Naṭali Dilag, yiwet tlemẓit tapulunit i tezdeɣ tayri n yidles amaziɣ

Tettaru, tettmeslay, tcennu s Teqbaylit

Nekk, d Nathalie, d Tapulunit. Bdiɣ ḥemmleɣ idles amaziɣ seg useggas n 2003. Yudef-iyi deg wul segmi bdiɣ selleɣ yis-s. Yiwen urgaz yellan ixeddem akked baba deg wakud-nni, yemmeslay-iyi-d ɣef tmurt n Leqbayel. Wagi, d mmi-s n yiwen ujenyur apuluni. 

Deg yiseggasen n 70, yesεedda 5 n yiseggasen deg tmaneɣt n Lezzayer. Baba-s, yella yettawi-t ad yissin tamurt n Leqbayel. Netta, iḥekku-iyi-d, nekk, tkeccem-iyi tayri n teqbaylit xas akken lliɣ sεiɣ kan 13 n yiseggasen. Tamurt n Leqbayel, tuɣal tjebbed-iyi dayen kan: idurar ddan d yilel. Uɣaleɣ ttnadiɣ ad issineɣ ugar ɣef tamurt-a, qqareɣ deg internet ɣef Yimaziɣen. Simmal qqareɣ fell-asen, simmal ttiεzizen deg wul-iw. Ula d amezruy-nsen yeεǧeb-iyi aṭas. 

Seg wasmi sliɣ i tezlit ''Tiɣri n taǧǧalt'' n Lwennas Meεṭub, tutlayt taqbaylit tebda tkeccem-iyi. Mi ara as-selleɣ tettuɣ iman-iw, tettuɣ anta-yi. Begseɣ ad tt-issineɣ. Acu kan, deg tmurt-iw, ur yettwassen ara yidles amaziɣ. Yewεer-iyi akken ad d-afeɣ ttawil swayes ara tt-lemdeɣ.

Taggara-agi, skecmeɣ anasiw KeyBer akked usnas n usefti n yimyagen di tilifun-inu. Qqareɣ daɣen adlis n tjerrumt n Kamal Nait Zerrad. Cwi kan llan yimeddukal iqbayliyen i yi-εawnen wama di tazwara nneεtabeɣ. Bdiɣ ttissineɣ talɣiwin n tjerrumt, xas akken mxallafent ɣef tutlayin iwumi qqaren "indo-européennes". Lemdeɣ tirawalt s temεemrit xas akka llan yimesla, weεren-iyi i ususru am q, ḥ, ẓ, ṭ, ε.

Deg useggas 2019, fernen-iyi ad kkiɣ di tfaska n ''Racont'art'' i d-yellan di taddart n Saḥel, asun n Buzgan. Deg wahil, lliɣ niqal ad d-cnuɣ kra seg yizlan n yimesdurar n Pulunya akked kra n tezwayin n ccḍeḥ ansayan n tama n Cracovie. Sḥassfeɣ aṭas imi ur ssawḍeɣ ara ad ruḥeɣ imir-nni ɣer Lezzayer acku ur iyi-d-fkin ara l visa,  war ma nnan-iyi-d tamentilt.

Ssarameɣ ad izmireɣ ad kkiɣ deg tezrigt i d-iteddun di taddart n At Ɛisi di temnaḍt n Yiεekkuren, ad teffeɣ targit-iw.

Xas tanekda, tettusuqel-d si Tefransist, G.M:

Xas tanekda-s tettusuqel-d si Tefransit, Natalie Doulag, tezga trennu almud-is n tira d umeslay n Teqbaylit. Nettat, d yiwet seg wid yesseqdacen "tutlayt-inu" akked "amaz-ling".

Tanekda, tettunefk-d i Sadeq Bendali

https://sadbendali.blogspot.com/2021/08/natali-dilag-yiwet-tlemzit-tapulunit-i.html