Ma nniɣ-d ɣef massa Dalila Qeddac-Ccix, taselmadt-tamarut, d tin iwumi tezdeɣ tira deg yidammen, ahat ur ɣliḍeɣ ara. D tullisin, d ungalen neɣ d tamedyezt, tezga tettawi-d ayen igerrzen. Ula d "tutlayt-inu" - ablug n Tmaziɣt - ur teɣfil fell-as. Sya ɣer da, tettak-d afus deg -s. Ad tt-nesnemmer aṭas ɣef waya. Assa, terna-d asefru s wazal-is, azwel-is "tazeqqa n yimawlan".
A tazeqqa n yimawlan
Teɣliḍ tegliḍ s yikufan
Yettru fell-am ubernus
Anda yella udekkan
Yecfan i wuḍan d wussan
Ass-agi yuli-t wammus
Anda lla-t lkanun yeḥman
D tegmat n watmaten yebhan
Ass-agi deg-m fkan afus
Taɛrict n baba d yemma
Tehtuti a yessetma
Taḍwiqt fell-as tɣab tafat
Ajgu alemmas yeɛma
Asalas yeṭṭef tama
Di sin zedren di nnehtat
Ah a tazeqqa mm-teɣma
Amzun teɣli-d lqiyyama
Tegliḍ ula s ccfawat
Tazeqqa yesdukkulen
Ass-a tebḍa atmaten
Tabaqit-nsen tettru
Ustu yugi ifeggagen
Iyuẓal-nni seṭṭden gnen
Tarigla teǧǧa asegru
Tigejdit temmut dayen
Aqermud ǧǧan-t wansayen
Sefru ay allaɣ sefru
Widak-nni n lejdud ɣlayen
Asegres yenfa tasga
I wadaynin imellsen
Yeččuren d akraren
Ass-agi tuwet deg-s lfinga
Acbayli n zzit yefren
Ad yennuɣni ger yinyen
Lkanun yezder di tirga
Tazeqqa ass-a tettwamḥa
Xas akken tesɛa ccbaḥa
I tt-ihudden d asurdi
Dayen kan tɣurr-itt sseḥḥa
Deg-s daɣ ur d-teggri rraḥa
Tagmat tayri ur tt-tezdi
Dduḥ terwel-as nnecraḥa
Akked uzuzen d uḥiḥa
Teɣli-d rrehba d tuggdi.
Sɣur Dalila Qeddac-Ccix,
Commentaires
Enregistrer un commentaire