Tanelmadt Ǧellid Maysa: Tajmilt i tyemmat

Tayemmat

Cfiɣ twessa-yi yemma

Γef tedyanin n ddunit

Tenna-yi lḥu qbala

Ad tafeḍ abrid n talwit

Ma tneǧreḍ-t akken i iwata

Ad tmagred ussan mellulit

Di lehdur ur ttzeggid ara

Awal-im xas siwzel-it

Ma tneṭqeḍ tamsalt tefra

Wissen yir awal iwumi-t?

Yemma

Ass-a tajmilt ad tuɣal

I tin i yi-d-yewwin ɣer ddunit Ul-is d amellal

Fell-aɣ nettat d taḥnint

Tεuss-aɣ am yiḍ, am uzal

Tettaggad fell-aɣ ula di targit

Γur-neɣ acḥal tesεa azal

D nettat i d sser n txelqit

Deg yirebbi-m εziz yiḍes

Ifassen-im d dduḥ n laman

Din din naddam ad yi-yeḥweṣ

D acewwiq n targit i d-yerzan

Xas igenni ad ifareṣ

Ad ɣaben akk yetran

Tifeḍ tiziri s nnefṣ

A yemma a tafat n yiberdan

Deg unebdu d kemm i d tili

Di tegrest d abernus

Di tefust d tajeǧǧigt ur neɣli

Taεkemt-is ad tifsus

Deg yimi-m yezga : a yelli

Ḥader aḍar anda yettrus

Ma ur telliḍ, ur nettili

A yemma ay afus ayeffus

Temliḍ-iyi acḥal d tamsirt

Di ddunit kemm d amedya

Tenniḍ-iyi ddunit d tisirt

Tettezzi sya u sya

D ayen tzerεeḍ tafejrit

Ara tafeḍ tameddit yella

Tudert ma tella d tibḥirt

A yemma kemm d lɣella

Ayen d-nniɣ ilaq ugar

Ulac awal ara ten-id-ijemεen

Nufa-as asefru d amdekker

Ssarameɣ akk ad d-hedren

Ala tayri-m uɣur nesnagar

Ulac aεwin i tt-yifen

A yemma uggadeɣ amgar

Skud ad kem-ttwalint wallen

Ḥemmleɣ-kem akkin i yigenwan

Ḥemmleɣ-kem akkin i lebḥur

Ḥemmleɣ-kem nnig n yiman

Ḥemmleɣ-kem mačči d lehdur

Ḥemmleɣ-kem leḥsab n yitran

Ḥemmleɣ-kem s tutlayt nwayyur

Ḥemmleɣ-kem d yelli-m i am-d-yennan

Ḥemmleɣ-kem ; aṭas, aεemmur

Tajmilt-a i yemma

Tajmilt akk i tyemmatin

D nutenti i aɣ-d-yesweslen ɣerda

D nutenti i d tiεzizin

Lxir-nsent d ameqqran

Skud mazal-itent d timuddirin

  

Ǧellid Maysa, tanelmadt deg useggas wis 2 alemmas (2am). Aɣerbaz alemmas Unar di Mεatqa

https://sadbendali.blogspot.com/2021/11/tanelmadt-gellid-maysa-tajmilt-i-tyemmat.html