Tanẓa s "y" - tayayt

Di tefyirt, tikwal ttemlilin sin wawalen: yiwen yekfa s teɣri wayeḍ yebda s teɣri dɣa tettili-d tallunt tilemt gar-asen, neqqar-as TANẒA. Deg ususru, neqqar-itt-id d "y" daymi i as-nessawal TAYAYT. Di tira, ur tt-nettaru ara acku ur tesεi ara azal di tjerrumt. Tayayt tettili ladɣa ger wawal d uwsil-is, ger tzelɣa n yimal "ara" d umyag, ger tzelɣa n usiwel "a" d yisem (neɣ arbib), ger yisem d urbib ameskan neɣ ger usestan d uwsil-is.

Imedyaten:

1. Amyag+awsil-is:

     Inuda-as (inuda-y-as)

2. Amyag+ara (n tibawt):

     Ur yelli ara (ur yelli y ara)

3. Isem(neɣ arbib)+awsil-is:

     Asaru-is (asaru-y-is)

     Amenzu-is (amenzu-y-is)

4. Isem+arbib ameskan:

     Isufa-a (isufa-y-a)

5. Asestan(amattar)+awsil-is:

     Acu-as-tt? (acu-y-as-tt?

6. Tazelɣa n usiwel "a"+asemmad:

     A argaz (a y argaz)

7. Tazelɣa n yimal "ara"+amyag:

     Acu ara inin? (acu ara y inin?)

8. Tasɣunt "mi"+amyag:

     Mi uɣalen (mi y uɣalen)

Tamawt:

Tanẓa, d tallunt-nni neɣ "amellal-nni" ger snat teɣra. Tayayt, d imesli "y" i d-nessenṭaq maca ur t-nettaru ara xas di tegnatin anida tettili tjerriḍt n tuqqna neɣ tizdit.

* Awal "tayayt" d asumer n umeskar.

Sadaq Bendali

https://sadbendali.blogspot.com/2021/01/tanza-s-y-tayayt.html