Tarrayt n usileɣ n yimyagen isuddimen

Akken i t-id-nefka d tamawt di temsirt yezrin, asileɣ n umyag asuddim, iḍerru-d ilmend n yisekkilen n tazwara n ufeggag n umyag amenzu. Wa seg yiwet tama, si tama nniḍen, yezmer daɣen ad yili wassaɣ akked umḍan i ila umyag amenzu neɣ win ansi ara d-yili usuddem. Ha-tent-a ihi tegnatin n usuddem amek i d-ttilint:

Deg usuddem n uswaɣ:

S uzwir "s": 

• Zdat yiwet tergalt, md: sbedd, si bedd.

• Zdat yiwet tergalt iwumi tekkes tussda, md: sdegdeg, si ddegdeg.

S uzwir "sse": 

• Zdat snat tergalin, md: ssexser, si xser.

• Zdat tergalt tussidt, md: sseddu, si ddu.

S uzwir "ssu" neɣ “ssi”: 

• Zdat tergalt tussidt, yiwet tsawalt, sin yimesla, md: ssuṭṭeḍ, si ṭṭeḍ.

• S uzwir "ssi": Zdat teɣri "a" n umyag amagnu, tamlellit s teɣri "i", md: ssimes, si ames.

S uzwir "ss": 

• Zdat teɣri "i", tamlellit n teɣri tis snat deg umyag n tɣara, md: ssiwzel, si iwzil.

• Zdat teɣri "e", md: ssens, si ens.

Deg usuddem n umyaɣ:

S uzwir "m": 

• zdat yiwet tergalt, md: mzelli, si zelli.

S uzwir "mye": 

• Zdat snat tergalin, ugar n yiwet tsawalt, md: myenqab, si nqeb.

• Zdat tergalt tussidt, md: myezzu, si zzu.

S uzwir "my":

• Zdat teɣri "a", "i" neɣ "u", md: myaɣ (si aɣ), myili (si ili), uɣal (myuɣal).

S uzwir "myu": 

• Zdat teɣri yezwaren targalt tussidt, tamlellit, md: issin, si myussan.

Deg usuddem n uttwaɣ:

S uzwir "ttu": 

• zdat yiwet tergalt, md: ttubehdel, si behdel.

S uzwir "ttwa": 

• Zdat snat tergalin, md: ttwakreb, di kreb.

• Zdat yiwet tergalt tussidt, md: ttwaqqes, si qqes.

S uzwir "ttw": 

• Zdat teɣri, md: ttwagem, si agem.

S uzwir "mm": 

• Zdat teɣri "e", yiwet tsawalt, md: mmečč, si ečč.

Deg usuddem n talɣiwin tuddisin:

S umata, asileɣ n talɣiwin tuddisin, iḍerru-d akken i d-iḍerru usileɣ n talɣiwin tiḥerfiyin.

Tamsirt, yessewjed-itt-id Sadeq Bendali

https://sadbendali.blogspot.com/2021/02/tarrayt-n-usile-n-yimyagen-isuddimen.html