Tignatin n tbuɣarin :
Asmi ara tendeh tmeɣra ; ass n lḥenni, axxam n yisli ad qesden iḍulan-nsen. Ad awin lqeḍyan n teslit d lḥenni ara ad as-qqnen. Ass n lḥenni drus n yemdanen i ttawin, d wid i ten-yettεuzzun akked yimeqqranen n twacult-nsen.
Mi wwḍen, ad afen tislit tesxef di tesga, tcebbeḥ amzun d tasekkurt. Telsa taqendurt i iḥewcen mlih, teεluleq si lfeṭṭa. Imeclax deg yifassen, taεessabt deg uqerru... ad d-sersen lmesbah, ad as-ceεlen ticumeεtin, tibuqalin ad ččarent. yiwet d izegza iquranen (lḥemmeẓ, ibawen, llubyan...), tayeḍ d tihlawatin, kawkaw. Ma d lmetred ad rrent deg-s lḥenni-nni i as-d-wwin, ssker, aẓarif, lemri, lfeṭṭa d mraw (10) n tmellalin. Ayen ttarrant di tmetred d tbuqalin., d asfillet i lxir d rrbeḥ ara d-tawi tesli. Ad yeεmer yirebbi-s, ad tefti deg uxxam-is.
At lḥenni, ad dewwren i teslit. Ad tqerreb temɣart-is, ad teslexs lḥenni, ad as-t-teg. Tilawin, ad kkatent tibuɣarin, ad ssiɣritent. Mi kfant tuqqna n lḥenni, yemma-s n teslit neɣ tin i as-yettilin, ad tekkes lḥenni-nni ad t-tɣum akken ur yettɣar ara. Acku azekka-nni, mi ara teddu teslit, ad t-tawi ad yeqqen seg-s yesli. Ass n tursa, d ass n tumert i temɣart n uxxam acku axxam-is ad yeεmer, ad d-tawi tameṭṭut i mmi-s...
Mi d-tewweḍ teslit, axxam-is tameddit n wass, ad seččen wid tt-id-iḍefren d yinebgawen-nsen. Syin akkin, ad qqiment tlawin ad gent urar neɣ ad nezhent i tezlatin i d-ceεlen, rreḥba teεmer ccḍeḥ, taḍsa d uqesser. Ad d-nnejmaεen yimeεraḍen ɣer ufrag anida ara yeqqen lḥenni yesli. Ad d-zwiren yimeqqranen n twacult, ad yeqqim gar-asen yesli, abernus yers ɣef tuyat-is. Γef lmida, ad ssersen lmesbaḥ, tabuqalt n waman, ad d-rnun lmetred-nni n lḥenni. Di tama nniḍen, ad fesren amendil azewwaɣ deg ara ttarran tawsa. Syin ad d-berrḥen i tawsa, ad d-qqaren :
A win d-yewwin lamana, yettu-t.
Imeεraḍen ad fehmen iman-nsen, ad rren ṭṭlaba i asen-yettunefken, yal yiwen, akken yezmer. Win d-yessersen tawsa, ad t-ḍefren s ddeεwat n lxir. Mi fukken tikci n tawsa, ad d-tqerreb yemma-s n yesli, ad tejmeε amendil-nni. Ameqqran n twacult ad yemmeɣ ɣef lḥenni, ad t-yeqqen i yesli, irgazen d-yezzin ad wwten tibuɣarin, deg ara cekkren isli, baba-s d yemma-s, leεmum d xwali-s.
Izlan n tbuɣarin di Tiɣilt n Meḥmud
Sers-d lḥenni d uẓarif
A tid ur neεrif
Xuya d mmi-s n tsekkurt
D lbaz i izedɣen tamurt
Xuya d mmi-s n tsedda
D lbaz i izedɣen εemrawa.
Ad as-neqqen lḥenni i uyeffus
I xuya Muḥ d amekyus
Ad as-neqqen lḥenni n Lezzayer
Win d-yewwi ttaǧer
Ad as-neqqen lḥenni n Keεba
I d-yewwi lḥaǧ si Mekka
Ad as-neqqen lḥenni n Fransa
I d-yewwi lbaz s kyasa.
Ad as-neqqen lḥenni n At Weɣlis.
I d-yewwi lbaz deg yifer-is
Wali-k a lḥemd n Rebbi
Yufa lbaz lmetl-is.
Ad d-netter deg yifellaḥen
Widak i iǧuzen i tzallit
Ad d-nernu seg yiεessasen
Widak i iǧuzen i tmezriwt
Ad d-nettar Tizi Muqa
Ad d-nernu Tizi n Lexmis
Lferḥ-agi d aseεdi
Kemmel-it a Llah s lehl-is.
Izlan n tbuɣarin di Mεatqa, s umata:
Ad selliɣ a Nnbi fell-ak
Sellit a medden akk fell-as
Rriɣ d ubrid n Lexmis
Ufiɣ lmesbaḥ yerɣa
Anwa i t-iceεlen
D Ibehlal akked Ccarfa
A Rebbi kemmel-as di lferh
Ḥerzi imeεzuzen n tasa
Ddiɣ d ubrid n Yiɣil
Abeḥri ad d-yettferfir
Eǧǧet-aɣ abrid ad nεeddi
Ad d-nawi lḥeǧla i ṭṭir
I kunwi a iḍulan
A at llebsa n leḥrir
Semmaɣ-kem a tislit
Am tεessabt ɣef timmi
Kemm d tazdayt n ttmat
I d-irebban di ssḥari
Ḥkan-iyi-d ɣef urgaz tuɣeḍ
D lbaz i izedɣen leεli
Mreḥba s lberrani
Kra d-tḥeǧbeḍ a lḥara
Ccuca-as yali
Ay ay Rebbi err ccemla
Nekkni nerra-d ad as-nefreḥ
Lferḥ i bab n tmeɣra
Ulac amgired gar tbuɣarin n yergazen d tid n tilawin di temnadt-nneɣ, acu kan llant kra n tudrin, tilawin zik xḍant i tbuɣarin. Rnu di tallit n wass-a, aṭas i yeǧǧan tibuɣarin, yezmer lḥal imi d-ttilint tmeɣriwin berra n uxxam di tzeqqa n tmeɣriwin.
Farida Cebbiri
tutlayt-inu
Commentaires
Enregistrer un commentaire