Timlilit d umaru Lyazid Werdi

Lyazid Werdi, d aselmad n Tmaziɣt,  d amaru. Ilul deg Larebεa Nat Yiraten di 16 dujember 1983, yezdeɣ di taddart n Tnewwart, deg At Umalu, lεerc n Wat Yiraten. Yelmed Tamaziɣt deg ugezdu n tutlayt d yidles amaziɣ, anda d-yewwi turagt deg useggas n 2008. Si 2010 ar ass-a, yesselmad Tamaziɣt deg uɣerbaz alemmas Atmaten Luhi deg Wayt Umalu. Akka tura, d anelmad n Master di tsekla di tesdawit n Mulud Mεemmri n Tizi Uzzu. Ablug-nneɣ Tutlayt-inu, iga yid-s tadiwennit, netta, yerra-d s tumert ɣef yisteqsiyen akk i as-yettunefken. Aṭas n lebɣi d usirem deg yimal n Tmaziɣt i aɣ-d-yemla di tririyin-is ara teɣrem da:

Tutlayt-inu: D acu i yessnedhen tayri n tira deg-k?

Lyazid Werdi: Tayri n tira, tendeh deg useggas 2017 deg uɣerbaz anda sselmadeɣ, acku xedmeɣ-d yid-sen aḍris amezwaru n tsuqilt i iyi-yefkan lebɣi ad kemmleɣ. Rnu ɣur-s tayri n tɣuri ay sεiɣ seg wasmi lliɣ d acawrar.

Tutlayt-inu: Tirmit-ik tamezwarut di tira, d ammud n yiḍrisen, azwel-is "abruy si tsekla tagraɣlant", ssenked-it-id ttxil-k i wid yettnadin ad t-ɣren.

Lyazid Werdi: Abruy si tsekla tagraɣlant, d ammud n yiḍrisen s mennaw n yisental d tewsatin i d-suɣleɣ si tutlayin tibeṛṛaniyin, yecban tafransist d teglizit… Iḍrisen yesεan azalen deg uselmed, snernayen tizemmar n yimeɣri. Llant deg udlis-a, tmucuha, tineqqisin, tinfusin, iḍrisen n usegzi d usfukel, ussnanen… rnu ɣur-s aḥric n tmedyezt di taggara, d tunṭict i yal win ara yeɣren adlis.

Tutlayt-inu: Win ara t-yeɣren ad t-iḥulfu am wakken d iḍrisen ufrinen n uselmad  i yinelmaden; acu d iswi n umaru (mass Werdi) deg usemres n wanaw-a amaynut n tira di tsekla tamaziɣt taqbaylit?

Lyazid Werdi: Iswi-inu, mi d-uriɣ adlis-a, sarmeɣ ad yili d tasarut deg ufus n yal imeɣri s way-s yezmer ad yelmed kra n temsal d yisental igraɣlanen. Yerna ad iẓer d akken taqbaylit/tamaziɣt, d tutlayt yemsasan d tutlayin n ddunit, tezmer ad teddu d wakud d tussna di yal taɣult d yal aḥric n tussna d tsekla.

Tutlayt-inu: Amek i tferneḍ isental n yiḍrisen ama d wid i d-tessuqleḍ neɣ wikad i turiḍ kečč s timmad-ik?

Lyazid Werdi: Tuget n yisental, ferneɣ-ten-id si tɣuriyin ay giɣ i kra n yidlisen, tisɣunin, iɣmisen… i yuran s tutlayin tiberraniyin. Walaɣ d akken d isental i iwulmen, i yelhan i uselmed acku seḍfaren-d azalen d tzemmar, yerna sεan timsirin d tigraɣlanin.

Tutlayt-inu: D acu ay zemren ad rnun yiḍrisen ussnanen d yiɣamsanen akked tmucuha tigraɣlanin deg usileɣ n yilemẓi azzayri amaziɣ, azekka?

Lyazid Werdi: Imeɣri, mi ara iẓer d akken tutlayt-is tesεa udem n tegraɣlanit, ad yennerni deg-s lebɣi n tɣuri d usekfel deg yigerrujen-is, akken yezmer ad d-iger iman-is ɣer tira ɣas ma yella di taɣult-nniḍen. Daɣ-netta, ɣur-neɣ ddeqs n yimedyaten n yimura i d-yufraren s yiɣunab n tira taseklant icebḥen, nutni d imejjayen, d ijenyuren…

Tutlayt-inu: Deg yimalass amezwaru n wayyur-a n yulyu, telliḍ ger yimura yettekkin di tmesrit n udlis amaziɣ n At Wasif, d acu ara d-tiniḍ ɣef tedyant-a d tid i tt-yecban?

Lyazid Werdi: Timesrit n Wat Wasif, d tucbiḥt d tamxaleft, d tagnit anda temlal tasa d way turew, nessaram ad d-tettuɣal yal aseggas acku yuɣal-as wazal ameqqran i umaru n teqbaylit/ tamaziɣt d wayen yura, yella deg-s leqder d tmussni εlayen, mlalen yimura, timaruyin, iselmaden d tselmadin, imussnawen d tmussnawin, imeɣnasen d tmeɣnasin akked yimeɣriyen d wid akk iḥemmlen idles d tutlayt -nneɣ.

