Adeg n tzelɣa n tnila di tefyirt

Tizelɣiwin n tnila "d, n" ttbeddilent amkan di tefyirt. Ay-a iḍerru-d ilmend n uferdis i tent-isuman, i d-yernan ɣer umyag. Iferdisen i izemren ad rnun ɣer umyag d tizelɣiwin n tnila neɣ n umiran (n wemha), amernu n tibawt d umqim amassaɣ:

1. Zdat umyag:

Anaḍ ussid (+ur): 

• ur d-ttas ara azekka.
• ur n-ttuɣal ara ɣer din.

Izri (+ur): 

• Ur d-usint ara iḍelli.
• Ur n-uɣalent ara ɣer din.

Urmir (+ad, ara): 

• Ad d-asent sellazekka.
• Ad n-uɣalent ɣer din.

Urmir ussid (+la): 

• La d-yekkat ugeffur da.
• La n-ileḥḥu ɣer din.

Amaɣun (+i): 

• D nitenti i d-yusan ɣer tmurt-a.
• D nitenti i n-yuɣalen ɣer din.

Amyag yeftin (+i): 

• D nekkni i d-tufam da.
• D Yuba i n-ttafeɣ din.

Amyag yeftin (+tasɣunt): 

• Ur uɣalent ara seg wasmi d-usant ɣer taddart.
• Ttafeɣ  dadda deg uxxam mi n-rezzuɣ ɣur-sen.

2. Deffir umyag:

Anaḍ: 

• As-d azekka ɣer da.
• Awi-n imekli yid-k.

Anaḍ ussid: 

• Ttas-d zik.
• Ttruḥu-n tameddit.

Izri: 

• Usant-d iḍelli.
• Mlalen-n din.

Urmir: 

• Ssiweḍ setti-k, tuɣaleḍ-d.
• Awi setti-k, tuɣaleḍ-n ɣer din.

Urmir ussid:

• Tettaseḍ-d zik.
• Tettruḥu-n tameddit.

Tamawt:

Rzut ɣer temsirt "asnekdan d yiwṣilen-is" ad tafem amek yettili usemres n tzelɣiwin n tnila yeddukkulen d usnekdan.

Sadaq Bendali