Tadiwennit d tselmadt n Tmaziɣt, massa Guiddir

Tamaziɣt, d tamagit, d tutlayt n tyemmat,  d idles, d amezruy...

Tutlayt-inu: Azul a massa.

Massa Guiddir: AZUL fell-awen. Di tazwara , tanemmirt-ik d tameqqrant a Mass Bendali  ɣef  tdiwennit-agi  d wazal i tgiḍ i leqdic-inu, s lferḥ d ameqqran ara d-rreɣ ɣef yisteqsiyen-inek.

Tutlayt-inu: D anta-tt massa Gidir?

Massa Guiddir: Massa Guiddir Djedjiga neɣ Ɛacuri, d taselmadt n tutlayt d yidles amaziɣ deg tesnawit , bdiɣ deg useggas 2013 ar ass-a. Luleɣ deg  taddart At Ɛisa Uyeḥya deg tɣiwant n At Yellilten , dinna i lemmdeɣ almi d tasnawit. Γur-i  agerdas n yizerfan  (licence des  sciences juridiques et administratives)  di tesdawit Mulud Mɛemmri - 2009. Agerdas n master deg tutlayt d yidles amaziɣ deg tesdawit Ɛebd Raḥman Mira , Bgayet - 2013.

Tutlayt-inu: Melmi tebdiḍ asenked n temsirin di youtube? D acu ay d iswi-inem agejdan deg useqdec-im n wallal-a atrar?

Massa Guiddir: Bdiɣ  asenked  n temsirin-agi  deg youtube (s yisem n Massa Akselyan) seg umenzu n yennayer 2021 ar ass-a , iswi- inu d aselmed n tutlayt n tmaziɣt   berra n tneɣrit akken almud n tutlayt-a ur-yettɣim ara kan deg usmil, ad yekcem ttawil agi amaynut.  Inelmaden n wass-a ḥemmlen allalen itraren dɣa d tagnit tutlayt-agi ad tawi amkan-is gar tutlayin nniḍen.

Tutlayt-inu: Kemm yellan d taselmadt n Tmaziɣt di tesnawit, d acu i kem-yesbeɣsen akken ad tezriḍ ɣer tedwilin s ubrid n youtube.

Massa Guiddir: Wid iyi-d-yefkan afud, di tazwara d inelmaden-iw , acku ahil n useggas-agi  akken neẓra akk, ur nebdi ara aseggas aɣurbiz di lawan , ɣef ssebba n unfafad kuruna. Dɣa, ahil yella-d usifses deg-s s temsirin s wudem n umeccaq (à distance ) inelmaden-iw ur gzin ara s ttawil  uktazal-nsen s tira , dɣa sutren-d deg-i asekles n ssut-iw akken ad gzun akken ilaq, d tagi i yi-yeǧǧan xedmeɣ-d timsirin s ubrid-agi n youtube.

Tutlayt-inu: Iwumi laqent? D anwi i izemren ad tent-yeḍfer? Amek i ttwalin leqdic-im yinelmaden-im d yimeddukkal-im iselmaden n tesnawit?

Massa Guiddir: Timsirin i d-ttheyyiɣ  d ahil i yinelmaden n uswir  n tesnawit, ama d wid yeqqaren deg uɣerbaz  neɣ  s tebratin akked ilelliyen, war ma ttuɣ wid yebɣan ad lemmden tutlayt tamaziɣt .

Inelnelmaden d yiselmaden, ad rnuɣ imaṣwaḍen, d nutni i d afud-iw; anagar asebɣes i d-yekkan si tama-nsen. Xas ma asekles neɣ tamsirt yella wayen ixuṣṣen deg-s maca tuget deg-sen ttaken-iyi-d tabɣest ad kemmleɣ.

Tutlayt-inu: Ger temsirin di youtube akked tid n tesnawit, d acu i iεedlen neɣ i yemgaraden?

Massa Guiddir: D yiwen wahil , tarrayt d yiwet maca timsirin mgaradent aṭas imi mačči kif-kif mi ara            d- nessenked tamsirt sdat n yinelmaden d ma yella ulac-iten. Dɣa timsirin i d-xeddmeɣ deg youtube xeddmeɣ-tent amzun akken wid iwumi ttmeslayeɣ werǧin tt-ssinen , ttawiɣ-d akk isallen ilqayanen icudden ɣer temsirt , yiwet yiwet, akken ad yegzu unelmad. Segzayeɣ s waṭas wudmawen acku yemgarad uswir n wid i yi-d-yeṭṭafaren, ssemraseɣ  tutlayin nniḍen anda ilaq , tugniwin , izenziɣen. Iswi, d aseqreb n tikti d tmussni i unelmad.

Tutlayt-inu: D acu n wallalen i tessemraseḍ di tedwilin-im? Ansi i asent-id-tettagmeḍ timussniwin?

Massa Guiddir: Ddeqs n ttawilat i semraseɣ , skud xeddmeɣ, skud ttafeɣ-d allalen yelhan. Tamsirt, ttaruɣ-tt s powerpoint; asekles, xeddmeɣ-t s uselkim; aseggem n usekles, xeddmeɣ-t s yiwen usnas (application) akken ad taweḍ tugna d ṣṣut i yinelmaden d wid i yi-yeṭṭafaren akken iwata.

Tutlayt-inu: Mmeslay-aɣ-d cwiṭ ɣef wahil i tjerrdeḍ d yigburen-is.

Massa Guiddir: Ur nwiɣ ara ad sεuɣ annect-a n yinelmaden i yi-yeṭṭafaren , ferḥeɣ nezzeh yis-sen imi iyi-gan taflest , ṭṭafaren-iyi , xeddmen-yi-d afud; ɣef waya, lebɣi-w meqqer. Sεiɣ asenfar ɣer sdat, d aheyyi n temsirin n tutlayt tamaziɣt ara yennalen   akk iswiren; annect-a, ma irad wuzmir.

