Ismawen n timarewt (n umyili) - I

Ismawen n timarewt,  rzan imeslaḍen n twacult d yimdanen ilan assaɣen n umyili gar-asen.

Aṭas seg-sen, ur sεin ara tiɣri tamezwarut neɣ "t" n wunti akken seεεun yismawen n yimdanen (imugna). Isem n timarewt d ameskil, ila snat tewsatin (amalay, unti) d sin yimḍanen (asuf, asget). Kra deg-sen udfen-d si tutlayt taεrabt, am: jeddi, εemmi, xali. Ismawen-a, nezmer ad ten-nebḍu ɣef sin yimuren: 
- Wid yerzan imdanen i d-yuɣen aẓar di twacult, zdin-ten yidammen yid-s.
- Wid i d-ikecmen tawacult uɣen-d aẓar si twacult nniḍen

Umuɣ n yismawen n timarewt neɣ n umyili:

a. Ismawen n wid yezdi uẓar (i zdin yidammen):

• baba/ibabaten, yemma/tiyemmatin.
• jeddi/ijedditen, jida/tijidatin neɣ setti/tisettitin.
• gma/ayetma, ayetmaten, atmaten; uletma/yessetma, tiyessetmatin.
• dadda/idaddaten, nanna/tinannatin
• mmi neɣ memmi/arraw, yelli/yessi, tiyessetmatin.
• mmi-s n mmi/arraw n mmi, yelli-s n mmi/yessis n mmi.
• mmi-s n yelli/arraw n yelli, yelli-s n yelli/yessi-s n yelli.
• mmi-s n gma/arraw n gma, yelli-s n gma/yessis n gma.
• ayyaw/ayyawen, tayyawt/tayyawin.
• mmi-s n uletma/arraw n uletma, yelli-s n uletma/yessi-s n uletma.
• mmi-s n mmi/arraw n mmi, yelli-s n mmi/yessis n mmi.
• mmi-s n yelli/arraw n yelli, arraw n yelli/yessis n yelli.
• εemmi/εmumi, εemti/εmumati.
• xali/xwali, xalti/xwalati.
• mmi-s n εemmi/arraw n εemmi, yellis n εemmi/yessis n εemmi.
• mmi-s n xali/arraw n xali, yelli-s n xali/yessis n xali.

b. Ismawen n wid ur yezdi uẓar (ur zdin yidammen):

• argaz/irgazen, tameṭṭut/tilawin.
• amɣar/imɣaren, tamɣart/timɣarin.
• aḍewwal/iḍewlan, tislit/tislatin.
• * argaz n εemmti/irgazen n εmumati (n εemmti!).
• * tameṭṭut n εemmi/tilawin n εmumi (εemmi!)
• * argaz n yemma/irgazen n yemma!
• * tameṭṭut n baba/tilawin n baba.
• - alwes/ilewsan, talwest/tilewsatin
• * tanuḍt/tinuḍatin.
• aslif/islifen, taslift/tislifin.
• arbib/irbiben, tarbibt/tirbibin.
• mmi-s n ulwes/arraw n ulwes, yelli-s n ulwes/yessi-s n ulwes.
• mmi-s n telwest/arraw n telwest, yelli-s n telwest/yessi-s n telwest.
• * iken/akniwen.
• * takna/takniwin.
• mmi-s n takna/arraw n takna, yelli-s n takna/yessi-s n takna.

Timawin:

1. Ismawen "argaz n εemmti, argaz n yemma", ur sεin ara talɣiwin n wunti.

2. Ismawen tameṭṭut n εemmi, tameṭṭut n baba, tanuḍt, ur sεin ara talɣiwin n umalay.

3. Ismawen "iken, takna", ad d-yili fell-asen usegzi ugar di temsirt i d-iteddun i yerzan inumak n yismawen n timarewt.

Tamsirt i d-yessewjed S.Bendali

https://sadbendali.blogspot.com/2021/02/ismawen-n-timarewt-n-umyili.html