Imyagen isuddimen, d acu-ten?

Amyag, yettili d amenzu neɣ d asuddim. Amyag amenzu, d win ur d-nettusuddem ara seg umyag nniḍen. Tirgalin n ufeggag-is, d nitenti i d aẓar, ur nezmir ad nekkes yiwet seg-sent. 

Amyag asuddim, yusa-d seg wawal nniḍen. Deg ufeggag-is, rnan-d ɣur-s yisekkilen akken ad as-fken anamek nniḍen i umyag.  D ayen iwumi neqqar amatar. Imyagen isuddimen d wi:

Aswaɣ:

Deg unamek, amigaw, yettili d tamentilt n tiḍri n tigawt ara yexdem wayeḍ, d netta i t-yerran ad yexdem tigawt. Asileɣ n uswaɣ, yettili s tmerniwt n yiwen seg yizwiren-a: s, ss, sse, ssu. Ha-ten-a kra yimedyaten:

• sɣer, yettusuddem seg umyag ɣer.

• ssendeh, yettusuddem-d si ndeh.

• ssulleɣ, yettusuddem si lleɣ.

• ssiweḍ, yettusuddem-d si aweḍ.

* Deg umedya-a wis 4, tella temlellit n teɣri a i yuɣalen d i.

Amyaɣ:

Deg unamek, amigaw yerza sin yidisan, yal wa yexdem tigawt i wayeḍ: myexdamen tigawt.

Asileɣ n umyaɣ, yettili s tmerniwt n yiwen seg yizwiren-a: my, mye, myu, m. Ha-ten-a kra yimedyaten:

• myaf, yettusuddem seg umyag af.

• myegzam, yettusuddem-d si gzem.

• myukkas, yettusuddem si kkes.

• myussan, yettusuddem si issin.

• mxatal, yettusuddem-d si xatel.

* Deg yimedyaten 2, 3, 4, 5  tella temlellit.

Attwaɣ:

Deg unamek, amatar udmawan n umyag attwaɣ yeftin, yerza win iɣef teḍra tigawt, yesεa azal n usemmad usrid.

 Asileɣ n uttwaɣ, yettili s tmerniwt n yiwen seg yizwiren-a: ttu, ttwa, ttw, mm. Ha-ten-a kra yimedyaten:

• ttumudd, yettusuddem seg umyag mudd.

• ttwazdeɣ, yettusuddem-d si zdeɣ.

• ttwali, yettusuddem si ali.

• mmels, yettusuddem si els.

* Deg umedya wis 4,  tella temlellit.

Talɣiwin tisuddimin tuddisin:

Llan kra yimyagen ttemlilint deg-sen snat talɣiwin n usuddem, neqqar-asen imyagen isuddimen uddisen. S wakka, ad naf llant kradet talɣiwin tisuddimin tuddisin, ha-tent-aya:

Aswaɣ n umyaɣ:

• ssemyuɣal: yusa-d seg umyaɣ "myuɣal" i d-yettusuddmen seg umyag amenzu "uɣal"

• ssemyegzam: yusa-d seg umyaɣ "myegzam" i d-yettusuddmen seg umyag amenzu "gzem"

Amyaɣ n uswaɣ:

• msengar: yusa-d seg uswaɣ "ssenger" i d-yettusuddmen seg umyag amenzu "nger"

• myesgan: yusa-d seg uswaɣ "sgen" i d-yettusuddmen seg umyag amenzu "gen"

Attwaɣ n uswaɣ:

• ttusiweḍ: yusa-d seg uswaɣ "ssiweḍ" i d-yettusuddmen seg umyag amenzu "aweḍ"

• ttwasgen: yusa-d seg uswaɣ "sgen" i d-yettusuddmen seg umyag amenzu "gen"

Tamawt:

Asuddem n yimyagen, iḍerru-d ilmend n yisekkilen n tazwara n ufeggag n umyag amenzu. Annect-a, ad ten-nwali s telqey di temsirt "asileɣ n yimyagen isuddimen "ara d-iḍefren ta.

Tamsirt, yessewjed-itt-id Sadeq Bendali

https://sadbendali.blogspot.com/2021/02/imyagen-isuddimen-d-acu-ten.html