Igmaḍ
Yal wa yerfed afus-is s igenni, kra deg-sen zwaren-ten yimawen-nsen am yefrax ifirelles yeččewčiwen : ‹‹Massa ! Massa! Massa !...››
Massa taselmadt, urɛad d-tewwiḍ, tezzi-d aɛrur-is, tebda tettaru ɣef tfelwit seg uzemz ar aseɣti n ukayad n ukradyur wis sin. Ass-a, d ass n useɣti d tririt n tezmilin n yinelmaden, timeẓẓaɣ beddent ṛeddent am tid n yejḥiḥen, la sseɣtayen ttarun ɣef yezmamen-nsen tiririyin iṣeḥḥan. Ulawen-nsen, am ṭṭbel la kkaten ṣak ṣak acku, tagnit n yigmaḍ tewɛer nezzeh !
Tizmilin d-yemmalen aswir n yal yiwen d yiwet seg yinelmaden, d aɣerbal imqeccer. Kra, ad t-yemḥeṣ, ad iɛeddi srid deg tefla, ad t-terbu tbaqit deg yirebbi-s s tumert am tyemmat. Kra nniḍen, ad yebded yernu ad yadded d ibraryen ikuren am tcirtin neɣ wid yettmenṭaḍen am llazuq n yilindi. Ur cuban awren wala seksu wala berkukec meqqar.
D widak i d-jebbṛent tlawin tikwal, d tawackant tubrint neɣ d aḥbul n uɣrum imderder akken ur tent-id-treggem ara nneɛma d-yettqassan wid tt-inekṛen.
Ma d ayen yesɛedda uɣerbal-nni ur nelli ara d imceṛcer, yeqbel-it, d winna s timmad-is ara d-yessuffɣen seksu n ssmid abrarac, aḥebrarac, ur nseɛɛu tibrucin wala afḍiḍ.
Massa taselmadt, tettaru s ufus-is, tessegzay, tesseɣtay s yimi-s yernu teṭilli-d s taṭṭucin-is timdewwrin tizṛaṛaqin am llibat seg nnwaḍer-is rnu ɣer-s s tbanta-is tacebḥant am udfel. Tettban-d amzun d tamejjayt maca xas akken ṣṣut-is ḥnin, xas akken s leɛqel s leɛqel i aɣ-tesḍallay ɣef tuccḍiwin-nneɣ am tyemmat llɛali yesseḥbibiren ɣef warraw-is, lḥiba-s tessagad am buberrak di tnafa.
Massa, simmal tesseɣtay, simmal serreden yinemaden-is, tɣellli-d tsusmi d usemmiḍ deg tneɣrit amzun d tagrest, ula d imru-iw ḥulfaɣ-as d aṣemmaḍ yeggur amzun yurğa igmaḍ am nekk, yid-i, sdat-i, gar yifassen-iw d yiḍudan-iw yequjjṛen, d iqesmuden almi uqqlen d ifegrunen ur nemɛin. Gziɣ ɣaḍeɣ-t, aah, limmer ad d- yenṭeq !
Ula d nekk ḥulfaɣ uḍneɣ, la yi-d-yettali wejjir d qijjur, gguresleɣ am tbaṭaṭat n yiḍelli. Aqerru-iw, taɛebbuḍt-iw, iḍarren-iw, ul-iw, iziɣer-iw akk qerḥen-iyi, igmanen-iw d yeɣsan-iw akken llan segren, la ssebṛaqen, ssenqaren amzun d zellum i d-yersen fell-i. Ččiɣ tiyita, driɣ, uɣeɣ-tent ɣer daxel. Ur iyi-yewwi yigenni wala lqaɛa imi nekk, ẓriɣ ur ɛeğğbeɣ wiyiḍ ma ur iyi-yeɛğib yiman-iw.
