Timsertiyin yemgaraden

D acu i d tamsertit?

Deg umata, tamsertit, d abeddel n ususru i d-yettilin mi ara mlilen sin yimesla (sin yisekkilen).

Timsertiyin, aṭas i yellan, ha-tent-aya amek i d-ttilint:

1. s tenzeɣt i yeḍfer yisem neɣ umqim:

n+t=tt: awal n tidet - awal ttidet, adlis n ta - adlis tta

n+w=bb: tiḥerci n wuccen - tiḥerci bbuccen

n+y=gg: tabɣest n yizem - tabɣest ggizem

deg+u=deggw: asennan deg uḍar - asennan deggwḍar

deg+w=deggw: amuḍin deg wusu - amuḍin deggusu, awi deg wa - awi deggwa

seg+y=segg: tuɣalin seg yiger - tuɣalin seggiger

deg+i=degg: ilfan deg iɣezran - ilfan deggɣezran

ɣef+u=ɣeff: akemmus ɣef ugadir - akemmus ɣeffgadir

ɣef+w=ɣeff: taguni ɣef wudem - taguni ɣeffudem

am+w=amm: iεedda am waḍu - iεedda ammaḍu

am+u=amm: iḍelli am uzekka - iḍelli ammzekka

2. s umqim amassaɣ i yeḍfer umyag bu umatar udmawan neɣ n umaɣun "i" neɣ "y":

i+i=igg: d akal-is i ixeddem - d akal-is iggxeddem

i+y=igg: d taferka-s i yekrez - d taferka-s iggekrez

i+i=igg: d ungal i yura Ufulay - d ungal iggura Ufulay

i+y=igg: d Afulay i yuran ungal d amezwaru - d Afulay i gguran ungal amezwaru

3. s tesɣunt ilan "i" di taggara d umyag ilan amatar udmawan d "i":

mi+i=migg: cfiɣ-as mi ilul - cfiɣ-as migglul

mi+y=migg: usan-d ɣur-s mi yuḍen - usan-d ɣur-s migguḍen

asmi+y=asmigg: yella deg yinig asmi yemmut dadda-s - yella deg yinig asmiggemmut dadda-s

4. s tenzeɣt "n" d yisem yebdan s yiwet si tergalin "b, f, l, m":

n+b=bb: tameṭṭut n baba-s - tameṭṭut bbaba-s

n+f=ff: amendil n Faḍma - amendil ffaḍma

n+l=ll: axxam n Lunǧa - axxam llunǧa

n+m=mm: tamurt n Marikan - tamurt mmarikan

n+r=rr: akal n Rebbi - akal rrebbi

5. s tzelɣa n yimal "ad" d umatar udmawan "t" neɣ "n":

ad+t= att: ad tissin - attissin

ad+n= ann: ad nissin - annissin

6. s temlilit n "ḍ" d "t":

Tasemmaḍt - tasemmaṭ (deg yiwen wawal)

Teẓriḍ-t? - teẓriţ (amyag d uwsil-is)
7. s temlilit n "d" d "t":

Igenni d tmurt - igenni ttmurt (tasɣunt d yisem)

Dihya, d tamezwarut - Dihya, ttamezwarut (tazelɣa n tilawt d yisem)

Tezdeɣ d teslit-is - tezdeɣ tteslit-is (tanzeɣt d yisem)

G.M:

Deg wussan-a, ad d-teḍfer temsirtt nniḍen ideg ara d-nefk tigmuẓarin n ddeqs n temsertiyin.

Sadaq Bendali

https://sadbendali.blogspot.com/2021/01/timsertiyin-yemgaraden.html