Ifeddixen
Wali-d ɣer tugna n wudem-iw. Ɣer uḍris n wallen-iw, ur nelli d ungal neɣ d tullist. Senfali-d imeṭṭawen-nsent yettidiren deg-sent, am uzal am yiḍ. Wali ɣer uglim n tfekka-s, mačči akka i yella. D laẓ i ineqqcen deg-s armi yuɣal d asuki, wamma yella d amellal amzun yessiɣ fell-as udfel. Nadi-d ɣef teḍsa-w i ukren yideddiyen n tmuɣbent, tinna ay tesgujel lmeḥna s yifeddixen n lḥif. Wali-d ɣer yicenfiren-iw ireqqaqen amek kkawen, wali amek cqeqqen d iɣisan s yisennanen n tlufa.
I yiselsa-w yerkan, tfaqeḍ belli tezga tfekka-w deg-sen tettarra ifeẓ am uqjun yettkerriɛen iɣes. Acebbub-iw, yella d aselsan, maca ass-a, ulac timceḍt swayes ara t-fruɣ akken ad as-yeslef xersum waḍu akken llan yiḍudan n yemma ttawin ttarran di tmelɣiɣt-iw. Tesɛiḍ lḥeqq ad terreḍ taqejjirt ɣer deffir acku ur yeqriḥ ḥedd usennan, ala aḍar yeddan ḥafi. Tesɛiḍ azref acku rkiɣ, ttfuḥuɣ yerna d ameɛfun. Accaren-iw, d iberkanen. Maca mačči d nekk i la yettfuḥun, mačči d lɣerḍ-iw. D tiqubac n tgullelt d tgujelt i la yettqeddiren deg-i.
I uletma-agi tamecṭuḥt, ur k-tɣaḍ ara? Wali ɣer tqejjirin-is amek gersent seg usemmiḍ ula d acifuḍ ur t-tufi ad t-tezzuɣer. Yak ula d kečč d amdan am nekk. Tettḥulfuḍ am nekk. Ayɣer ihi i teǧǧiḍ tala n ufus-iw aleqqaq d taqurant, d takawant. Sureg-d cwiṭ n wayen i d-tettagmeḍ akken ad neckenṭeḍ deg tudert xersum ad imɣureɣ ad kkseɣ ddel fell-i d uletma Taninna. Wali s idisan-ik, wali zelmeḍ yeffus, ulac akk aqcic d tannudda-w neɣ d tizya-w.
Teẓriḍ ayɣer ? Acku ha-ten-an deg yiɣerbazen, deg tesmilin yeḥman. La qqaren timsirin yemgaraden, la snernayen timussniwin-nsen. La qqaren fell-i d fell-ak. Ahat maḍi ula d kečč d aselmad neɣ d amejjay neɣ d abugaṭu. Tura ma d aselmad, mel-iyi amek ara teslemdeḍ i warrac ad awsen ameɣbun kečč deg-i tettxezzireḍ. Mel-iyi amek ara ten-tseɣreḍ timsirin n twizi. Ma d amejjay, senɛet-iyi amek ara tsejjiḍ imuḍan kečč yeẓran aṭas n waṭṭanen i d-itekken seg yir tagella, i d-itekken seg usemmiḍ d qajjaɛ.
Ma d abugaṭu, sken-iyi-d amek ara tkecmeḍ ɣer uxxam n teɣdemt anda i tegguleḍ ɣef wammus n lbaṭel ad t-tḍummeḍ, kečč ur nezmir ad tḥaddeḍ fell-aɣ d wid yellan am nekkni. Dɣa ma mačči d yiwen deg-sen iban kečč d ababat. Ḥulfu amzun nekk d mmi-k, tagi d yelli-k. Yak d ciṭ n lweɛda kan i ak-in-sutreɣ yerna iban terkiḍ seg udrim. Tbaneḍ seg tkerrust-agi i la tsedduyeḍ. Ma ulac xersum serkeb-iyi d uletma, awi-aɣ ad nḥewwes ciṭ amer ahat ad nettu llaẓ i la ineqqben deg tɛelliḍin-nneɣ tilmawin.
