel tarwa n Tmazɣa u ad taɣ Tmaziɣt di yal tamnaḍt n umaḍal
Tamazight Moussaoui d taselmadt n Tmaziɣt deg tesnawit n Aliane Hmimi deg Ccerfa, d taneɣmast d tameɣnast n Tmaziɣt.
Melmi tebdiḍ irmuden-im di youtube?
Ldiɣ tameglit-iw youtube deg taggara n maggu neɣ 29 maggu 2020.
Amek armi, kemm yellan d taselmadt n Tmaziɣt di tesnawit, terniḍ tudfeḍ deg wallal-a atrar, tesselmadeḍ daɣen?
Imi aṭas iyi-d-yesuturen ad asen rnuɣ timsirin dɣa walaɣ iẓeḍwa inmettiyin-a i d allal yufraren i usiweḍ n yizen s sshala, ama i uselmed ama i tgemmi sumata.
Acu d iswi-nnem agejdan di leqdic-a?
Iswi-w ad yettwassen yidles-nneɣ deg umaḍal meṛṛa.
Iwumi txeddmeḍ tidwilin d temsirin-im. Ini-aɣ-d wi yeṭṭafaren leqdic-im.
Aselmed neɣ timsirin, xeddmeɣ-t i yiεerbawalen d yinelmaden yeqqaren deg yiɣerbazen ama d alemmas neɣ d tasnawit. Tidwilin neɣ timsirin xeddmeɣ-tent akk i yimsefliden, ttabaεen-iyi-d seg yal tamnaḍt deg ddunit, neɣ deg ukkuẓ n tɣemmar, seg Marikan, Kanada, Fransa, Meṛṛuk, Rrus, Saεudiya, Sudan, Tunes, Lezzayer iban..
Yal amahil (yal tamsirt n youtube) yesra i wakud n usewjed, glem-aneɣ-d annect-a. Ahat yessefk-as ddeqs n wakud!
D tidet, timsirin uḥwaǧent aṭas n uheggi d wakud imi yettili umaynut yal tikkelt.
Tamsirt n youtube akked tin n tesnawit, εedlent neɣ mgaradent? Ssegzi-aɣ-d.
Ur εdilent ara temsirin n youtube d tesnawit imi deg youtube, anelmad ireffed kan ayen yuḥwaǧ, ur iḥemmel ara tuzzya d tunnḍa.
D acu n tmussniwin i ilaqen ad tent-yesεu win ara igen iman-is di taɣult? D acu n wallalen akk i tessemraseḍ?
Win ara yegren iman-is deg leqdic ilaq ad t-yissin, ad yesεu deg wallaɣ-is. Ma d allalen seqdaceɣ, d asawal kan tasaεet-a.
Youtube mačči am uɣerbaz, iswan-is mgaraden, tarrayt-is temgarad daɣen.
Yella wi am-yettaken afus n tallelt? Ini-aɣ-d amek (techniquement)?
D argaz-iw kan i yi-d-yettεawanen s ufilmi, ma d asebɣes aṭas iyi-yessebɣasen.
Nga tamawt tessexlaḍeḍ tutlayin nniḍen deg uselmed-im. Acu d iswi-m deg waya?
Sexlaḍeɣ gar tutlayin akken aṭas ara yegzun ayen d-qqareɣ ama d imawlan neɣ d wid ur nessin ara Tamaziɣt.
Dɣa seg yidis-a, ini-aɣ-d ma llan yiεerbawalen i yeṭṭafaren timsirin-im d tedwilin i tessenkaded.
Ih. Llan aṭas n yiεerbawalen bɣan ad issinen Tamaziɣt.
Massa Musawi, d tayemmat, d taselmadt, tqeddec di youtube; amek i tessawaḍeḍ, txeddmeḍ-tent akk? Ansi d-tgemmreḍ akk tazmert i waya (hh)? Amek i tessudduseḍ iman-im? Ahat mačči d ayen isehlen!
Mačči d ayen isehlen ad tekkreḍ akk i ccɣel maca mi ara tḥemmleḍ taɣawsa s lferḥ ara tt-txeddmeḍ, leεtab ur t-id-nettader.
Nezmer yiwwas ad kem-nẓer deg tilibizyun neɣ ad am-nsel di radyu deg usenked n kra n tedwilt?
Ahat! Ayɣer ala. D asirem.
Amek tga tmuɣli ama n twacult-im, ama n yinelmaden-im ɣur-m, di leqdic-im n youtube?
Ḥemmlen mliḥ ayen xeddmeɣ, ṭṭafaren-iyi-d akken ma llan, dɣa ad ten-snemmreɣ, ama d argaz-iw, arraw-iw Dyna, Lydia, Amar, d yinelmaden-iw n tesnawit n Ɛelyan Ḥmimi deg Ccerfa.
D acu i ilaqen neɣ i ixussen i tutlayt-nneɣ akken ad teffeɣ ɣer tafat, ad teṭṭef amkan i tuklal di tmurt-nneɣ neɣ ger tutlayin nniḍen, deg umaḍal?
Tameslayt-nneɣ, tuklal ad tt-neseqdec deg yal taɣult, ad nzux yis-s, ad nesεu nnif fell-as, akken ad d-tifrir ɣer sdat.
Efk-d yiwen yizen i wid yesεan tismin ɣef Tmaziɣt. Rnu-d awellih i wid iwumi semmḍit wulawen-nsen ɣef tutlayt-nsen d tmagit tanaṣlit n tmurt-nsen.
Qqaren yimezwura: win ur nesεi nnif, awer t-id-yaf lexrif. Tamaziɣt tejreḥ uqbel Ṛṛuman, ass-a tuḥwaǧ lehna, tuḥwaǧ allaɣen.
Tkeccmeḍ ɣer ublug-nneɣ "tutlayt-inu"?
Ih. keccmeɣ mi ad iyi-tettunefk tegnit.
D acu i d tamuɣli-m fell-as (neɣ ɣur-s)?
Ad ak-iniɣ tanemmirt ɣef leqdic-ik, trennuḍ-d aṭas i Tmaziɣt, tqeddceḍ seg wul.
Ma nessuter-am acu tessarameḍ i yimal, acu ad d-tiniḍ?
I yimal nessaram ad d-yas wass Tamazɣa, ad myeεqalen warraw-is, tutlayt-nneɣ ad d-tifrir gar tmura. Tanemmirt.
Tadiwenanit, yexdem-itt Sadaq Bendali
https://sadbendali.blogspot.com/2020/12/tamazit-musawi-taselmadt-di-tesnawit-d.html?m=1
Commentaires
Enregistrer un commentaire