Tarrayt n uleqqem akked Rabeḥ Firḥi

Aleqqem (ttelqim), d yiwen n ttawil i ssemrasen yifellaḥen (ibeḥḥaren) akken ad rren aseklu i iḥecden d aseklu ara d-imudden lɣella yettmaččan.

Ticki ara d-yemɣi uεeqqa yeɣlin di tmurt neɣ ahat win neẓẓa, qqaren-as *dker*, i wakken ad yuɣal d *nnta* ttleqqimen-t.

 Amek ttleqqimen isekla?

 Melmi i d-yettili uleqqem?

 Acḥal n yineffiren n ttelqim i yellan ?  

Tbeddu tallit n ttelqim seg taggara n waggur n furar, tkeffu di maggu acku isekla di tallit-a ttilin ukin. Isekla akk yellan nezmer ad ten-nleqqem, siwa azumbi, aslen d ukerruc. Aleqqem, aṭas n yineffiren (lesnaf)  i yellan, yal ssenf icudd ɣer tallit akked ssenf n useklu i nra ad t-nleqqem. Gar yineffiren-agi mucaεen di temnadt n Leqbayel ad naf : 

Aleqqem gar ufurk d teglimt n useklu:

Mi negzem afurk, ad nessemsawi tadimt-is,  ad ncelleḥ taglimt n useklu (lleḥma) azal n 7 sm,  ad nsidef deg-s taxellalt m-leεyun. ad tesεu 12 sm, ad tili tenǧer seg yiwen n yidis, ad tekcem azak n 5 sm. Syin ad as-nenneḍ rrafya, ad as-nernu talaɣt. Γef taggara, ad tt-neṭṭef s uculliḍ akken ur tt-yettεeddi ara ubeḥri, ur tt-yesselxas ugeffur.

Asficcet:

Ticki tgezmeḍ afurk, ad tcergeḍ tadimt-is di tlemmast, ad teskecmeḍ taxellalt i ineǧren seg sin n yidisan. Ula d ta, ad as-neg rrafya d talaɣt akked uculliḍ ɣer taggara.

Aleqqem s lεin :

Ad d-nekkes lεin seg useklu i nebɣa, ad ncelleḥ afurk azal n 7 sm s ufella d akessar. ad nernu acelleḥ nnig-s s tehri, syin ad nger lεin-nni daxel-is ad tt-ncudd s uculliḍ i iǧehden.

Asemlili :

Ad neddem taxellalt, ad tt-nenǧer seg yiwen n yidis, ad tt-nessemlil d ufurk i negzem, yerna nenǧer-it seg yidis.  Ad t-ncidd s rrafya, ad as-neg ciṭ n talaɣt, ad as-ndewwer aculliḍ. 

Aleqqem

S ttelqim-agi, merra ṭṭerḍiqent txellal d leεyun-nni, gemmunt, ttmuddunt-d lɣella mliḥ. Acukan aleqqem s tadimt yettili di mayu, tinna yernan ɣur-s llan kra n yisekra ṭṭafaren kan yiwen n ssenf n uleqqem.

Asnemmer:

Tutlayt-inu, tesnemmir aṭas mass Rabeḥ Firḥi n temnaḍt n Mεatqa i d-yessnekden tarrayt n uleqqem n yisekla s usnas i tgensast n ublug-nneɣ deg "unnar". Tajmilt-nsen meqqret, netta d tmeṭṭut-is massa Firḥi i yeddan di lebɣi i massa F.Cebbiri. Nessaram-asen talwit d teɣzi n leεmer.

Farida Cebbiri

Tutlayt-inu

https://sadbendali.blogspot.com/2021/06/tarrayt-n-uleqqem-akked-rabeh-firhi.html