Tutlayt-inu: D acu n tarrayt i tessemraseḍ, iɣef tbennuḍ amahil-im akken ad gezzun yiseqdacen ad ttawin ɣur-m tamussni?

Massa Guiddir: Tarrayt, d asexleḍ gar tarrayt tamaynut d tmensayt acku llant temsirin ideg ilaq ad d-fkeɣ imedyaten, ad segziɣ yis-sen, akken daɣen tikwal, ad slen , ad walin tugna , azenziɣ … atg  Inelmaden gezzun yis-sen , iswi-inu d asiweḍ n yizen  i wid d tid ara iwalin timsirin-inu.

Tutlayt-inu: D anwa i am-yettaken afus n tallelt (ma yella)? Ini-aɣ-d amek (techniquement)?

Massa Guiddir: Deg wayen yerzan  aɣawas n temsirin igburen d nekk i yessewjaden, i yettnadin deg teɣbula yemgaraden ama d timsirin n yisdawanen , idlisen , ikatayen , iblugen…   ma  d aseggem d ucebbeḥ n temsirin  d argaz-iw Mass Achouri  i  t-ixeddmen.

Tutlayt-inu: Kemm, yellan d tayemmat yettrebbin, tesselmadeḍ di tesnawit d youtube; ahat ur yeshil ara fell-am akken ad trefdeḍ akk taεkemt-a! Amek i tessawaḍeḍ ad tessedduḍ imuhal-im?

Massa Guiddir: Mačči d ayen isehlen, d taεkemt ẓẓayen. Refdeɣ-tt  acku umneɣ s tutlayt d yidles-inu , ḥemmleɣ  axeddim-iw d yinelmaden-iw  , rnu ɣer-s beṭṭuɣ akud –iw gar ttrebga d uselmed. Leεtab, ur yettuneḥsab, iswi-inu, d tutlayt tamaziɣt, ad teflali gar tiyaḍ , ad tt-lemmden warraw-is.

Tutlayt-inu: Ma nessuter-am-d ad tgeḍ aktazal i umecwar akk i d-telḥiḍ, amek ara yili? Igerrez neɣ yeḥwaǧ ad yelhu ugar! D acu tessarameḍ i yimal deg way-a?

Massa Guiddir: Ur d-qqareɣ ara igerrez d ayen, nekk, simmal ttnadiɣ ad snerniɣ igburen , ad seggmeɣ ugar asenked-nsen.  ad d-awiɣ tarrayin timaynutin i yessawaḍen ugar tamussni war leεtab ama i nekk ama i yinelmaden. Ad iniɣ skud nella mazal lxir ar sdat.

Tutlayt-inu: Aṭas medden i yeqqaren nḥemmel tutlayt-nneɣ. D acu i d tayri n Tmaziɣt ɣur-m?

Massa Guiddir: Tayri n tmeslayt d aseqdec-ines, d asemres-ines s zzuxx war akukru , nekkni s wid d tid  i tt-yesselmaden ilaq ad as-neg amur deg wulawen n yimdanen , ad nreṣsi azal-ines deg ulawen d leqdicat-nsen s wudem n tussna.

Tutlayt-inu: D acu n wazal i tla tutlayt tamaziɣt ɣur-m? D acu i as-ilaqen akken ad d-yali fell-as wass amellal, ad teṭṭef amkan i tuklal di tmurt-nneɣ neɣ ger tutlayin nniḍen?

Massa Guiddir: Tamaziɣt, d tamagit, d tutlayt n tyemmat,  d idles, d amezruy  … maca  leḥbis-is  d imnaṛen, teqqim kan anda i tt-ssawalen.  Γef waya, d lawan ad ncemmeṛ  i yiɣallen. Yal yiwen, s tezmert-is s wudem ussnan , ad–tt-id-ibeyyen deg yal taɣult s usemres n wallalen imaynuten yeddan d tallit ideg nella.

Tutlayt-inu: Ablug-nneɣ "tutlayt-inu", zrin ɣef tlalit-is ugar n 6 wayyuren, mudd-aɣ-d tamuɣli-m fell-as.

Massa Guiddir: Γur-i nekk, d aɣbalu n tmussni s wacu ara tennerni tutlayt n tmaziɣt. S timmad-iw, ttawiɣ-d tamussni deg-s , ssarameɣ-as teɣzi n tudert, d aɣbalu ara yettfeyyiḍen d tagrest neɣ d anebdu, d leqdicat yecban wigi ara yefken afud d tudert i tutlayt tamaziɣt.

Tutlayt-inu: Awal-im n taggara, efk-it-id ttxil-m, d asirem-im i yimal.

Massa Guiddir: Tanemmirt-ik i tikkelt nniḍen imi tefkiḍ azal i leqdic-iw. Tanemmirt akk i wid d tid i iyi-d-yettakken afud, yal yiwen s yisem-is. Ssarameɣ ad iliɣ gar tid  ara yesnernin tutlayt tamaziɣt. Ddeqs n yisenfaren iwumi xemmleɣ iɣallen ad nuɣal ɣer-sen mi ara d-banen s wudem unṣib. Awal-iw ar da  «Tamaziɣt, buddeɣ -as tudert. ».

Assaɣ i unekcum ɣer temsirin n. massa akselyan di youtube:

https://youtube.com/channel/UCz9vfCqylBxBnghLgS7I-Zw

Tadiwennit, yexdem-itt S.Bendali

https://sadbendali.blogspot.com/2021/03/tadiwennit-d-tselmadt-massa-guidir.html