Imyagen imyaɣen d usefti-nsen

Akken neẓra di temsirt yezrin i t-yerzan, amyaɣ, yemmal tigawt igan sin yidisan (sin yidisan yezdin) yal wa i wayeḍ. Md:

• Mmeẓrent temɣarin di tmazirt.

• Ttemyerfaden watmaten di tegnitin iweεren.

• Ttemyehdaren gar-asen s wallal n viber.

Asefti akked wudmawen n usget:

Imi mačči yiwen n umigaw kan i yettekkin deg useḍru n tigawt, nezmer ad negzu neɣ ad nxemmem s tɣiwla dakken imataren udmawanen i nessemras d wid n usget. Llan wid i d-yessumuren akken taseftit n umyaɣ yessefk ad tili kan d wudmawen n usget. Akka ara tt-naf deg yimedyaten-a ideg ara nessefti krad yimyagen ɣer yizri:

Amqim	myaru	myexbac	myaf
Nekkni Kunwi Kunemti Nitni Nitenti	nemyura temyuram temyuramt myuran myurant	nemyexbac temyexbacem temyexbacemt myexbacen myexbacent	nemyufa temyufam temyufamt myufan myufant

Asefti akked wudmawen n wasuf:

Xas nezmer ad nxemmem dakken ur yessefk ara usefti n umyaɣ akked wudmawanen n wasuf, tilawt d umeslay mmalen anemgal n waya. Deg umedya, ma nenna-d "Nekk d Masil, nettemεawan", tafyirt-a tezmer ad tili ɣef talɣa nniḍen, akka: "Nekk, ttemεawaneɣ d Masil" neɣ "Masil, yettemεawan yid-i". Da, amigaw-nni i yellan d asget yuɣal "yefruri" ɣef sin yisufen "…….ɣ + Masil" neɣ "y…….+ nekk"; maca tcudd gar-asen tenzeɣt n tdukli "d". S wakka, yettban-d belli asemres umyaɣ ɣer wasuf, yettili di tefyar war kra n wugur. Ihi, ula di tfelwit n tseftit, ilaq ad yili daɣen. Di tseftit, ma iwata neɣ ma nebɣa, nezmer ad d-nmel tanzeɣt n tdukli "d, akked, yid" i yettilin di tefyirt. Md:

Amqim	war tanzeɣt	s tenzeɣt "d"
Nekk Kečč Netta Nettat	myussaneɣ temyussaneḍ yemyussan temyussan	myussaneɣ d …. temyussaneḍ d .. yemyussan d ... temyussan d ...

Tamsirt, yesswjed-itt-id Sadeq Bendali

https://sadbendali.blogspot.com/2021/03/imyagen-imyaen-d-usefti-nsen.html