Tazelɣa n yimal "ad"

D acu i d tazelɣa n yimal?

Tazelɣa n yimal "ad", d yiwen uferdis i ilan tawuri di tseddast akked tesnamka. Di tefyirt, nettaf-itt zdat umyag yeftin ɣer wurmir neɣ ɣer wurmir ussid. D nettat i as-yettmudun anamek n wakud n yimal . Imal, yerza ayen i d-iteddun: azekka, sellazekka, wabel... Imedyaten:

Tafyirt 1:

Ad ruḥeɣ ɣer Tmenɣast, di tefsut-a.

  (1)    (2)    (3)       (4)    (5)   (6) (7)

Acu tegber tefyirt-a?

1. tazelɣa n yimal ad

2. amyag ruḥeɣ,  yefti ɣer wurmir

3. tanzeɣt ɣer 

4. isem tmenɣast, d asemmad anezɣan n wadeg

5. tanzeɣt di

6. isem tefsut, d asemmad anezɣan n wakud

7. iglem/arbib ameskan n tama a

Tafyirt 2:

Ad ttruḥuɣ ɣer yilel deg unebdu-a.

(1)    (2)      (3)   (4)   (5)    (6)    (7)

1. tazelɣa n yimal ad

2. amyag ttruḥuɣ,  yefti ɣer wurmir ussid

3. tanzeɣt ɣer 

4. isem yilel, d asemmad anezɣan n wadeg

5.  tanzeɣt deg

6. isem unebdu, d asemmad anezɣan n wadeg

7. iglem/arbib ameskan n tama a

Tamawt:

Tikwal, tazelɣa n yimal ad, temmal asfillet. Di tegnatin i deg yettili usfillet-a, yettusemras yisem n ugellid ameqqran, Rebbi d Ncallah. Imedyaten:

1. Ad ak-yefk Rebbi ayen ira wul-ik

 neɣ Ad ak-yettunefk wayen ira wul-ik, Ncallah.

2. Ad yeg Rebbi ad tafeḍ amahil.

 neɣ Ad tafeḍ amahil, Ncallah.

Ara, tazelɣa n yimal:

Tazelɣa n yimal "ara",  nettaf-itt zdat umyag yeftin ɣer wurmir d wurmir ussid am "ad", maca tettili daɣen zdat yimuɣan-nsen. Imedyaten:

1. a. Azekka, ara tili tmeɣra (zdat umyag yeftin ɣer wurmir)

    b. D tameɣra ara yilin, azekka. (zdat talɣa umaɣun n wurmir)

2. a. Deg unebdu-a, ara ttilint tmeɣriwin (zdat umyag yeftin ɣer wurmur ussid)

    b. Deg unebdu-a, d timeɣriwin ara yettilin (zdat talɣa n umaɣun n wurmir ussid)

Tamawt:

Tazelɣa n yimal "ara",  tseεεu tawuri n umqim amassaɣ i neɣ ay daymi amqim-a amassaɣ ur yettili ara zdat umyag yerza imal deg unamek. Ẓer imedyaten-a:

1. a. D nettat i yuran - D isefra i tura. IZRI

    b. D nettat i yettarun - D isefra i tettaru. TANUMI

2. a. D nettat ara yarun. D isefra ara taru. IMAL

    b. D nettat ara yettarun. D isefra ara tettaru. IMAL

Awer, tazelɣa n usfillet ibaw:

Awer, d awal uddis, igebren sin snat tzelɣiwin: ad + wer (ur). Neqqar-as tazelɣa n usfillet ibaw acku deg unamek, tezdi imal (asfillet) d tibawt. Tazelɣa n usfillet ibaw awer, tettili zdat umyag yeftin ɣer wurmir. Imedyaten:

1. Awer tellaẓeḍ. Anamek n tefyirt, awer teqqimeḍ i laẓ (d asfillet i tawant)

2. Awer d-iḍill fell-awen wass amellal. Anamek n tefyirt, awer tferḥem, awer tafem talwit (d yir asfillet, d asfillet n diri).

Sadaq Bendali

https://sadbendali.blogspot.com/2020/12/tazela-n-yimal-ad.html