Tiɣri n tmeṭṭut

Tameṭṭut, d tudert, d ccbaḥa, d tayri, d ddunit s timmad-is. Axxam ur nesɛi tameṭṭut, d asemmaḍ, d lfani, d ucmit.  

Tameṭṭut am tjeǧǧigt, ma tefres, tenɣec, teswa, ad ticbiḥ, ad timliḥ. Ma teǧǧiḍ-tt, tettwahmel, ad tt-yali yinijel, ad temmečč, ad tkuffer. Ad temmet ur d as-teččur. Ṣṣura-s ad tefcel. Udem-is ad yekmec, ad yicmit. Ifadden-is ad rẓen. Ad tmenni lmut, imi tudert-is tɣumm-itt tagut. 

Tameṭṭut ɣur-neɣ,  d aɣrum n tekwat, mi ara tili tawant, ḥedd ur tt-id-ittmektay, tettuɣal deg rrif. Amkan-is, yella kan lawan n lḥif d wurrif. Xas isussem yimi-s, leǧwareḥ-is akk ttsuɣun,  ttmejjiden  Ṛebbi i ten-id-ixelqen: “ Ur ḥwaǧeɣ ara imecluxen, ur iyi-ččuren ara tiṭ yidrimen. I wacu-yi uraɣ, ma teǧǧiḍ-iyi nnuɣnaɣ? I wumi-yi lmerǧan, ma ttidireɣ yir ussan?   I wacu-t leḥrir, ma ul-iw izdeɣ-it lḥir? Ula ay xedmeɣ s yikesman; mi lliɣ imi-w, lqut bessif i ibelleɛ, yal ass, deg-i ixenneq. Rwiɣ asebleɛ, ma d ṣṣura tessexlaɛ. 

Nekk mačči d ajeqdur,

Tasa-w, d lḥanna i tettquddur,

Di leɛmeṛ teqqur

Tasa-w, teččur d lḥanna,

Medden,  rran-tt d aẓru n tnicca

Ur iyi-reggem, ur iyi-ṛeggem

Uklaleɣ ad idireɣ deg lehna, 

Tawenza-w,  mačči d lmeḥna

Urmeɣ tumert,

Ulac win i wumi rniɣ lḥeq-iw n lferḥ

Ula iyi-d-texdem tjeǧǧigt n fuṛaṛ, 

Tesmektay-iyi-d ussan n lemṛaṛ

Bɣiɣ ad ḍseɣ yal ass

Maci yiwen n wass deg useggas

Rnu ɣur-s akken meɣres, 

Acku ula ara iyi-d-yexdem uzgen n wass

Akez iman-ik a mmi-s n medden, 

Ma ruḥeɣ, amer ad iyi-tektileḍ s ddheb,

Ul-iw fell-ak ur d-iqelleb

Efk-iyi akud deg lweqt-ik,

Tgeḍ-iyi amkan deg wul-ik

Bɣiɣ awal aẓidan, 

Ara iyi-rnun deg ccan

Bɣiɣ awal aḥlawan

Ara iyi-settun iɣeblan

A medden, rret-d tiɣri, 

skud ajeǧǧig ur yeɣri.”

Samira HOCINI BEN ABDELMALEK, seg wungal INIG.

I tutlayt-inu

https://sadbendali.blogspot.com/2021/02/tiri-n-tmettut.html