Ixxamen akk iqdimen, sεan tizeɣwa, afrag, aseqqif deg ttɣaman, taxxamt n usewwi (taseqqift), dderb di tama n wadda, sufella-s taɣurfet, taxxamt n tarda neɣ taxerraǧit. Lebni n uxxam-a s wakal, idɣaɣen d usɣar. Tasga n tzeqqa ttjeggiren-tt s tumlilt, tiɣerɣert ttessun-as tixmirt n wakal, ssqef-is d aqermud azewwaɣ.
Tazeqqa, daxel tebḍa s lqis, yal tiɣmert s wazal-ines. Mi ara tkecmeḍ deg umnar n tewwurt ad tafeḍ tarkent ideg ssiriden, ssrusun deffir tewwurt-a m-sin lelwaḥ tasebbalt, tteffin-d seg-s aman n tarda. Γer tama n wadda d addaynin, tiɣerɣert-is tsubb ɣef tin n tzeqqa. Sufella-s taεrict neɣ takana, gganen deg-s.
Taεrict tesεa ṭṭaq amectuḥ seg ara twaliḍ ɣer uzniq. Di ṭṭerf n teεrict, srusun ikufan ideg xezznen timẓin, irden, iniɣman... Azeṭṭa isenned di tesga, iqubel tawwurt. Lkanun di ṭṛerf, ssendagen deg-s yisufa di tallit n usemmiḍ, tama-s snat n tesririn. Di lḥid, llant tekwatin, srusun deg-sent tiɣawsiwin timecṭaḥ.
Di teɣmert n wadda yers ucbayli n zzit. Sdat-s kan ttεelliqen taxcact (taqruct), ssenduyen deg-s iɣi. Ad naf tiɣmert-nniḍen deg ttεelliqen dduḥ n llufan. A wi yufan skra n win yesεan axxam aqdim, xas yebna amaynut ad yesseḥbiber ɣef uxxam n tjaddit, ad ireqqeε deg-s ayen yeɣlin, akken ad yeqqim i lebda, ad t-id-afen yineggura.
Tanelmadt Lina Lagil, deg useggas wis 3
seg uɣerbaz alemmas Unar - Mεatqa.
tutlayt-inu
https://sadbendali.blogspot.com/2021/01/axxam-n-tjaddit.html
Commentaires
Enregistrer un commentaire