Wid i d-yessuddsen timesriyin n udlis amaziɣ, tajmilt-nsen d tameqqrant. Maca riɣ ad rreɣ tajmilt i tdukkla Tigejdit n Wat Umalu, At Yiraten i d-yessuddsen timesrit di tazwara n useggas 2021, anda lliɣ d aεeyyal iqeddcen ɣef usnerni n tutlayt, tajmilt i wid akk iqeddcen deg-s.

Tutlayt-inu: Ahat ad ilin kra n yisenfaren-ik nniḍen i yimal! Ungal, deg umedya?

Lyazid Werdi: Aṭas n yisenfaren i ttheggayeɣ, maca ad ṭṭfen cwiṭ n wakud acku ayen yelhan ilaq ad iεeṭṭel. Ad yili umaynut s wazal-is ladɣa deg uḥric n usuɣel.

Tutlayt-inu: Tineggura-a, tasekla tamaziɣt taqbaylit yuran, simmal tettnerni. D acu d tamuɣli-k deg uswir adelsan d yisental?

Lyazid Werdi: Tira taqbaylit/tamaziɣt, tennerna mazal la tettnernay, acku aṭas i d-yegran iman-nsen ɣer tira s lebɣi meqqren d yiswiren yufraren,  d ayen yessefraḥen nezzeh, nwala aṭas n yiɣunab iseklanen imaynuten, rnu ɣur-s aṭas n wungalen s wazal-nsen, ladɣa aṭas n tlawin i d-yuran ungalen, d ayen izaden.

Tutlayt-inu: Imeskaren yettarun s Tmaziɣt, zgan ttidiren ddeqs n wuguren d yiεekkiren. D acu tettwaliḍ d tifrat i usnerni n tɣuri s Tmaziɣt (ladɣa Taqbaylit)?

Lyazid Werdi: Amaru n Teqbaylit/tamaziɣt, ur yesεi ara ttawilat i wakken ad d-yessuffeɣ akk ayen yellan d tikti icebḥen deg wallaɣ-is. Ayen akk i d-ttarun yimura, ttxelliṣen-t s ssumat ɣlayen. Maca ɣas akka, refden acqirrew s wudem n timuɣnest i wakken ad snernin ayla-nsen. Degmi amaru n teqbaylit/ tamaziɣt, azal-is meqqer.

Tutlayt-inu: D anwi ay d imura d tmura n tsuta tamirant i tettwaliḍ ufraren-d? Bder-aɣ-d kra n yismawen.

Lyazid Werdi: Ur zmireɣ ara ad d-bedreɣ imura n ddunit, ma ur d-bdireɣ ayla-nneɣ, wid yerẓan asalu, i yefkan amḍiq i wakken ass-a ad timɣur tutlayt wa ad taweḍ ɣer yiswiren εlayen. imezwura: Bulifa, Mulud Mεemmri, Mulud Ferεun, Ɛmer Mezdad, Racid Ɛellic, Salem Zenya, Belεid At Ɛli, Ɛumer Ulaεmara, Kamal Buεmara, Muḥend Akli Ḥeddadu,...

Mebla ma nettu akk imura d temyura n wass-a, d ixulaf yegman i d-yernan abaɣur i tutlayt d yidles.

Tutlayt-inu: Deg yiẓeḍwan inmettiyen d internet s umata, tutlayt tamaziɣt, tebda tettaɣ abrid-is ddac ddac. Γef wacu i tzemreḍ ad twellheḍ wid yettarun s tutlayt-nsen d wid i tt-iɣunzan?

Lyazid Werdi: Deg yiẓeḍwan imettiyen,tutlayt-nneɣ tennerna acku nesεa imussnawen d yijenyuren n tsenselkimt i iqeddcen am yiḍ am wass i wakken ad teddu d wakud d tussna. D asenfar ameqqran ara ibeddlen amezruy n Teqbaylit di taɣult n tsenselkimt.

Tutlayt-inu: D acu i d asirem ameqqran n Lyazid Werdi: ama d aselmad n Tmaziɣt neɣ d amaru hh?

Lyazid Werdi: Asirem-iw, Tamaziɣt  ad tennerni ugar wa ad taweḍ ɣer tmura n ddunit i meṛṛa s yiswiren yufraren. Ssarameɣ daɣen deg wid ur tt-nelmid ad gen ussisen i wakken ad tt-lemden, am wakken t-id-yeǧǧa Dda Lmulud : "win yebɣan tamaziɣt ad yissin tira-s".

Tutlayt-inu: Ttxil-k, ini-d awal ɣef ublug-nneɣ "tutlayt-inu".

Lyazid Werdi: Tanemmirt i ublug " Tutlayt-inu" i yefkan azal i Tmaziɣt, i iqeddcen seg wul ilmend n userni-ines. Sarameɣ ad teftim wa ad tesseftim, ad d-tufrarem ugar s wayen tqeddcem. Tanemmirt seg wul.

Tadiwenit, iga-tt Sadeq Bendali

https://sadbendali.blogspot.com/2021/07/timlilit-d-umaru-lyazid-werdi.html