Ɛebbas At Rzin, d yiwen ucennay ameqqran gar tgejda n ccna Aqbali. Yebda-d amecwar-is n ccna si temẓi-s, iεedda di tedwilt n yicennayen n uzekka, tasfift-is tamezwarut, yessekles-itt deg useggas n 1981.
Luleɣ-d di twacult n yinaẓuren ; baba, Mesεud Ferḥat, ad t-yerḥem Rebbi, yella deg ugraw n yiḍebbalen . Gma ameqqran, yella d acennay, tedduɣ yid-s zik mi ara icennu. Ccna wwiɣ-t-id deg yidammen, yis-s i ddreɣ segmi d-ldiɣ allen.
Melmi i tebdiḍ ccna? .
Mi lliɣ meẓẓiyeɣ 12 - 13 yiseggasen ttruḥuɣ d gma, netturar dderbuka, nettqessir, ncennu tizlatin.
Acḥal tesfifin / iḍebsiyen i tesεiḍ ?.
Sεiɣ 11 tesfifin ; tamezwarut xedmeɣ-tt di 1981, taneggarut, di 2018.
Anwa acennay i wumi tettḥessiseḍ aṭas? .
Ḥemmleɣ ad sleɣ i wayen akk zeddigen ama d icennayen n tmurt-nneɣ, ama d iberraniyen. Yerna selleɣ akk i lesnaf n ccna. Maca d win uɣur qerbeɣ s waṭas d Crif Xeddam ad t-yerḥem Rebbi.
Cniɣ ɣef yisental akk n tudert ; tayri, inig, ddunit, lqum-agi, lweqt...ayen akk i ḥulfaɣ cniɣ fell-as, yiwen ur tezgileɣ ara.
Anta tizlit gar tezlatin-ik i tḥemmleḍ? .
Tuɣac-iw, amzun d arraw-iw εzizit fell-i akk, yedd7-ɣ zmireɣ ara ad ferneɣ yiwet ɣef tayeḍ.
Acu i d tamuɣli-k ɣef yilmeẓyen i icennun assa ? Ayen cennun yexḍa-yi, ur zmireɣ ara ad d-hedreɣ fell-as acku beεden ɣef ubrid-nneɣ. Ṭṭafaren kan zzhu d ccḍeḥ, ɣur-sen ccna d ccḍeḥ kan. Maca tizlit taqbaylit d aɣerbaz, ɣer yicennayen iqdimen i d-nelmed taqbaylit, nnif d lḥerma, ttrebga, inzan, amezruy, ...
Yesεa unaẓur amkan di tmetti? .
Di tmura yuẓan ɣer zdat anaẓur s umata, azal-is meqqer di tmetti. Ma da ɣur-neɣ, ulac kan ... Tella yiwet n tallit teǧǧuǧǧeg, acennay yufrar, ɣur-s akk i ttmuqulen medden imi lemmden seg-s ddeqs n temsal yeεnan ddunit. Mi ara tesleḍ i Sliman Ɛazem, mačči d imeslayen n menwala, d timsirin ara d-tawiḍ ɣur-s. Maca ass n wassa, limmer ad d-beddeɣ ad cnuɣ tizlit yesεan izen, aṭas n yemdanen i wumi ur tteεǧabeɣ ara, ad as-inin acu akka icennu wagi ? Ahat rebban tameẓẓuɣt i ccna n ccḍeḥ werrdiḥ, am winna isellen i zzhir yal ass, di tazwara ẓẓay fell-as, simal i iteddu wakud, iwulef-it, yuɣal yettidir yis-s.
Ccna d win yessidiren acennay?
Zik-nni ur ddiren ara yicennayen s ccna ; ttruḥun sya ɣer leqhawi ad d-cnun ciṭ, ad ḥerren amesruf neɣ ad cnun di tmeɣriwin n taddart... D icennayen ur nuklal ara assa, i d-yettḥerriren tadrimt meqqren di ccna-nsen.
D acennay i iteddun s tmetti, yessenfal-d ayen yettwali neɣ d timetti i yeṭṭafaren ayen d-yeqqar ucennay ?
Ayen ibanen iban ; d timetti i idehhimen acennay akken ad iwali, ad iḥulfu s telqey deg wayen i iḍerrun di tmetti, yettarra-ten-id d imeslayen iweznen s wacu ara yessaki, neɣ s wayes ara yemmel i wiyaḍ ayen ur walan ara ahat neɣ ayen ur zmiren ara ad t-id-inin . Timetti ula d nettat ur tettidir ara mebla acennay. Limmer ur selleɣ ara i Sliman Ɛazem d Crif xeddam, ddeqs n temsal ur ttissineɣ ara. Ihi tizlit taqbayit mačči ala izen i d-tettawi daxel-ines, maca tesselmad tameslayt, acennay i iẓewren d twinas i d-ileqḍen imeslayen yettrun, yessemras-iten di tezlatin-is akken ad ten-yessider, ur ten-yettɣummu ara uɣebbar n tatut, ad ten-issinen yemdanen.
Tamezwarut, ssarameɣ teɣzi n leεmer ncallah, ma di taɣult-agi n tẓuri ssarameɣ ad d-yuɣal sseḥ ɣer wadeg-is, ad yefsi udfel, ad iban wayen yefren ddaw-as. Ẓriɣ yiwen n wass ad d-tekker yiwet tsuta, ara ifehmen akk timsal, ad ɣren akk tilufa n ddunit, ad nadin deg umezruy n yinaẓuren, syin ad d-afen ayen yellan, ad as-inin " ah, ziɣ yella leflani, akken i d- yenna leflani, yeǧǧa-d leflani agerruj s wacu ara neddu assa.
Acu ara tiniḍ i wid i iqeddcen deg ublug tutlayt-inu?
Ur ilaq ara ad feclen, ad kemmlen deg ubrid-a, ur sellen ara i wid yessefcalen d wid i asen-yettruẓun ifadden. Qqaren twinas i iteddun ɣef tidet, yessawaḍ.
Awal-ik n taggara? .
Tanemmirt imi iyi-tefkam azal, terram-d ɣur-i. Ssarameɣ ayen iɣef nettεettib ur yettruḥu ara. Ssarameɣ ccfa i yimuḍan, ad yekfu Rebbi fell-aɣ aṭṭan-agi i d-yennulfan - kuruna - ad nuɣal am zik-nni.
Tadiwennit, tga-tt Farida Cebbiri
Tutlayt-inu
-
Commentaires
Enregistrer un commentaire