-Uk, dayen ! Ha-tt-an Massa la tettawi tettarra gar-aneɣ, Tenna : ‹‹Bab n tferket am bab n tfekka neɣ n tferka, ad as-tuɣal.››
D taggara, ifukk useɣti-nni , ifukk učewčew-nni, akud yečča iman-is, yal wa tewweḍ-it-id tferket-is ar gar yifassen-is, d tunt-is neɣ d lbext-is, wissen? Rsent-d tbaqiyin, xsin wulawen, ffɣent-d nnhati, nekk tid-iw ufgent akkin i yiɣerban n uɣerbaz-nneɣ i yi-yetthuzzun yal ass di dduḥ-is, s tirga d yiṛeggimen irewwlen fell-i ula d nutni, s trewla teğğeḍ aceṭṭiḍ, akin akin ɣer wanda yeggan usirem abeṛṛeqmuc ar d-yessemɣi gerninuc tuɣmas.
Ffɣent nnhati ad calint, ala nekk d ubuḥcic-iw i d- yeggran la nessenneltay tinnexsas akked ucaḥuḍ n usḥissef s tkafrart. Ih, ala nekk i d- yeggran la rekkmeɣ deg yiman-iw am tasilt yeqqed yirrij s uzabuq imi ẓriɣ agmuḍ d-wwiɣ diri-t yernu diri-t nezzeh! Dayen, tiferket-iw i d-irekben alemsir n usigna, srid ar gar wallen-iw, ṛwiɣ-tt s tmuɣli d usenqed. Dayen, texbebbi tfekka-w, yebbuɣdeddi wallaɣ-iw, iwumi-yi, tura? Ala tamettant iyi- d-yeqqimen! Nniɣ-ak ay iman-iw : ‹‹ Ḥḥḥ, ur tesmideɣ asegzi, ur tesmideɣ aseɣti wala agemmuḍ a Ḥmimi!››
Inebbeh-d nnaqus n uɣerbaz, tfukk tesragt, ffɣen yinelmaden akken llan. Taselmadt, yeddem-itt waḍu ur gziɣ amek neɣ melmi. Ggriɣ-d ala nekk d yir tazmilt-iw am yir lbext-iw, nekk yuɣen tannumi d yigmaḍ yifen igmaḍ! Ziɣen ɣef waya i as-yenna yinzi: ‹‹ Tuɣal zzit s asɣar ! ››
Neɣlent-d tregwa n wallen-iw di ddqiqa, uqqleɣ ur fṛizeɣ ara ula d isem-iw yettwarun s uberkan ɣef umellal, winna yeddan deg wasif i d iyi-yiwwin. Ala imeṭṭi i d iyi-d-yefnan imi ala nekk i yeẓran tid yersen deg-i, aṭṭan-iw d agensaw.
Xas akken bdan ttuɣalen-d yinelmaden seg usgunfu ɣer tesmilt yernu la sbiḥliwen akkin- akka, ɣelqeɣ tiwwura n wallaɣ-iw rniɣ tid n wallen-iw amzun weḥḥed-i i lliɣ. Dɣa uɣaleɣ ɣer wass-nni n ukayad mi akken imru-inu, yiwen yimru-inu i sɛiɣ, yekkaw yugi ad yaru. Zwiɣ-t rniɣ zwiɣ-t... Yegguma ! Yugi ad d- yebru i ssmax xas akken taqerruyt-iw tamecṭuḥt, tessen teḥrec seg wass amezwaru n uswir amenzu ar ass-a.
Гef tesqimt, agmuḍ ɣef tferket, tiferket gar yifassen-iw, iṛfiqen zzin-iyi, ufiɣ-d iman-iw la ttruɣ ttmeğğideɣ ɣef yimru i yi-yeğğan gar yiberdan am wasmi yemmut baba ɛzizen.
Igmaḍ, Lwiza Kaneb, arraz wis 3 deg uḍris ufrin n wayyur n wunbir 2021, tunt-inu.
https://sadbendali.blogspot.com/2021/11/adris-ufrin-arraz-wis-3-tuber-2021.html
Commentaires
Enregistrer un commentaire