Ad nwali cwiṭ agama i yemyuṭṭafen afus deg ufus. Neɣ xaṭi, awi-aɣ ɣer taddart-nneɣ ad nerzu ɣer wanda tgen yemma d baba yerna ad asen-alseɣ amek i la nettidir amer ahat ad aɣ-d-aznen taneglust ara ibedden fell-aɣ, ad aɣ-id-tessu leḥnana ara tdel s tayri.
Ttuɣ ur ak-d-nniɣ ara belli yemma d baba, mmuten. Nɣan-ten yicenga n tudert mi d-fkan timest deg unebdu yezrin. Tecfiḍ i tmest-nni iḥuzan tamurt n Leqbayel, iɣef yemmeslay umaḍal. D tinna i yesserɣen axxam-nneɣ. Nekkni nella ɣer xalti Faḍma deg Tizi. Ass-nni, ndemmeɣ mi qqimeɣ ɣer xalti wamma xersum nemmut deg yirebbi n yemma neɣ deg yirebbi n baba. Seg yimir, ḥedd, ur aɣ-d-yeqqim ad nsenned ɣur-s. Xalti, tesɛa argaz d waɣzen yerna aṭas n yigerdan i tesɛa.
Rǧu! Tessneḍ Rebbi ? Ma tessneḍ-t ini-as mmuggreɣ-d sin n yigujilen n Larebɛa n At Yiraten, ɛafeɣ-ten, rewleɣ fell-asen. Ma ur as-tenniḍ ara, mi ara nemmet seg laẓ ad as-neccetki, ad tɛebbiḍ ddnub-nneɣ. Ddnub i yiri-k.
Di teswiɛt, yeɣli urgaz deg yimeṭṭawen, yettru neɣ yettmeǧǧid kifkif, yuẓ-d ɣur-neɣ, yenna:
Tuwim yir tamuɣli fell-i send ad iyi-tissinem. Lemmer srewleɣ taqejjirt fell-awen d acu iyi-d-yecqan akken ad d-rseɣ ɣur-wen?
Izemm-aneɣ-d ɣer ɣur-s, yenna:
Nekk tadyant-iw tcuba ɣer tagi-nwen. Ma ur yi-tessinem ara nekk ssneɣ-ken, ssneɣ imawlan-nwen ad ten-yerḥem Rebbi. Nekk n taddart n Ufella. Asmi i rɣan yimawlan-nwen i rɣan warraw-iw Damya d Kusayla. Nekk lliɣ di Tneẓruft imi ayyur s wayeḍ i n-rezzuɣ. Yemma-tsen, ha-tt deg yir addad, ad tidir neɣ ad temmet. Yal mi ara n-aseɣ, ad ten-in-afeɣ ttraǧun-iyi s tumert d ccuq am yigḍaḍ yettganin baba-tsen s yimi urẓim.
Asmi i yi-d-yuweḍ yir isali i tcerreg twenza-w. Ar tura mazal ur umineɣ s tmettant-nsen. Ruḥen akken d ifrax. Yemma-tsen, ar ass-a, ur teẓri d akken tarwa-s tuɣal ddaw n wakal. Ihi a tarwa d ayen i ken-yuɣen i yi-yuɣen. D lbext i d-yeɣlin fell-awen i icerwen axxam-iw. Ur lliɣ d amejjay, ur lliɣ d aselmad, ur lliɣ d abugaṭu maca d ababat iwumi tejreḥ tasa. D ababat iɣef d-yeɣli udrar n twaɣit. D ababat yemmuten netta yedder, d ababat iwumi rẓen wafriwen.
Ifeddixen, Dalila Qeddac-Ccix, arraz amezwaru deg uḍris ufrin n wayyur n wunbir 2021, tunt-inu.
https://sadbendali.blogspot.com/2021/11/adris-ufrin-arraz-amezwaru-n-tuber-2021.html
Commentaires
Enregistrer un commentaire