Azekka, d aɣerbaz

Ḥḥareɣ ad d-yaweḍ uzekka! Ula d iḍes yufeg, xersum ad iyi-yettel s tnafa deg yirebbi-s. Rǧiɣ armi igen baba ddmeɣ-d aglaway-is akken ad urareɣ yis-s. Tama-w, d gma Takfa ula d netta s uglaway yessalay yessadar. 

Taswiɛt, tuẓaf-d yemma, tenna:

-Azekka d aɣerbaz neɣ ala ? Sensem iglawayen-nwen ma ulac ad ken-yeɣder yiḍes.

Dɣa imir kan, nsexsi-ten. Ur ukiɣ armi sliɣ i taɣect n yemma:

-Kker fell-am a yelli. Ass-a, d anekcum-im amezwaru s aɣerbaz! 

S ucmumeḥ d tumert swayes i d-neṭweɣ seg wusu amzun d ayyur n lɛid neɣ ugar. Sirdeɣ, swiɣ ayefki s texfaft taẓidant. Tessels-iyi yemma iselsa-w imaynuten i d-tesseggra s tbanta taxuxit. Teṭṭef-iyi afus srid ɣer uɣerbaz amenzu. Umreɣ ayen din! 

Azal n mraw n tedqiqin, nuweḍ ɣer uɣerbaz imi yeqreb mliḥ ɣer wanda nezdeɣ; yettwabna deg wakal n jeddi. Ufiɣ llan yakan wid i yi-yezwaren, tuget deg-sen akked yimawlan-nsen i d-ddan. Tullas, lsant akk am nekk, ma d arrac s tbanta tazegzawt. Akken i n-tusa tselmadt, tenna yemma:

-D tagi ara kem-iseɣren a Tiziri.

Dɣa teddinez-d ɣur-i tessuden-iyi. 

Taswiɛt, nekcem ɣer tesmilt anda, iɣraben-is ččuren d unuɣen, ɣer deffir d turarin, di tlemmast d tigida d yisɣimen, ɣer sdat d tafelwit d usira n uselmad. Maca akken kan i d-tenna yemma ad ruḥeɣ, ṭṭfeɣ deg yijifer-is, nniɣ-as:

-Ad dduɣ, ad dduɣ! 

-Ayen a yelli? Acḥal ay-a mi tessarameḍ ad tkecmeḍ s aɣerbaz! 

-Nekk ur ttɣimiɣ ara acku ur ssineɣ ara taɛrabt.

Dɣa tenṭeq-d tselmadt-is:

-Ur ttuggad! Ad tt-tissineḍ ɣur-i.

Tidet kan. Tɣaḍ-iyi ayen din yelli akken i yi-ɣaḍent tnuddwin-is merra.

Dalila Qeddac

I tutlayt-inu

https://sadbendali.blogspot.com/2021/10/azekka-d-aerbaz.html